सेयर बजारले २९ सय अंक नाघ्यो, सबै उपसमूह बढे - अर्थ / वाणिज्य - कान्तिपुर समाचार

सेयर बजारले २९ सय अंक नाघ्यो, सबै उपसमूह बढे 

कान्तिपुर संवाददाता

काठमाडौँ — साताको पहिलो दिन आइतबार सेयर बजारको परिसूचक नेप्सेले २९ सय अंक नाघेको छ । परिसूचक ६९ अंक बढेसँगै २९२६ मा कायम भएको छ । साथै कारोबार रकममा पनि उल्लेख्य वृद्धि भएको छ ।

गत बिहीबार ६ अर्ब ६६ करोडको सेयर कारोबार भएकोमा आज ९ अर्ब ६७ करोड पुगेको छ । सबै उपसमूहमा हरियाली छाएको छ । बैंकिङ ३९, व्यापार ७९, होटल तथा पर्यटन ५५, विकास बैंक १४३, जलविद्युत ७५, फाइनान्स ५६, निर्जीवन बीमा २६६, उत्पादन ४०९, अन्य ६६, माइक्रोफाइनान्स ११०, जीवन बीमा ३८९ र लगानी उपसमूह १ अंकले बढेका छन् ।

६ कम्पनीको मूल्य स्थिर रहँदा १६७ कम्पनीको मूल्य बढ्यो भने १६ को घट्यो । स्टान्डर्ड चार्टर्ड बैंक, मध्यभोटेकोसी र किसान लघुवित्तको मूल्य १० प्रतिशतले बढेको छ । कारोबार रकमका आधारमा अरुणभ्याली हाइड्रोपावर अग्रस्थानमा रह्यो ।


प्रकाशित : माघ २, २०७८ १५:१९
प्रतिक्रिया
पठाउनुहोस्

कोरोनाको कारण देखाउँदै प्रतिनिधिसभा बैठक स्थगित

कान्तिपुर संवाददाता

काठमाडौँ — संघीय संसद्, प्रतिनिधिसभाको सोमबारका लागि बोलाइएको बैठक कोरोना संक्रमणका कारण बस्न नसक्ने भन्दै सूचना टाँसेर स्थगित गरिएको छ ।

संसद्का महासचिव भरतराज गौतमले आइतबार एक सूचना जारी गर्दै सोमबार दिउँसो १ बजेका लागि आह्वान गरिएको बैठक स्थगित गरिएको जानकारी दिएका हुन् ।

कोरोना संक्रमण बढ्दै गएका कारण प्रतिनिधिसभा बैठक स्थगित गरिएको सूचनामा उल्लेख छ । 'माघ ३ गते सोमबार दिनको १ बजे बस्ने गरी निर्धारण भएको प्रतिनिधिसभा बैठक कोभिड-१९ को बढ्दो संक्रमणका कारण उक्त दिन र समयमा बस्न नसक्ने भएकोले' स्थगित गरिएको सूचनामा उल्लेख छ ।

सभामुख अग्निप्रसाद सापकोटाले अर्को बैठक माघ १६ गते आइतबार दिनको १ बजेका लागि निर्धारण गरेको पनि सूचनामा उल्लेख छ ।

प्रतिनिधिसभा बैठक यसअघि पनि पटक-पटक स्थगित हुँदैआएको छ । प्रमुख प्रतिपक्षी दल नेकपा एमालेले जारी राखेको अवरोधका कारण पछिल्लो समय संसद्ले काम गर्न सकिरहेको छैन । राष्ट्रिय सभाको बैठक पनि पटक-पटक सूचना टाँसेर स्थगित गरिँदै आएको छ । सोमबारका लागि आह्वान गरिएको राष्ट्रिय सभाको बैठक पनि अर्को सूचना जारी नभएसम्मका लागि स्थगित गरिएको सूचना आइतबार मात्रै जारी गरिएको थियो ।

प्रकाशित : माघ २, २०७८ १५:१३
पूरा पढ्नुहोस्
प्रतिक्रिया
पठाउनुहोस्
×