सशस्त्र र नेपाल प्रहरीका भान्सामा ग्यास हटाएर इन्डक्सन चुलो राख्ने तयारी- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

सशस्त्र र नेपाल प्रहरीका भान्सामा ग्यास हटाएर इन्डक्सन चुलो राख्ने तयारी

कान्तिपुर संवाददाता

काठमाडौँ — नेपाल प्रहरी र सशस्त्र प्रहरी बलको भान्सामा एलपी ग्यास हटाएर विद्युतीय चुलो राख्न सरकारले प्रक्रिया अगाडि बढाएको छ । ऊर्जा, जलस्रोत तथा सिँचाई मन्त्रालयले बुधबार यी निकायका उच्च अधिकारीहरूसँग छलफल गर्दै ग्यासलाई इन्डक्सनले विस्थापित गर्ने कार्ययोजनाको कार्यान्वयन प्रक्रिया अघि बढाउन भनेको हो ।

ऊर्जामन्त्री पम्फा भुसालको सचिवालय स्रोतका अनुसार बुधबारको छलफलमा सशस्त्र प्रहरीका एआइजी रामशरण पौडेल, नेपाल प्रहरीका एसएसपी फणिन्द्र बराल र नेपाल विद्युत् प्राधिकरणका कार्यकारी निर्देशक कुलमान घिसिङ सहभागी थिए । छलफलका क्रममा विद्युत् खपत तथा वातावरण संरक्षणका लागि स्वच्छ ऊर्जाको प्रयोग बढाउन नेपाल प्रहरी र सशस्त्र प्रहरीका ब्यारेकमा कसरी विद्युतीय उपकरणको प्रयोग बढाउन सकिन्छ भनेर राय सुझाव लिइएको थियो ।

‘मुख्यगरी विद्युत् लाइन नभएका ठाउँमा पूर्वाधार संरचना बनाइदिने, इन्डक्सन चुलो राख्नका लागि लाग्ने खर्चमा केही प्रतिशत अनुदान दिने र महशुल भुक्तानी प्रणालीलाई सहज बनाउने विषयमा छलफल भएको हो,’ सचिवालय स्रोतले भन्यो ।

अहिले सुरक्षा निकायका भान्सामा दाउरा विस्थापन गरी ग्यास प्रयोग हुँदै आएको छ । बुधबार मन्त्रालयसँगको छलफलका क्रममा सशस्त्र प्रहरीको भान्सामा वार्षिक १० करोड रुपैयाँ र नेपाल प्रहरीको भान्सामा वार्षिक ५० करोड रुपैयाँ बराबर ग्यासमा खर्च हुने गरेको विवरण बुझाइएको छ । देशभर सशस्त्र प्रहरीका १ सय ९ वटा युनिट छन् । ग्यासलाई विद्युतले प्रतिस्थापन गर्ने सरकारको नीतिअनुसार सबै ब्यारेकमा इन्डक्सन चुलो प्रयोगका लागि आवश्यक प्रक्रिया अगाडि बढाउन भनिएको हो ।

इन्डक्सन चुलो किन्नका लागि कुनै बजेट शीर्षकबाट गृह मन्त्रालयले ५० प्रतिशत अनुदान उपलब्ध गराउन सकिनेबारे पनि छलफल भएको जनाइएको छ । सुरक्षा निकायमा खपत हुने ग्यासलाई विद्युतले कसरी प्रतिस्थापन गर्न सकिन्छ भनेर विस्तृत अध्ययनसहितको सुझाव दिनका लागि कार्यदल गठन गर्ने निर्णय मन्त्रालयले गरेको छ । उक्त कार्यदलमा गृह, ऊर्जा मन्त्रालय, नेपाल विद्युत् प्राधिकरण र सुरक्षा निकायको प्रतिनिधित्व हुनेछ ।

