फ्युजमेसिनद्वारा नेपालमा 'एआई फेलोशिप २०२२' को घोषणा- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

फ्युजमेसिनद्वारा नेपालमा 'एआई फेलोशिप २०२२' को घोषणा

कान्तिपुर संवाददाता

काठमाडौँ — आर्टिफिसियल इन्टेलिजेन्स (एआई) प्रतिभा, शिक्षा र सेवा प्रदान गर्दै आएको संस्था फ्युजमेसिनले  नेपालमा 'एआई फेलोशिप २०२२' को घोषणा गरेको छ । यो अनलाइन मार्फत प्रत्यक्ष प्रमाणीकरण हुने फेलोशिप कार्यक्रम विगत २ वर्षदेखि फ्युजमेसिनको पहलमा नेपालमा विस्तार गरिँदै आएको छ ।

क्षमता अभिवृद्धि गर्ने लक्ष्यका साथ विगत २ वर्षदेखि नै यस कार्यक्रममा यूकेएड स्किल्स फर इम्लाेयमेन्ट (सीप) को सहयोग रहँदै आएको फ्युजमेसिनले जनाएको छ । फ्युजमेसिनका अनुसार फेलोशिप कार्यक्रममा जम्मा १०० जना गणित, इन्जिनियरिङ र कम्प्युटर विज्ञान पृष्ठभूमि भएका विश्वविद्यालयमा अध्यनरत विद्यार्थी तथा स्नातक उत्तिर्णहरूलाई परीक्षा मार्फत आवद्ध गरिनेछ । चयन गरिएका परीक्षार्थीलाई सम्पूर्ण पाठ्यक्रमहरूमा पूर्ण-छात्रवृत्ति प्रदान गरिनेछ ।

यस कार्यक्रमको मुख्य उद्देश्य नेपालमा एआई इन्जीनियरहरूको संख्यामा वृद्धि गर्नु रहेकाे छ । सीपका टोली प्रमुख बल्जित बोहरा तथा उपप्रमुख स्तुति बस्नेतका अनुसार नेपाली विद्यार्थीहरुको सीपलाई विश्वव्यापी आइसीटीसँग मेल हुने गरी प्रणाली सुधार गरे मात्र नेपालको आइसीटीमा सम्भावना बलियो हुनेछ । उनीहरू भन्छन्, 'आवश्यक पूर्वाधार विस्तार गर्न, समय सान्दर्भिक पाठ्यक्रम निर्माण र लागू गर्न, शैक्षिक संस्थाहरू तथा अन्य सम्बन्धित् प्रणालीहरूसँग बलियो सहकार्य गर्न हामीले मद्दत गरेका छौं ।'

अमेरिकाका उच्च कोटीका विश्वविद्यालयमा रहेका एआई संकायका सदस्यहरू तथा एआई उद्योग विशेषज्ञहरुद्वारा निर्माण गरिएको र फ्युजमेसिनको स्वामित्वमा रहेको माइक्रोडिग्री, माइक्रोडिग्री स्पेसलाइजेसन कार्यक्रमलाई एआई फेलोशिप २०२२ मा समावेस गरिने छ । एक वर्ष लामो यस द्रुतगतिको कार्यक्रममा मेसिन लर्निङ, दिप लर्निङ्ग, न्याचुरल ल्यांग्वेज प्रोसेसिङ्ग र कम्प्युटर भिजनको पाठ्यक्रमहरू छन् ।

'हरेक वर्ष, हामी विश्वसनीय, उच्च गुणस्तरको एआई तालिम प्रदान गरि एआईमा पहुँच बढाउने बाटोतर्फ ठूला कदम जारी राखेका छौं' फ्युजमेसिनका प्रमुख कार्यकारी अधिकृत समीर मास्केले भने । फ्युजमेसिन संस्थाले फेलोशिप कार्यक्रमका पूर्वविद्यार्थीहरूलाई रोजगारी प्रदान गरेको बताउँदै उनले यस किसिमको महत्त्वपूर्ण पहलको निरन्तरता मार्फत अझ उच्च गुणस्तरको प्रतिभा निर्माण गर्न सक्षम हुने आशा ब्यक्त गरे ।

कार्यक्रमको अन्त्यसम्ममा, विद्यार्थीहरूले आर्टिफिसियल इन्टेलिजेन्स, मेसिन लर्निङ र डीप लर्निङ एल्गोरिदमका साथै अन्तर्निहीत गणित र कोडको ठोस बुझाइ विकास गर्नेछन् । कार्यक्रममा शिक्षाविद् र उद्योग विशेषज्ञहरूद्वारा संचालित साप्ताहिक अनलाइन कक्षाहरू, प्रोग्रामिङ असाइनमेन्टहरू, समूह परियोजनाहरू र परीक्षाहरू समावेश गरी मिश्रित सिकाइ प्रणालीको प्रयोग गरिनेछ । साथै धेरैजसो सामग्रीहरू विद्यार्थीले आफ्नो अनुकुल प्रयोग गर्नका लागि अनलाइन उपलब्ध हुनेछन् ।

