हरियो तरकारीमा अचाक्ली मूल्यवृद्धि
सुनसरी — कात्तिकको पहिलो साता आएको बेमौसमी वर्षाका कारण पूर्वमा यतिबेला हरियो तरकारी र फलफूलको मूल्य अचाक्ली बढेको छ । धरानस्थित कृषि उपज बजार व्यवस्थापक लक्ष्मण भट्टराईका अनुसार बेमौसमी वर्षाले फलफूल तथा तरकारी उत्पादनमा असर परेकाले मूल्य बढेको हो ।
पहाड र तराईका किसानले कात्तिक, मंसिर र पुस महिनामा बिक्री गर्नेगरी गरेको खेतीमा बेमौसमी वर्षाका कारण असर पर्यो, अहिले त्यसैको असर मूल्यमा परेको उनले बताए । ‘बेमौसमी वर्षाको असरले विगतका वर्षमा भन्दा अहिले उपभोक्ताले दोब्बर मूल्य खर्चेर तरकारी किन्नु पर्ने अवस्था आएको छ’ भट्टराईले भने । सुख्खाजन्य तरकारीको मूल्यमा भने गत वर्षको तुलनामा खासै फरक नपरेको उनले बताए । धरानको कृषि उपज बजारमा दैनिक एक सय मेट्रिक टन बराबर हरियो तरकारीको कारोबार हुने गरेको छ ।
फलफूल तरकारीका खुद्रा व्यवसायी विन्देश्वर चौधरी भन्छन् ‘बर्सेनि किलोमा पाँच-सात रुपैयाँ बढ्नु सामान्य हो, तर यसपटक झण्डै दोब्बर मूल्य भएको छ ।’ उनका अनुसार गत वर्षको तुलनामा मटरकोसामा प्रतिकेजी ३० रुपैयाँले वृद्धि भएको छ । गत वर्ष यही सिजनमा टमाटरको थोक मूल्य प्रतिकेजी ५५ देखि ६० रुपैयाँ थियो । तर यो वर्ष थोक मूल्यमै सय रुपैयाँ पुगेको छ । खुद्रा मूल्य १ सय २० भन्दा बढी पुगेको छ । काउलीको मूल्य गत वर्ष ३५ रुपैयाँ हाराहारी थियो भने यो वर्ष ६० रुपैयाँ पुगेको छ ।
धरान–१५ फुलबारीमार्गकी कोपिला कुलुङले विगतका वर्षमा १ सय रुपैयाँको तरकारी किन्दा पुग्ने गरे पनि अहिले दैनिक २ सय रुपैयाँ खर्च हुने गरेको बताइन् । ‘हरियो सागसव्जी, फलफूल तरकारी किनेर खान नसकिने अवस्था भयो । ५/६ जनाको परिवारलाई विहान र बेलुकाको तरकारीका लागि मात्र दैनिक २ सय रुपैयाँ बढी खर्च हुँदा धान्नै गाह्रो भयो ।’
फलफूल तरकारीको मूल्य करिव दोब्बर भइदिँदा अतिरिक्त आर्थिक भार बढेको र बचत समेत हुन छाडेको धरान–१९ चौकीबारी बस्ने उर्मिला लिम्बुले बताइन् । उनले भनिन्, ‘तरकारी बजारमा घिउसिमी, बोडी, टमाटर, बन्दा, प्याज, एक–एक केजी र एक मुठा साग किन्नलाई ५ सय रुपैयाँले पुग्दैन ।’ उनले विगत वर्षहरूमा बन्दाको मूल्य प्रतिकेजी १० रुपैयाँमै पाइने गरेको तर यो सिजनमा ४० रुपैयाँसम्म दिएर किन्नु परेको बताइन् । यतिबेला धनियाको मूल्य झनै उच्च छ । सय ग्राम बराबर हरियो मुठाको धनिया गत वर्षभन्दा चार गुणाले वृद्धि भएको छ । गतवर्ष २०–२५ रुपैयाँमा किनेर खाएको धनिया यो सिजनमा सय रुपैयाँ पुगेको उनले बताए ।
धरानस्थित कृषि उपज बजारबाट प्राप्त विगत दुई आर्थिक वर्ष र यसै मंसिर पहिलो सातामा हरियो तरकारीको औसत मूल्यसूची
(प्रति केजीमा)
तरकारी | तरकारीको मूल्य २०७६ | तरकारीको मूल्य २०७७ | तरकारीको मूल्य २०७८ | |
टमाटर | ४५ | ६० | १०० | |
काउली | ३० | ३५ | ६० | |
साग | २५ | २८ | ४० प्रतिमुठा | |
बन्दा | १५ | १८ | २६ | |
सिमी | ५० | ५५ | ७० | |
घिउसिमी | ६० | ६५ | ११० | |
चुच्चेकरेला | २८ | ३० | ४० | |
सुन्तला | १०० | १०५ | १२५ | |
अकबरे खुर्सानी | ३०० | ३५० | २०० (घटेको) | |
अदुवा | ६० | ५० | २२ (घटेको) | |
तेजपता | ६० | ५५ | ४५ |