७ वर्षसम्म अड्केको रेल्वेको काम बल्ल अघि बढ्यो - अर्थ / वाणिज्य - कान्तिपुर समाचार

७ वर्षसम्म अड्केको रेल्वेको काम बल्ल अघि बढ्यो 

ट्रयाक र स्टेसनको जग्गा छुट्याउँदै रेल विभाग 
सुनिता बराल

महोत्तरी — ७ वर्षसम्म जग्गाको मुआब्जा टुङ्गो नलाग्दा रोकिएको जयनगर–बर्दिबास रेल्वेको काम बल्ल अघि बढेको छ । सरकारले मुआब्जा निर्धारण गरेपछि बर्दिबासमा रेल्वे विभाग र नापीले जग्गा छुट्टाउने काम सुरु गरेका छन् ।  लामो समय जग्गाको मुआब्जा टुङ्गो नलाग्दा ७ वर्ष पहिले गरिएको सर्भेको सेन्ट्रल लाइन नै मेटिइसकेकाले पुन त्यसैबाट काम थालिएको रेल्वेको प्राविधिक टोलीले जनाएको छ ।

मुआब्जामा कुरा नमिल्दा र लामो समय रेल्वेले जग्गा नलिँदा कतिपय जग्गाधनीले सिमाना मेटाउने र किला उखेल्ने गरेकाले प्राविधिक टोलीले सुरुदेखि नै काम गर्नुपरेको जयनगर- जनकपुर रेल कार्यालयका साइट इन्जिनियर विनोद ओझाले जानकारी दिए । बर्दिबासमा रेल्वेको २ वटा सेन्ट्रल प्वाइन्ट नभेटिएको र पत्ता लगाउने काम भैरहेको ओझाले बताए । सेन्ट्रल लाइन भेटिएपछि दायाँ बायाँ कति जग्गा लाग्छ र क–कसको जग्गा कति पर्छ भनेर छट्याइने उनको भनाइ छ । भंगाहा, किसाननगर र आदर्श बेगाडाबरमा काम सकिसकेकाले अबको १५ दिनमा बर्दिबासमा पनि जग्गा छुट्टाउने काम सकिने ओझाले बताए । भारतीय रेल्वे निर्माण कम्पनी इरकान इन्टरनेसनल, नेपालको रेल्वे कम्पनी र नापी कार्यालय बर्दिबासको प्राविधिक सहितको टोलीले अहिले जग्गा छुट्याउने काम गरिरहेको छ ।

बर्दिबास रेल्वे स्टेसनमा परेको जग्गा खेतीयोग्य भएकाले खोला पस्दा र खेती लगाउने क्रममा आली सर्दा यस क्षेत्रमा फेरि उपकरण प्रयोग गरी जग्गा नापिने नापी कार्यालय बर्दिबासका प्रमुख रामचन्द्र पण्डितले जानकारी दिए । नापी कार्यालय बर्दिबासबाट नियमित २ जना र आवश्यक पर्दा अन्य कर्मचारी पनि काममा खटाइएको पण्डितले बताए । बर्दिबासबाट भंगाहा तर्फको रेल्वे लिकमा पर्ने जग्गाको नापी सकेर रिपोर्ट बनाउने काम भैरहेको छ । बर्दिबासको पनि नापी सकिनासाथ रिपोर्ट तयार पारेर रेल्वेलाई बुझाउने पण्डितले बताए ।

जिल्लास्थित मुआब्जा निर्धारण समितिले गत भदौ २ गते बर्दिबासको रेल्वे लिक र स्टेसनमा पर्ने जग्गाको मुआब्जा निर्धारण गरेको थियो । सरकारले तोकेको मुआब्जामा आफूहरुको असन्तुष्टि रहे पनि अब समयमै मुआब्जा वितरण गरी काम अघि बढाओस् भन्ने पक्षमा रहेको बर्दिबास १४ का स्थानीय जन्नुलाल महतोले बताए । जयनगर बर्दिबास ६९ किलोमिटर रेलवे निमार्णको काम मुआब्जा विवादपछि भंगाहाको बिजलपुरा स्टेसनमै रोकिएको थियो । अब केही महिनाभित्रै मुआब्जा वितरण सकेर बिजलपुराबाट बर्दिबास तर्फको काम सुरु गरिने नेपाल रेल्वे कम्पनीले जनाएको छ ।

माघको पहिलो हप्ताबाटै मुआब्जा वितरण सुरु गर्नेगरी काम गर्छाैं भनी रेल विभागको सर्भे टोलीले आफूहरुलाई आश्वासन दिएकाले मुआब्जा वितरणको काम अब छिट्टै सुरु हुने मुआब्जा निर्धारण समितिका संयोजक तथा महोत्तरीका प्रमुख जिल्ला अधिकारी बासुदेव दाहालले जानकारी दिए । रेल विभागले गरिरहेको काममा जिल्ला प्रशासनको सहकार्य र समन्वय रहेकाले सहयोग गर्दै कामलाई अब द्रुत गतिमा अघि बढाउने दाहालले बताए ।