फ्युजमेसिनले सन् २०१७ मा पहिलो पटक एआई फेलोशिप कार्यक्रमको सुरुवात गरेको थियो । फेलोशिप र यसको आवेदन/छनोट प्रक्रिया र दर्ता विवरणहरूको बारेमा थप जानकारी वेबसाइटमार्फत हेर्न सकिने छ ।



प्रकाशित : माघ ६, २०७८ १३:१४
प्रतिक्रिया
पठाउनुहोस्

स्वास्थ्य मापदण्डको खिल्ली

सन्जु पौडेल

लुुम्बिनी — रूपन्देहीको मायादेवी–६ स्थित एक सहकारीको साधारणसभामा मंगलबार लुम्बिनी प्रदेश सरकारका दुई मन्त्री अतिथि थिए । प्रमुख अतिथिका रूपमा भौतिक योजना तथा पूर्वाधारमन्त्री सहसराम यादव र विशिष्ट अतिथि अर्थ तथा सहकारी राज्यमन्त्री सुष्मा यादव सहभागी भए ।

सयौं सेयर सदस्य उपस्थित कार्यक्रममा राज्यमन्त्री यादवले मास्क लगाएकी थिइनन् । मञ्चमा बसेका केहीले चिउँडोमुनि मास्क पुर्‍याएका थिए ।

लामो समय कार्यक्रममा बसेकी मन्त्री यादवले श्वासप्रश्वासमा समस्या हुने भएकाले लगातार मास्क लगाउन नसकेको बताइन् । ‘एक पटक संक्रमण भइसकेको हो,’ उनले भनिन्, ‘कोरोना भएपछि मास्क लगाउँदा गुम्सिएको महसुस हुन्छ, गाह्रो हुने भएकाले लगाइरहन सक्दिनँ ।’

तिलोत्तमा–६ का सागर बस्यालले कोरोनाविरुद्धको खोप लगाउने लाइनमा धेरैबेर पर्खिनुपर्‍यो । त्यहाँ उभिउन्जेल मानिसको ठेलमठेलमा उनी पनि परे । ‘जुन रोगको डर हो, त्यसकै खोप लगाउन जाँदा पनि सामाजिक दूरी थिएन,’ उनले भने, ‘रोगबाट बच्न होइन, रोग फैलाउन खोप लगाएझैं भयो ।’ मानिस धेरै हतारिँदा स्वास्थ्य मापदण्ड अपनाउनै भुलेको उनले बताए ।

जिल्ला प्रशासनमै राष्ट्रिय परिचयपत्र बनाउन दिनहुँ भीड हुन्थ्यो । केही कर्मचारीमा कोरोना संक्रमण देखिएपछि प्रशासनले बुधबारबाट अत्यावश्यकबाहेक सेवा बन्द गरेको छ । निर्वाचन कार्यालयमा मतदाता नामावलीमा दर्ता हुनेको उस्तै भीड देखिन्छ । अहिले स्वास्थ्य चौकी, सरकारी कार्यालय, स्थानीय तह, रेस्टुराँ, बजार, बसपार्क जहाँतहीं भीडभाड उत्तिकै छ । कोरोना संक्रमण दर बढेसँगै सरकारले गरेको स्वास्थ्यसम्बन्धी निर्देशनलाई स्थानीय प्रशासन, कोभिड व्यवस्थापन समिति र पालिका कसैले पनि गम्भीरताका साथ लिएको देखिँदैन । लुम्बिनी सांस्कृतिक नगरपालिकामा कोरोनाका बिरामी देखा पर्न थालेका छन् ।

पालिकामा संक्रमित संख्या पहिलेको तुलनामा थोरै भएकाले गाउँगाउँ परीक्षण सुरु नगरिएको नगर प्रमुख मनमोहन चौधरीले बताए । मायादेवी गाउँपालिका अध्यक्षसहित केही कर्मचारीमा संक्रमण देखिएकाले उनीहरू कार्यालयमा उपस्थित हुन सकेका छैनन् । बाँकेस्थित जानकी गाउँपालिकामा कोरोना संक्रमित फाट्टफुट्ट देखिन थाले पनि स्थानीय तहले कुनै खालका जाँच गर्न नपाएको कार्यवाहक अध्यक्ष भूमिसरा धितालको भनाइ छ ।

कपिलवस्तुको विजयनगर गाउँपालिकामा पनि नाका हुँदै आएका केही संक्रमित छन् । तर, पालिकाले परीक्षण गर्नुपर्ने अभियान थालनी नै नगरेको अध्यक्ष गोपालबहादुर थापा मगरले बताए । ‘कोरोना सेलाइसक्यो भन्ने पनि छैन,’ उनले भने, ‘त्यतातर्फ ध्यान दिई के–के गर्नुपर्ने हो, त्यसमा काम गर्नेछौं ।’

प्रकाशित : माघ ६, २०७८ १२:४४
पूरा पढ्नुहोस्
प्रतिक्रिया
पठाउनुहोस्
×