जनवरी १६ लाई भारतले स्टार्टअप दिवसका रुपमा मनाउने- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

जनवरी १६ लाई भारतले स्टार्टअप दिवसका रुपमा मनाउने

कान्तिपुर संवाददाता

काठमाडौँ — भारतले आजकै दिन अर्थात् जनवरी १६ लाई नवप्रवर्तन (स्टार्टअप) दिवसका रुपमा मनाउने भएकाे छ । भारतीय प्रधानमन्त्री नरेन्द्र मोदीले स्टार्टअप व्यवसायहरू देशको आर्थिक विकासका लागि मेरुदण्ड हुने बताउँदै दिवसका रुपमा यसलाई मनाइने घाेषणा गरेका हुन् ।

शनिबार १५० भन्दा बढी नवउद्यमीहरूसँगको भर्चुअल भेलामा प्रधानमन्त्री मोदीले राष्ट्रको आर्थिक वृद्धिलाई बल दिने इन्जिनका रूपमा स्टार्टअप व्यवसायलाई व्याख्या गरेका थिए । वर्तमान दशकलाई उनले ‘टेकएड’ को संज्ञा दिएको भारतीय पत्रिका द हिन्दुले जनाएको छ ।

महामारीका बेला शिक्षा, स्वास्थ र अन्य नागरिक सेवा वितरणका लागि प्रविधिले महत्वपूर्ण भूमिका खेलेको मोदीको भनाइ छ । स्वतन्त्र भारतको उपलब्धीहरूको सम्झनाका लागि मनाइने ‘आजादीका अमृत महोत्सव’ पहल अन्तर्गतको एक कार्यक्रममा मोदीले आविष्कार, उद्यमशीलता र स्टार्टअप इकोसिस्टमलाई मजबुत बनाउन आफ्नो सरकारले ठूला परिवर्तनहरू ल्याउने प्रतिबद्धता व्यक्त गरेका थिए ।

‘सबैभन्दा पहिला उद्यमशीलता र स्टार्टअपलाई लम्बेतान सरकारी पक्रियाको झन्झटबाट मुक्त गरिनेछ,’ मोदीलाई उदृत गर्दै इकोनोमिक टाइम्सले लेखेको छ, ‘दोस्रो, स्टार्टअपलाई प्रवर्द्धन गर्न संस्थागत संयन्त्र निर्माण गरिनेछ र तेस्रो, युवा आविष्कारहरू र नवउद्यमीसँग हातेमालो गरिनेछ ।’

भारतमा पाँच वर्षको समयमा स्टार्टअपहरूको संख्या करिब ५ सयबाट ६० हजार पुगेको मोदीले बताएका छन् । उनका अनुसार यी नवउद्यमहरू ५५ भन्दा धेरै व्यवसायिक क्षेत्रमा सक्रिय छन् । यिनले खेलको नियम नै परिवर्तन गरिरहेका छन् , मोदीले भनेका छन् ‘मलाई लाग्छ भारतका स्टार्टअपको सुनौलो युग अब शुरु हुँदै छ।’

प्रकाशित : माघ २, २०७८ १२:१२
प्रतिक्रिया
पठाउनुहोस्

ललितपुरमा बुस्टर डोज आजबाटै, काठमाडौंमा सोमबार र भक्तपुरमा मंगलबारबाट मात्रै

मकर श्रेष्ठ

काठमाडौँ — काठमाडौं उपत्यकाको ललितपुर जिल्लामा आइतबारबाट कोरोनाविरुद्धको बुस्टर डोज लगाउन सुरु गरिएको छ । काठमाडौं जिल्लामा भने सोमबारबाट र भक्तपुरमा मंगलबारबाट मात्रै खोप दिन थालिने बताइएको छ ।

स्वास्थ्य कार्यालय ललितपुरका प्रमुख सतिष विष्टका अनुसार आइतबार पाटन अस्पतालबाट बुस्टर डोज लगाउन सुरु गरिएको हो । उनका अनुसार ललितपुर जिल्लाका हरेक स्थानीय तहबाट खोप दिइने छ ।

यस्तै, काठमाडौंबाट भने सोमबारबाट मात्रै बुस्टर डोज लगाउन सुरु हुने भएको छ । स्वास्थ्य कार्यालय काठमाडौंका प्रमुख सागर घिमिरेका अनुसार स्वास्थ्य तथा जनसंख्या मन्त्रालयले माघ २ गतेदेखि फ्रन्टलाइनमा काम गर्नेहरूलाई बुस्टर दिने घोषणा गरेपनि केही प्रवाधिक तयारी गर्नुपर्ने भएकाले आइतबार बुस्टर दिन नसकिएको हो ।

उनका अनुसार काठमाडौं उपत्यकामा १८ स्थानबाट खोप दिने तयारी स्वास्थ्य कार्यालयले गरेको छ । 'हामीले खोप कहाँ-कहाँ कति मात्रा पठाउने लगायतका विभिन्न प्राविधिक विषयमा अन्तिम तयारी गरिरहेका छौं । भोलीबाट बुस्टर लगाउन सुरू गर्छौं,' उनले भने ।

साथै, भक्तपुरमा भने मंगलबारबाट खोप दिन थालिने छ । स्वास्थ्य कार्यालय भक्तपुरका प्रमुख कृष्ण मिजारका अनुसार केन्द्रबाट खोप ल्याउने कार्य भइरहेकाले मंगलबारबाट मात्रै खोप दिन लागिएको हो । उनका अनुसार भक्तापुरमा हरेक स्थानीय तह तथा स्वास्थ्य कार्यालयहरूबाट खोप लगाउने व्यवस्था मिलाइँदै छ ।

स्वास्थ्य मन्त्रालयले शुक्रबार मन्त्री स्तरीय निर्णय गरेर माघको २ गतेदेखि अग्रपंतिमा खटिने व्यक्तिहरूलाई र १४ गतेदेखि ६० वर्ष र माथिका नगरिकहरूलाई कोभिड-१९ विरुद्धको बुस्टर डोज दिने निर्णय भएको सार्वजनिक गरेको थियो । बुस्टर डोजका रुपमा पहिला पूर्ण मात्रा खोप लगाएको ६ महिना पूरा भएको हुने छ भने पहिले लगाएकै खोप बुस्टरका रुपमा दिइने छ ।

प्रकाशित : माघ २, २०७८ १२:०८
पूरा पढ्नुहोस्
प्रतिक्रिया
पठाउनुहोस्
×