डेरावालसँग विद्युत् महसुल बढी असुलेमा लाइन काटिने - अर्थ / वाणिज्य - कान्तिपुर समाचार

डेरावालसँग विद्युत् महसुल बढी असुलेमा लाइन काटिने 

बक्यौता किस्ताबन्दीमा तिर्न पाइने
कान्तिपुर संवाददाता

काठमाडौँ — घरधनीले घरभाडामा बस्ने व्यक्तिहरुसँग विद्युत् प्राधिकरणले तोकेको महसुलभन्दा बढी रकम असुल गरेमा लाइन काट्न सकिने व्यवस्था गरिएको छ । घरधनीले डेरावालसँग बढी महसुल असुल गरेको गुनासो आएपछि प्राधिकरणले तोकिएको भन्दा बढी लिएको पाइएमा त्यस्ता घरधनीको लाइन काट्ने व्यवस्था गरेको हो । 

प्राधिकरणले विद्युत वितरण विनियमावली, २०७८ मार्फत सो व्यवस्था गरेको हो । घरभाडामा बस्ने व्यक्तिहरुले तोकिएका निश्चित शर्त पूरा गरी छुट्टै मिटर राखी विद्युत् सेवा लिन सकिने व्यवस्था पनि गरिएको छ ।

बक्यौता भुक्तानी गर्ने प्रतिवद्धतासहित छुट्टै मिटर राख्नको लागि घरधनीको लिखित सहमति, घरधनी र बहालमा बस्नेबीच कम्तिमा एक वर्षका लागि गरिएको घरबहाल सम्झौता, घरबहालमा बस्ने व्यक्तिलाई छुट्टै मिटर दिन प्राविधिक दृष्टिकोणबाट उपयुक्त भएमा, घरधनीको बाँकी बक्यौता नभएमा र बहालमा बस्नेको मिटर समेत एउटै स्थानमा राख्न सकिने गरी शर्त तोकिएको छ ।

अपार्टमेन्टमा बस्नेले प्राधिकरणबाट सिधै विद्युत् लिन सक्ने

अपार्टमेन्ट, बहुतले आवासीय भवन, कोलोनीहरूमा बसोबास गर्नेलाई तोकिएका शर्त पूरा भएमा अन्य ग्राहकसरह विद्युत् सेवा उपलब्ध गराउने व्यवस्था विनियमावलीमा गरिएको छ । अहिले अर्पाटमेन्टहहरुले आफूले प्राधिकरणबाट विद्युत् लिएर त्यहाँभित्र बस्नेलाई महँगो शुल्क लिएर आपूर्ति गर्दै आएकाे गुनासो छ ।

अब अपार्टमेन्टमा बस्नेले प्राधिकरणबाट मिटर लिएर सिधै विद्युत् लिन सक्ने हुँदा महसुल सस्तो पर्ने र खपत पनि बढ्ने कार्यकारी निर्देशक कुलमान घिसिङले बताए । उनले भने 'एउटै परिसरभित्र फरक–फरक विद्युत् महसुल दर आकर्षित हुने उद्योग सञ्चालन हुने अवस्थामा अलग–अलक मिटर राख्न पाउने छन् ।'

बक्यौता किस्ताबन्दीमा तिर्न पाइने

विद्युत् महसुलको बक्यौता रहेका ग्राहकले किस्ताबन्दीमा तिर्न पाउने भएका छन् । विद्युत् महसुल नतिरेर कालोसूचीमा परेका ग्राहकले पुनः विद्युत् लाइन जोड्नु पर्दा बक्यौता रकम एकमुष्ट बुझाउन नसकेमा नियमानुसार थप दस्तुर लिई बढीमा १२ किस्तासम्म रकम तिर्न सक्ने व्यवस्था गरिएको छ ।

ग्राहकले साबिकको वितरण केन्द्रबाट लगत खारेज गराई अर्को केन्द्रमा ठाउँसारी गर्न चाहेमा साबिकको केन्द्रमा तत्कालीन सयममा प्रयोग भएका विद्युतीय सामग्रीहरु उल्लेख भई आएमा त्यसको पुनः प्रयोगशाला परीक्षण गर्नु नपर्ने व्यवस्था गरी सहजीकरण गरिएको छ ।

प्रकाशित : माघ ५, २०७८ १५:१९
प्रतिक्रिया
पठाउनुहोस्

अब घरमै चार्जिङ स्टेसन राख्न पाइने, के छ मापदण्ड ? 

