सुनकोसीको पानी मरिणमा खसाल्न सुरुङको काम (फोटोफिचर)- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

सुनकोसीको पानी मरिणमा खसाल्न सुरुङको काम (फोटोफिचर)

राजकुमार कार्की

सिन्धुली — राष्ट्रिय गौरवको सुनकोसी–मरिण डाइभर्सन बहुउद्देश्यीय आयोजनाको सुरुङमार्ग निर्माणका लागि मेसिन राख्ने प्लेटफर्मको काम द्रुत गतिमा भइरहेको छ । सुनकोसी नदीको पानी सुरुङबाट मरिणखोलामा खसाली तराईका खेतीयोग्य जमिनमा सिँचाइ सुविधा पुर्‍याउनु नै आयोजनाको उद्देश्य हो ।

सिन्धुलीको कमलामाई नगरपालिका–२ कुसुमटारमा चार महिना अघिदेखि सुरुङ खन्ने मेसिन (टीबीएम) राख्न प्लेटफर्म निर्माण भइरहेको आयोजनाले जनाएको छ । सुरुङको प्रवेशद्धारमा थोरै प्वाल पारेर दुई सय मिटर लामो प्लेटफर्म निर्माण भएपछि मेसिनबाट खन्ने काम सुरु हुनेछ ।

आयोजना प्रमुख मित्र बरालका अनुसार चीनबाट टीबीएम मेसिन ल्याइनेछ । सुरुङ मार्ग निर्माणको ठेक्का लिएको चिनियाँ कम्पनी चाइना ओभरसिज इन्जिनियरिङ (कोभेक) ले यहीं रफ्तारमा काम भए अबका चार महिनामा मेसिन कार्यस्थलमा ल्याइ काम सुरु हुने दावी गरेको छ । अर्थ मन्त्रालयबाट बजेटको स्रोत सुनिश्चितता भैसकेकाले सुरुङ खन्ने काम र सुनकोसीमा बाँध बाँध्ने (हेडवर्क्स) को काम सँससँगै हुनेछ ।

सुनकोसी मरिण डाइभर्सन परियोजनाको सुरुङ निर्माणसँगै अन्य संरचना निर्माणको ठेक्का ११ अर्ब २९ करोड २७ लाख २६ हजार ३३४ रुपैयाँमा चाइना ओभरसिज कम्पनीलाई दिइएको छ । गत आवबाट सुरु भएको आयोजना ०८२/०८३ सम्ममा सक्ने लक्ष्य रहेको छ । सुनकोसीमा १२ मिटर उचाइको बाँध निर्माण गरी नदीको पानी १३ दशमलव ३ किलोमिटर लामो सुरुङमार्फत प्रतिसेकेण्ड ६७ क्युसेक पानी कमलामाई नगरपालिका–२ कुसुमटार स्थित मरिणखोलामा खसालिने छ । साथै त्यहाँ पानी झारेर ३१ मेगावाट विद्युत् उत्पादन गरिने छ ।

आयोजना अन्तर्गत निर्माण हुने सुरुङमार्ग, हेडेक्स र पावर हाउस निर्माण मुख्य भौतिक संरचना रहेका छन् । विद्युत् उत्पादनसँगै तराईका जिल्ला बारा, रौतहट, धनुषा, महोत्तरी र सर्लाही जिल्लामा एक लाख २२ हजार हेक्टर क्षेत्रमा सिँचाइ सुविधा पुर्‍याइने छ । आयोजना निर्माण गर्न कुल ४६ अर्ब १९ करोड रुपैयाँ लाग्ने अनुमान गरिएको आयोजनाले जनाएको छ ।














प्रकाशित : माघ ६, २०७८ १४:५८
प्रतिक्रिया
पठाउनुहोस्

संविधानले स्थानीय तहमा जनप्रतिनिधिको रिक्तता कल्पना गरेको छैन : महामन्त्री थापा

कान्तिपुर संवाददाता

काठमाडौँ — नेपाली कांग्रेसका महामन्त्री गगनकुमार थापाले नेपालको संविधानमा स्थानीय तहमा जनप्रतिनिधिको रिक्तताको कल्पना नै नगरेको बताएका छन् । 

बिहीबार ट्विटरमार्फत महामन्त्री थापाले आफूहरूले बनाएको संविधानले स्थानीय तहमा जनप्रतिनिधिको रिक्तताको कल्पना नगरेको भन्दै निर्वाचनबारे कुनै निर्णय गर्दा स्थानीय तह रिक्त भएमा त्यो असंवैधानिक हुने बताएका हुन् ।

‘हामीले बनाएको संविधानले स्थानीय तहमा जनप्रतिनिधिको रिक्तताको कल्पना नै गरेको छैन । अत: निर्वाचनबारे कुनै पनि निर्णय गर्दा स्थानीय तह रिक्त हुनपुग्छ भने त्यो असंवैधानिक नै हुन्छ‚’ उनले लेखेका छन् ।

यो सरकार असंवैधानिक कदमविरुद्धको संघर्षबाट बनेकाले सरकारले गर्ने हरेक निर्णय संविधानको कसीमा सही हुनुपर्ने बताएका छन् ।

सत्तारुढ गठबन्धनमा नेकपा (माओवादी केन्द्र)का अध्यक्ष पुष्पकमल दाहालले संसदीय दलको निर्वाचन वैशाख र स्थानीय तहको निर्वाचन कात्तिकमा गर्ने प्रस्ताव गरेका थिए ।

स्थानीय तहको निर्वाचन वैशाखमा सकेर जेठ पहिलो साता नवनिर्वाचित पदाधिकारीले पदभार गरिसक्नुपर्ने कानुनी प्रावधान छ ।

प्रकाशित : माघ ६, २०७८ १४:५२
पूरा पढ्नुहोस्
प्रतिक्रिया
पठाउनुहोस्
×