रेलवे कर्मचारीलाई तालिम सुरु

रेलवेका महाप्रबन्धक नीरञ्जन झाले तोक आदेशमा नियुक्त गरेका ५५ जना कर्मचारीलाई जनकपुरको मत्स्य विकास तालिम केन्द्रमा प्राविधिक तालिम दिन सुरु गरिएको छ । यसअघिका महाप्रबन्धक गुरु भट्टराईले यसैगरी तोक आदेशमा नियुक्त गरेका झन्डै दुई सय कर्मचारीमध्ये ६० जनालाई भारतीय कोंकण रेलवे कर्पोरेसनका प्राविधिकले गत वैशाखमा तालिम दिएका थिए । ती कर्मचारीको समेत हाजिर रोक्का गरी नयाँ नियुक्त गरिएका ५५ जना कर्मचारीलाई फेरि तालिम दिन थालिएको हो ।

मत्स्य विकास तालिम केन्द्रमा तालिम सुरु भएलगत्तै रेलवेका पुराना कर्मचारीले मूल ढोकाअगाडि नाराबाजी गरेका थिए । भट्टराईको पालामा नियुक्ति पाएर तालिमसमेत लिइसकेका कर्मचारीलाई पाखा लगाई नयाँ नियुक्ति गरेर आफूहरूमाथि अन्याय गरेको उनीहरूको आरोप छ ।