प्रदेश र स्थानीय तहका स्टार्टअपलाई सघाउन साझेदारी कोष- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

प्रदेश र स्थानीय तहका स्टार्टअपलाई सघाउन साझेदारी कोष

कोषबाट एकल आवेदकलाई डेढ करोड र संयूक्तलाई ४ करोडसम्मको सहयोग हुने
कान्तिपुर संवाददाता

काठमाडौँ — सुशासन, सार्वजनिक सेवा प्रवाह र स्थानीय आवश्यकताको क्षेत्रमा नवप्रवर्तन (स्टार्टअप)लाई प्रवद्र्धन गर्ने उदेश्यले सरकारले ‘नवप्रवर्तन साझेदारी कोष कार्यान्वयन निर्देशिका, २०७८’ लागू गरेको छ । संघीय मामिला तथा सामान्य प्रशासन मन्त्रालयले एक सूचना जारी गर्दै निर्देशिका लागू गरिएको जनाएको हो । 

नवप्रवर्तन साझेदारी कोषका माध्यमबाट प्रदेश तथा स्थानीय तहको सह–लगानीमा नविनतमा परियोजनाहरू सञ्चालन गर्ने निर्देशिकामा उल्लेख छ । ‘स्थानीय आर्थिक विकासको प्रवर्द्धनका निमित्त नवप्रर्वतनको अवधारणालाई संस्थागत गर्ने विशेष उद्देश्य लिएर कोष संगठित हुनेछ,’ निर्देशिकामा कोषको कामबारे भनिएको छ, ‘नवप्रवर्तनकारी योजना कार्यान्वयन गर्ने क्षमता विकास गर्न आफूलाई स्थापित गर्दै जोखिम वहन कोषका रूपमा स्थानीय तहलाई सहयोग गर्नेछ ।’

निर्देशिकामा कोषमार्फत् नविनतम परियोजना सञ्चालनका लागि प्रदेश कार्यक्रम कार्यान्वयन इकाईले अवधारणा पत्र पेश गर्न सूचना आह्वान गरेपछि आवेदकले अवधारणा बुझाउनुपर्ने भनिएको छ । कार्यक्रम सञ्चालनको लागि प्रदेशगत रूपमा राष्ट्रिय कार्यकारी समितिले विनियोजन गरे बमोजिम हरेक प्रदेशलाई नेपाल सरकारको कोष प्रवाह सम्बन्धी व्यवस्था अनुसार रकम निकासा गरिने जनाइएको छ ।

स्थानीय तह, सामुदायिक संस्था, गैरसरकारी संस्था, सहकारी तथा निजी क्षेत्रसँगको लागत साझेदारीमा परियोजना पेश गर्दा कति प्रतिशत साझेदारी गर्ने भनी निर्देशिकाले तोकिदिएको छ । कोषबाट उपलब्ध हुने अनुदान रकमको अधिकत सीमा भने एकल आवेदकको हकमा प्रतिपरियोजना एक करोड पचास लाख रुपैयाँ र दुई वा दुईभन्दा बढी स्थानीय तह मिली प्रस्ताव गरिएको संयुक्त आवदेकको हकमा चार करोड रुपैयाँ हुने निर्देशिकामा उल्लेख छ ।

कोषबाट सञ्चालन हुने परियोजनाको अवधि दुई आर्थिक वर्ष हुने व्यवस्था गरिएको छ । कोषबाट प्राप्त रकमहरू सडक, पुल, सिँचाइजस्ता पूर्वाधार निर्माण, कर्मचारी खर्च, सवारी साधन खरिद, राहत वितरणजस्ता कार्यक्रममा खर्च गर्न नपाइने भनिएको छ । स्थानीय/प्रदेश तहहरूबीच, स्थानीय तहहरू एक–अर्काबीच एवम् स्थानीय तह र निजी क्षेत्रबीच सहकार्य र सहलगानी गरी नवप्रवर्तनलाई प्रवद्र्धन गर्ने उद्देश्यले निर्देशिका कार्यान्वयनमा ल्याएको उल्लेख छ ।


प्रकाशित : पुस १५, २०७८ १९:०९
प्रतिक्रिया
पठाउनुहोस्

प्रदेशस्तरीय महिला फुटबल उपाधि झापालाई

लक्ष्मी गौतम

पाँचथर — पाँचथरको रानीटारमा आयोजित प्रदेशस्तरीय महिला गोल्डकप प्रतियोगिताको उपाधि बिर्तामोड फुटबल क्लब झापाले जितेको छ ।

रानीटारको बराजु रंगशालामा बिहीबार अपराह्न भएको अन्तिम प्रतिस्पर्धामा द सेभेन युथ क्लब धनकुटालाई १–० गोलअन्तरले हराउँदै झापाले उपाधिमाथि कब्जा जमाएको हो । खेलको ३६ औं मिनेटमा झापाका तर्फबाट कुशुम खतिवडाले गरेको गोल नै निर्णायक बन्न पुग्यो । कुशुमले फ्रि-किकबाट आएको बल कब्जामा लिएर पोस्टतर्फ प्रहार गर्दा गोल भएको थियो ।

विजेता झापाले नगद ५० हजार र उपविजेता धनकुटाले ३० हजार रुपैयाँसहित ट्रफी मेडल र प्रमाण पत्र पाएका छन् ।

'तमु ल्होछार एक नम्बर प्रदेशस्तरीय महिला फुटबल' नाम दिइएको प्रतियोगिता पुस १२ गते सुरु भएको थियो । खेलमा ८ टिम सहभागी थिए ।

प्रकाशित : पुस १५, २०७८ १८:४४
पूरा पढ्नुहोस्
प्रतिक्रिया
पठाउनुहोस्
x
×