तीनमुखे झोलुंगे पुल ७ वर्षदेखि अलपत्र
पाल्पा — रुरुक्षेत्रमा निर्माणाधीन तीनमुखे झोलुंगे पुल साढे सात वर्ष बित्दासमेत अधुरै छ । तीन वर्षमा सक्ने गरी ठेक्का भएको हो । २०७१ असार १० मा पुलको शिलान्यास भएको थियो ।
निर्माण व्यवसायीले २०७४ असार ९ मा काम सक्नुपर्ने थियो । तर अहिलेसम्म काम पूरा भएको छैन । निर्माण सक्नुपर्ने म्याद गुज्रेको समेत चार वर्ष बितिसकेको छ । निर्माण व्यवसायीको लापरबाही र सरोकारवाला निकायको बेवास्ताले पुल बन्न नसकेको हो ।
तानसेन नगरपालिका–१४ अर्गली, गुल्मीको रुरुक्षेत्र गाउँपालिका–१ रिडीबजार र स्याङ्जाको कालिगण्डकी गाउँपालिका–१ कारिकोट चण्डीभञ्ज्याङलाई जोड्ने गरी पुल निर्माण सुरु भएको थियो । स्थानीय रेखदेख, अनुगमन लगायतको जिम्मेवारी कसैलाई नदिएकाले पनि काममा ढिलाइ भएको रुरुक्षेत्र–१ रिडीका वडाध्यक्ष रामलाल विकले बताए । ‘काममा निर्माण व्यवसायीले लापरबाही गरे पनि अनुगमनकारी निकाय नै कोही भएन,’ उनले भने, ‘स्थानीय सरकारलाई निर्माण व्यवसायीले टेर्ने अवस्था रहेन ।’ कालीगण्डकी नदी र रिडी खोलाको दोभानमा पुल बनिरहेको छ ।
निर्माण व्यवसायीकै कारण पुल निर्माणले तीव्रता पाउन नसकेको सस्पेन्सन ब्रिज डिभिजनले जनाएको छ ।
ठेक्का पाएको नयाँबाटो रुविना मना जेभी कन्स्ट्रक्सनले तीन जिल्लाको कतै पनि के कति काम गर्ने र कहिले सक्ने भन्ने होर्डिङ बोर्ड राखेको छैन । सस्पेन्सन बिज्र डिभिजनका अनुसार पुल निर्माण गर्न १५ करोडको इस्टिमेट भए पनि ९ करोड ८८ लाख रुपैयाँमा ठेक्का सम्झौता भएको हो । तोकिएको मितिमा काम नसकिएपछि निर्माण व्यवसायीलाई डिभिजन कार्यालयले म्याद थपेको थप्यै छ ।
डिभिजनका अनुसार पुलको बीच भागको मुख्य फाउन्डेसन सकेर पाल्पा र गुल्मीतर्फको काम अन्तिम चरणमा पुगेको छ ।
स्याङ्जातर्फको काम पनि भइरहेको छ । सुरुमा फाउन्डेसनमा केही समस्या भएको थियो । अहिले समस्या नभएको जनाएको छ । व्यवसायीले इस्टिमेटभन्दा धेरै कम मूल्यमा बिड गरेको छ । त्यसैले कामदार पठाउने गरे पनि कामलाई तीव्रता दिएको छैन । पुल निर्माण हुँदा पाल्पा र गुल्मी हिँडडुलमा समेत दुई किलोमिटर दूरी छोटो पर्छ ।
प्रकाशित : माघ २, २०७८ ०७:२६