बर्दिबासबाट भंगाहातर्फ मुआब्जामा समस्या नरहेको भएपनि बर्दिबासको मुआब्जा विवादले काम अघि बढेको थिएन । जयनगर–बर्दिबास रेल्वेको लिक र जयनगर–बर्दिबास तथा पूर्व –पश्चिम रेलमार्गको साझा स्टेसन रहेको बर्दिवासको करिब ५९ विघा जग्गाका डेढ सय घरपरिवारलाई मात्रै सरकारले २ अर्ब ३० करोड बराबर मुआब्जा वितरण गर्नेछ ।

७ वर्षदेखि मुआब्जा नटुङ्गिँदा जयनगर बर्दिबासको काम भंगाहामा रोकिएको छ भने पूर्व पश्चिम रेलमार्गको काम भप्सी खोलाबाट पूर्व बर्दिबासतर्फ अघि बढ्न सकेको छैन । अब मुआब्जा वितरण सकेर रेल्वेको काम अघि बढाइने र ४ वर्षभित्र बर्दिवासमा रेल आउनेगरी काम गरिने रेल्वेका साइट इन्जिनियर ओझाले बताए ।


प्रकाशित : पुस ९, २०७८ १३:५६
प्रतिक्रिया
पठाउनुहोस्

महोत्तरीमा एकै दिन ९ हजार बालबालिकाले लगाए मोडर्ना खोप

सुनिता बराल

महोत्तरी — महोत्तरीमा एकै दिन ९ हजार बालबालिकाले कोभिड–१९ विरुद्धको मोडर्ना खोप लगाएका छन् । बुधबार सुरु भएको खोप अभियानको पहिलो दिन नै ९ हजार १ सय ४२ जनाले खोप लगाएको जिल्ला स्वास्थ्य कार्यालय महोत्तरीले जनाएको छ ।


महोत्तरीका ४६ वटा खोप केन्द्रबाट ४ हजार ३ सय बालक र ४ हजार ८ सय ४२ बालिकाले बुधबार मोडर्ना खोप लगाएको जिल्ला स्वास्थ्य कार्यालय महोत्तरीका खोप अधिकृत लक्ष्मेश्वर झाले जानकारी दिए ।

जिल्लाको स्वास्थ्य टोली खोप लिएर महोत्तरीका विभिन्न विद्यालयमै पुगेर खोप अभियान संचालन गरिरहेको झाले बताए । नियमित खोप संचालन गरिने केन्द्रहरूमा जान बालाबालिकालाई समस्या हुने भएकाले विद्यालयमै गएर बालबालिकालाई खोप लगाइएको स्वास्थ्यकर्मीले बताएका छन् ।

बर्दिवास नगरपाकिलाभित्रका विभिन्न सामुदायिक र निजी विद्यालयमा गएर खोप अभियान चलाउँदै एक दिनमै बर्दिवास नगरभित्रका मात्रै २ हजार ७ सय २८ बालबालिकाले खोप लगाएको स्वास्थ्यकर्मी रामबाबु यादवले बताए ।

हाल जिल्लाको उत्तरी क्षेत्रका बर्दिवास, गौशाला, भंगाहा, रामगोपालपुर, औरही नगरपालिका र सम्सी सोनामा गाउँपालिकामा खोप अभियान चलिरहेको छ । ११ गतेसम्म यी पालिकामा खोप अभियान चल्ने र १४ गतेदेखि जिल्लाका अन्य पालिका जलेश्वर,लोहारपट्टी, मनराशिसवा, मटीहानी, बलवा, पिपरा, महोत्तरी र एकडारामा १८ गतेसम्म खोप अभियान संचालन गरिने खोप अधिकृत झाले जानाकारी दिए ।

२०६१ मंसिरदेखि ०६६ मंसिरसम्म जन्मिएका १२ देखि १७ वर्षसम्मका बालबालिकाले यो खोप लगाइरहेका छन् । जिल्लामा ८५ हजार २ सय खोप उपलब्ध रहेको र अरु १२ हजार खोप अपुग हुने देखिएको खोप अधिकृत झाले बताए । बिहीबार पनि महोत्तरीका ४६ वटै खोपकेन्द्रबाट खोप अभियान चलिरहेको स्वास्थ्य कार्यालयले जनाएको छ ।

प्रकाशित : पुस ८, २०७८ १५:०३
पूरा पढ्नुहोस्
प्रतिक्रिया
पठाउनुहोस्
×