अररिया प्रशासनले दियो वीरपुर नाका प्रयोग अनुमति

भारतको बथनाहस्थित मिरगन्ज पुल भासिएपछि जोगवनी नाकाबाट हुने आयात–निर्यात शुक्रबारदेखि ठप्प छ । अररियाका सहायक प्रशासक अलवेलासहित नेपालको उद्योग मन्त्रालयका सहसचिव नारायण रेग्मी, मोरङ व्यापार संघका पूर्वअध्यक्ष पवनकुमार सारडा र वरिष्ठ उपाध्यक्ष नवीन रिजालबीच शनिबार भएको छलफलमा अररिया प्रशासनले तत्कालका लागि आयात–निर्यात गर्न वीरपुर नाका प्रयोग गर्न अनुमति दिएको हो । भारतीय पक्षले जोगवनी नाका सञ्चालनमा ढिलाइ हुने भएपछि सुनसरीको भन्टाबारी नाका पारिको वीरपुर नाका प्रयोग गर्ने सहमति दिएको हो ।

‘तर दुवै मुलुकले माथिल्लो निकायको अनुमति लिनुपर्ने प्रावधानका कारण अझै केही दिन आयात–निर्यात सुरु भइहाल्ने अवस्था छैन,’ छलफलमा सहभागी रिजालले भने ।

नेपाल पक्षबाट आइतबार मात्र माथिल्लो निकायबाट स्वीकृति आउने स्थिति छ । ‘भारतमा आइतबार बिदा हुन्छ । त्यसैले त्यहाँको माथिल्लो निकायबाट स्वीकृति लिन सोमबार पर्खनुपर्ने भएकाले अझै दुई दिन जोगवनी नाकाबाट आयात–निर्यात हुने अवस्था छैन,’ संघका वरिष्ठ उपाध्यक्ष रिजालले भने । सुनसरी मोरङ औद्योगिक क्षेत्रका उद्योगी व्यवसायीले शुक्रबार अररिया प्रशासनसमक्ष करिब १५ किमि घुमाउरो कुर्साकट्टा नाका प्रयोग गर्न दिन माग गरेका थिए । उक्त नाकामा पर्ने सडक साँघुरो भएकाले साना मालवाहक गाडी मात्र गुड्न सक्ने भएपछि यसअघि पनि वैकल्पिक मार्गका रूपमा वीरपुर मार्ग प्रयोग गर्न अररिया प्रशासन सहमत भएको रिजालले बताए ।