नाफा बढे पनि बैंकहरूको प्रतिसेयर आम्दानी घट्यो, कुनको कति ?
काठमाडौँ — वाणिज्य बैंकहरुको वार्षिक प्रतिसेयर आम्दानी घटेको छ । बैंकहरुले सार्वजनिक गरेको दोस्रो त्रैमासिक वित्तीय विवरणअनुसार गत वर्षको सोही अवधिको तुलनामा औसत वार्षिक प्रतिसेयर आम्दानी करिब २ रुपैयाँ घटेको छ । बैंकहरुको नाफा निरन्तर बढे पनि प्रतिसेयर आम्दानी घटेको छ । मुख्यत: बैंकहरुले पछिल्ला वर्ष लाभांशका रुपमा सेयर बोनस दिएपछि सेयर संख्या बढ्न जाँदा प्रतिसेयर आम्दानी खुम्चिएको हो ।
पुस मसान्तसम्म २७ बैंकले कुल ३४ अर्ब २१ करोड खुद नाफा कमाएका छन् । गत वर्षको पुस मसान्तसम्म ३१ अर्ब ७ करोड कमाएका थिए । १० प्रतिशत नाफा बढे पनि वार्षिक प्रतिसेयर आम्दानी भने घटेको छ । सेयरमा लगानी गर्नेहरुका लागि प्रतिसेयर आम्दानी महत्वपूर्ण सूचक हो । खुद नाफा र जारी गरिएको साधारण सेयरको अनुपात नै प्रतिसेयर आम्दानी हो तसर्थ नाफा धेरै हुँदैमा प्रतिसेयर आम्दानी बढी नहुन सक्छ । प्रतिसेयर आम्दानीले संभावित लाभांश अनुमान गर्न लगानीकर्तालाई सघाउ पुग्छ ।
गत वर्षको पुस मसान्तसम्म २७ बैंकको औसत प्रतिसेयर आम्दानी २० रुपैयाँ ८ पैसा रहेकोमा यो पुस मसान्तमा १८ रुपैयाँ ८३ पैसामा झरेको छ । २७ बैंकको कुल प्रतिसेयर आम्दानी ५०८ मा झरेको छ, गत वर्ष ५४२ रुपैयाँ १६ पैसा थियो ।
सार्वजनिक गरिएको प्रतिसेयर आम्दानीमा एनआईसी एसिया बैंक सबैभन्दा अगाडि छ । उसको प्रतिसेयर आम्दानी ४१ रुपैयाँ ४३ पैसा छ । कतिपय बैंकले गत आर्थिक वर्ष घोषणा गरेको बोनस सेयर समायोजन गरेकाले प्रतिसेयर आम्दानी कम देखिएको हो भने कतिपयको समायोजन हुन सकेको छैन । हिमालयन बैंकको सबैभन्दा कम ११ रुपैयाँ ४७ पैसा छ ।
पुस मसान्तसम्मको आम्दानीअनुसार बैंकहरूको वार्षिक प्रतिसेयर आम्दानी
बैंक | आधारभुत प्रतिसेयर आम्दानी रुपैयाँमा |
एनआईसी एसिया | ४१.४३ |
राष्ट्रिय वाणिज्य | ३२. १५ |
सिद्धार्थ | २५.१२ |
नबिल | २३. ५९ |
ग्लोबल आईएमई | २२. ३९ |
प्रभु | १९.८६ |
माछापुच्छ्रे | १९.७१ |
नेपाल | १९.६७ |
कृषि विकास | १९.१० |
सानिमा | १८.९७ |
एनएमबी | १८.६४ |
प्राइम | १७.९९ |
एभरेष्ट | १७.८० |
इन्भेष्टमेन्ट | १७.७४ |
सिटिजन्स | १७.४५ |
मेगा | १७.३२ |
स्टान्डर्ड | १६.९८ |
एसबीआई | १६.४९ |
एनसीसी | १६.१७ |
बंगलादेश | १६.०९ |
सेन्चुरी | १५.१२ |
सनराइज | १४.७४ |
लक्ष्मी | १४.१५ |
बीओके | १३.५४ |
कुमारी | १२.९४ |
सिभिल | ११.६६ |
हिमालयन | ११.४७ |
कुल | ५०८.२८ |