रेलवे कर्मचारीलाई तालिम सुरु- अर्थ / वाणिज्य - कान्तिपुर समाचार

रेलवे कर्मचारीलाई तालिम सुरु

कान्तिपुर संवाददाता

जनकपुर — लामो समयपछि जयनगर–कुर्था रुटमा रेल सञ्चालन गर्ने तयारीमा रहेको नेपाल रेलवे कम्पनीले कर्मचारी भर्ना गर्दै प्राविधिक तालिम दिन थालेको छ । जनकपुरमा बुधबारदेखि सुरु भएको तालिमलाई भने रेलवेका पूर्वकर्मचारीले भाँड्न खोजेका थिए । नेपाल रेलवे कम्पनीले झन्डै ८० लाख खर्चेर तालिम दिएका यसअघिका कर्मचारीको विरोधबीच तालिम दिन थालिएको हो ।

रेलवेका महाप्रबन्धक नीरञ्जन झाले तोक आदेशमा नियुक्त गरेका ५५ जना कर्मचारीलाई जनकपुरको मत्स्य विकास तालिम केन्द्रमा प्राविधिक तालिम दिन सुरु गरिएको छ । यसअघिका महाप्रबन्धक गुरु भट्टराईले यसैगरी तोक आदेशमा नियुक्त गरेका झन्डै दुई सय कर्मचारीमध्ये ६० जनालाई भारतीय कोंकण रेलवे कर्पोरेसनका प्राविधिकले गत वैशाखमा तालिम दिएका थिए । ती कर्मचारीको समेत हाजिर रोक्का गरी नयाँ नियुक्त गरिएका ५५ जना कर्मचारीलाई फेरि तालिम दिन थालिएको हो ।

मत्स्य विकास तालिम केन्द्रमा तालिम सुरु भएलगत्तै रेलवेका पुराना कर्मचारीले मूल ढोकाअगाडि नाराबाजी गरेका थिए । भट्टराईको पालामा नियुक्ति पाएर तालिमसमेत लिइसकेका कर्मचारीलाई पाखा लगाई नयाँ नियुक्ति गरेर आफूहरूमाथि अन्याय गरेको उनीहरूको आरोप छ ।


प्रकाशित : पुस २९, २०७८ २२:१६
प्रतिक्रिया
पठाउनुहोस्

प्रिन्सका लागि संघ सक्रिय हुने

कान्तिपुर संवाददाता

काठमाडौँ — विश्व ब्याडमिन्टन महासंघको यू–१९ वरीयताको शीर्षस्थानमा परेपछि नेपाल ब्याडमिन्टन संघले बिहीबार प्रिन्स दाहाललाई औपचारिक रूपमा बधाई दिएको छ ।

संघले भनेको छ, प्रिन्सको खेल विकासका लागि संघ थप सक्रिय रहनेछ । संघका अध्यक्ष रामजीबहादुर श्रेष्ठले विज्ञप्ति जारी गर्दै प्रिन्सलाई बढीभन्दा बढी अन्तर्राष्ट्रिय प्रतियोगितामा सहभागिता गराउन प्रयास गरिने जनाएका छन् ।

संघले प्रिन्सलाई ओलम्पिक छात्रवृत्ति मिलाउन प्रयास गर्ने बताएको छ । अहिले तत्काल प्रिन्सले एसिया ओलम्पिकअन्तर्गत वार्षिक तीन हजार डलरको छात्रवृत्ति भने प्राप्त गरिसकेका छन् । यसवापतको रकम संघमार्फत वर्षको अन्त्यमा प्राप्त हुनेछ । त्यसअगाडि संघले प्रिन्सलाई अन्तर्राष्ट्रिय सहभागिता दिलाउन खर्च गर्नेछ ।

यस्तै सघंले प्रिन्सको भविष्य र वृद्धि विकासका लागि राष्ट्रिय खेलकुद परिषद्, नेपाल ओलम्पिक कमिटी, ब्याडमिन्टन एसिया र विश्व ब्याडमिन्टन महासंघसँग सहकार्यको प्रयास गर्नेछ । नेपाली कर्पाेरेट क्षेत्रसँग पनि प्रिन्सको खेल विकासका लागि प्रायोजन अनुबन्धका लागि प्रयास गर्ने भएको छ ।


प्रकाशित : पुस २९, २०७८ २२:१०
पूरा पढ्नुहोस्
प्रतिक्रिया
पठाउनुहोस्
×