२९ सयमुनि ओर्लियो नेप्से, सबै उपसमूह घटे  - अर्थ / वाणिज्य - कान्तिपुर समाचार

२९ सयमुनि ओर्लियो नेप्से, सबै उपसमूह घटे  

कान्तिपुर संवाददाता

काठमाडौँ — बुधबार सेयर बजारको परिसूचक नेप्से २९ सयमुनि ओर्लिएको छ । ३८.३५ अंक घटेर परिसूचक २८९८ अंकमा कायम भएको हो । दिनभर जम्मा ६ अर्ब २ करोडको कारोबार भयो । हिजो ८ अर्ब ४४ करोडको कारोबार भएको थियो ।

आज २० कम्पनीको सेयर मूल्य बढ्दा १६५ कम्पनीको घट्यो । ६ कम्पनीको मूल्य स्थिर रह्यो । सबै उपसमूहहरु घटेका छन् । बैंकिङ १४, विकास बैंक ६३, फाइनान्स ५२, होटल तथा पर्यटन ७८, जलविद्युत ५९, जीवन बीमा २२५, उत्पादन १०९, लघुवित्त ७६, निर्जीवन बीमा ११७, अन्य ६० र व्यापार उपसमूह ८० अंकले घटे ।

बुद्धभूमि हाइड्रोपावर र सामलिङ पावरको मूल्य करिब १० प्रतिशतले बढेको छ । बुद्धभूमिको मूल्य प्रतिकित्ता २८७.८० र सामलिङको ७१४ रुपैयाँ पुगेको छ । घलेम्दी हाइड्रोपावरको मूल्य सबैभन्दा धेरै ४.३ प्रतिशतले घटेर ३५३ रुपैयाँमा झरेको छ । अपी पावर, अरुणभ्याली हाइड्रोपावर, जलविद्युत् लगानी तथा विकास कम्पनी, माथिल्लो तामाकोसी र सूर्या लाइफ इन्स्योरेन्स कम्पनी धेरै कारोबार रकमका आधारमा क्रमश अगाडि रहे ।


प्रकाशित : माघ ५, २०७८ १५:३४
प्रतिक्रिया
पठाउनुहोस्

डेरावालसँग विद्युत् महसुल बढी असुलेमा लाइन काटिने 

बक्यौता किस्ताबन्दीमा तिर्न पाइने
कान्तिपुर संवाददाता

काठमाडौँ — घरधनीले घरभाडामा बस्ने व्यक्तिहरुसँग विद्युत् प्राधिकरणले तोकेको महसुलभन्दा बढी रकम असुल गरेमा लाइन काट्न सकिने व्यवस्था गरिएको छ । घरधनीले डेरावालसँग बढी महसुल असुल गरेको गुनासो आएपछि प्राधिकरणले तोकिएको भन्दा बढी लिएको पाइएमा त्यस्ता घरधनीको लाइन काट्ने व्यवस्था गरेको हो । 

प्राधिकरणले विद्युत वितरण विनियमावली, २०७८ मार्फत सो व्यवस्था गरेको हो । घरभाडामा बस्ने व्यक्तिहरुले तोकिएका निश्चित शर्त पूरा गरी छुट्टै मिटर राखी विद्युत् सेवा लिन सकिने व्यवस्था पनि गरिएको छ ।

बक्यौता भुक्तानी गर्ने प्रतिवद्धतासहित छुट्टै मिटर राख्नको लागि घरधनीको लिखित सहमति, घरधनी र बहालमा बस्नेबीच कम्तिमा एक वर्षका लागि गरिएको घरबहाल सम्झौता, घरबहालमा बस्ने व्यक्तिलाई छुट्टै मिटर दिन प्राविधिक दृष्टिकोणबाट उपयुक्त भएमा, घरधनीको बाँकी बक्यौता नभएमा र बहालमा बस्नेको मिटर समेत एउटै स्थानमा राख्न सकिने गरी शर्त तोकिएको छ ।

अपार्टमेन्टमा बस्नेले प्राधिकरणबाट सिधै विद्युत् लिन सक्ने

अपार्टमेन्ट, बहुतले आवासीय भवन, कोलोनीहरूमा बसोबास गर्नेलाई तोकिएका शर्त पूरा भएमा अन्य ग्राहकसरह विद्युत् सेवा उपलब्ध गराउने व्यवस्था विनियमावलीमा गरिएको छ । अहिले अर्पाटमेन्टहहरुले आफूले प्राधिकरणबाट विद्युत् लिएर त्यहाँभित्र बस्नेलाई महँगो शुल्क लिएर आपूर्ति गर्दै आएकाे गुनासो छ ।

अब अपार्टमेन्टमा बस्नेले प्राधिकरणबाट मिटर लिएर सिधै विद्युत् लिन सक्ने हुँदा महसुल सस्तो पर्ने र खपत पनि बढ्ने कार्यकारी निर्देशक कुलमान घिसिङले बताए । उनले भने 'एउटै परिसरभित्र फरक–फरक विद्युत् महसुल दर आकर्षित हुने उद्योग सञ्चालन हुने अवस्थामा अलग–अलक मिटर राख्न पाउने छन् ।'

बक्यौता किस्ताबन्दीमा तिर्न पाइने

विद्युत् महसुलको बक्यौता रहेका ग्राहकले किस्ताबन्दीमा तिर्न पाउने भएका छन् । विद्युत् महसुल नतिरेर कालोसूचीमा परेका ग्राहकले पुनः विद्युत् लाइन जोड्नु पर्दा बक्यौता रकम एकमुष्ट बुझाउन नसकेमा नियमानुसार थप दस्तुर लिई बढीमा १२ किस्तासम्म रकम तिर्न सक्ने व्यवस्था गरिएको छ ।

ग्राहकले साबिकको वितरण केन्द्रबाट लगत खारेज गराई अर्को केन्द्रमा ठाउँसारी गर्न चाहेमा साबिकको केन्द्रमा तत्कालीन सयममा प्रयोग भएका विद्युतीय सामग्रीहरु उल्लेख भई आएमा त्यसको पुनः प्रयोगशाला परीक्षण गर्नु नपर्ने व्यवस्था गरी सहजीकरण गरिएको छ ।

प्रकाशित : माघ ५, २०७८ १५:१९
पूरा पढ्नुहोस्
प्रतिक्रिया
पठाउनुहोस्
×