कान्तिपुर संवाददाता

काठमाडौँ — नेपाल विद्युत् प्राधिकरणले विद्युत् वितरण विनियमावली २०७८ जारी गर्दै निजी आवास, कार्यालय, फर्म, कम्पनी, संस्थालाई पनि चार्जिङ स्टेसन स्थापना गर्नका लागि अनुमति दिन सकिने व्यवस्था कार्यान्वयनमा ल्याएको छ । अब कुनै व्यक्तिले आफ्नो घरमै चार्जिङ स्टेसन बनाउन सक्नेछन् । विद्युतीय सवारी साधनको प्रयोगलाई बढावा दिन भन्दै प्राधिकरणले यस्तो व्यवस्था कार्यान्वयनमा ल्याएको हो ।

सार्वजनिक स्थल वा निजी घरजग्गामा चार्जिङ स्टेसन राख्नका लागि प्राधिकरणको स्वीकृति भने अनिवार्य रुपमा लिनुपर्नेछ । सहरी क्षेत्रमा पनि सार्वजनिक चार्जिङ स्टेसन बनाउनेलाई बढी प्राथमिकता दिइने र त्यसका लागि चाहिने आवश्यक पूर्वाधारहरु आफैले तयार पार्नुपर्ने विनियमावलीमा उल्लेख छ ।

चार्जिङ स्टेसनका लागि चाहिने पूर्वाधार निर्माणको अनुमति लिनका लागि पूर्वशर्तहरु नियमावलीमा उल्लेख छ । ११०००/४०० वा ३३०००/४०० भोल्टको सबस्टेसन, ट्रान्सफर्मर लाइन, केबल, टर्मिनेसन मिटरिङसहितका पूर्वाधारहरु आवश्यक पर्नेछ । गाडी पार्क तथा चार्जिङ हुने क्षेत्रफल र सोसम्बन्धी सिभिल कार्यहरु र गाडी प्रवेश तथा निकासका लागि संरचना बनाउनुपर्ने छ ।

त्यस्तै, सार्वजनिक चार्जिङ स्टेसनमा जडान हुने विद्युतीय सवारी साधनका सर्भिस उपकरणलाई अन्तर्राष्ट्रिय मान्यताप्राप्त एजेन्सीले प्रमाणित गरेको हुुनुपर्नेछ । त्यस्ता उपकरणहरु विगत ३ वर्षदेखि विश्वका विभिन्न देशहरुमा प्रयोग भएको हुनुपर्ने व्यवस्था समेत विनियमावलीमा राखिएको छ । पछिल्लो समय विद्युत् खपत बढाउनका लागि प्राधिकरणले आवश्यक नीतिगत व्यवस्था मिलाउँदै गएको छ ।

प्राधिकरणका कार्यकारी निर्देशक कुलमान घिसिङले विद्युत् सेवा छिटो, सर्वसुलभ एवं सहज रुपमा उपलब्ध गराउन र खपत बढाउने गरी ग्राहकमैत्री नयाँ विद्युत वितरण विनियमावली कार्यान्वयमा ल्याइएको बताए । विनियमावलीमार्फत सार्वजनिक चार्जिङ स्टेसनको प्रवर्द्धनका लागि विशेष व्यवस्था गरिएको घिसिङले बताए ।

‘दुई सय केभिएसम्मको विद्युत् डिमाण्ड भएका चार्जिङ स्टेसन स्थापना गर्ने सेवा प्रदायकलाई प्राधिकरणले ट्रान्सफर्मर सहितको विद्युत् सेवा प्रवाह गर्नेछ । त्यो भन्दा माथिल्लो डिमाण्ड हुने चार्जिङ स्टेसनको हकमा भने एचटी लाइनको काम प्राधिकरणले गर्नेछ तर ट्रान्सफर्मर जडान लगायतका बाँकी काम सेवाप्रदायकले नै गर्नुपर्नेछ,’ उनले भने । चार्जिङ स्टेसनका लागि छुट्टै विद्युत् महसुल समेत लागू भइसकेको छ ।

प्रकाशित : माघ ५, २०७८ १४:५३
पूरा पढ्नुहोस्
प्रतिक्रिया
पठाउनुहोस्
×