त्यसैगरी, सेना र प्रहरीको ब्यारेकमा प्रयोग हुने वासिङ मेसिन, एसी, हिटरलगायत विद्युतीय सामग्रीमा हुने खपत महशुल पुनरावलोकन गर्नेबारे पनि बुधबार छलफल भएको जनाइएको छ । ग्यासलाई इन्डक्सनले प्रतिस्थापन गर्ने विषयमा मन्त्रालयले नेपाली सेनासँग पनि छलफल गर्ने तयारी गरेको छ भने बिहीबार नेपाल राष्ट्र बैंकसँग छलफलका लागि बैठक बोलाएको छ ।

प्रकाशित : मंसिर ९, २०७८ १२:२४
प्रतिक्रिया
पठाउनुहोस्

राप्रपालाई बचाउन हामीले उम्मेदवारी दिएका हौं : लिङ्देन

'राजेन्द्र लिङ्देनहरूले यो कदम नउठाउने हो भने राप्रपा समाप्त हुन्छ । उहाँहरू (कमल थापा, पशुपतिशमशेर जबरा र प्रकाशचन्द्र लोहनी)को पनि समाप्त हुन्छ । अनि कहाँको राजसंस्थाको पुनःस्थापना कहाँको हिन्दुराष्ट्र ?'
कान्तिपुर संवाददाता

काठमाडौँ — राष्ट्रिय प्रजातन्त्र पार्टी(राप्रपा) का एक मात्र सांसद राजेन्द्रप्रसाद लिङ्देनले पार्टीलाई बचाउनका लागि उम्मेदवारी दिएको बताएका छन् । उनले राप्रपा अध्यक्षमा आफ्नो उम्मेदवारी घोषणा बाध्यता भएको बताएका छन् । कि राप्रपाको समाप्ति रोज्नुपर्ने कि बाध्यात्मक रूपमा अगाडि बढ्नुपर्ने विकल्पमध्ये दोस्रो विकल्प रोज्नुपरेको लिङ्देनले बताए । 

अध्यक्षको उम्मेदवारी घोषणा गर्न बिहीबार आयोजित पत्रकार सम्मेलनमा सांसदसमेत रहेका लिङ्देनले भने, 'यो बाध्यकारी कदम हो । कि त हामीले समाप्ति रोज्नुपर्ने थियो कि यो कदम उठाउनुपर्ने थियो ।'

राप्रपाले उठाउँदै आएको राजतन्त्र पुनःस्थापना र हिन्दुराष्ट्र स्थापनाको मुद्दाका लागि पनि आफूले पार्टी अध्यक्षमा उम्मेदवारी घोषणा गरेको लिङ्देनले बताए । 'राजेन्द्र लिङ्देनहरूले यो कदम नउठाउने हो भने राप्रपा समाप्त हुन्छ । उहाँहरू (कमल थापा, पशुपतिशमशेर जबरा र प्रकाशचन्द्र लोहनी)को पनि समाप्त हुन्छ । अनि कहाँको राजसंस्थाको पुनःस्थापना कहाँको हिन्दुराष्ट्र ?,' उनले तीनजना नै अध्यक्षलाई आग्रह गर्दै भने, 'तपाईहरूको विरासतलाई जोगाएर लान्छौं । अभिभावकीय भूमिकामा बस्नुहोस् । राप्रपाका कार्यकर्तालाई अप्ठ्यारोमा नपार्नुस् ।'

राप्रपा महामन्त्रीमा धवलशम्शेर राणाले उम्मेदवारी दिने घोषणा गर्दै लिङ्देनले आफूहरूले राप्रपामा विद्रोह पनि नगरेको र अध्यक्षत्रयविरुद्ध पनि नउभिएको बताए । 'न यो विद्रोह हो न यो तपाईंहरू विरुद्धको उम्मेदवारी हो । राप्रपाको भविष्यलाई सुनिश्चित गर्नका लागि हो । हाम्रो यो कदमले राप्रपालाई अप्ठ्यारो पार्दैन । बलियो बनाउँछ, सुदृढ बनाउँछ ।'

थापा, जबरा र लोहनीविरुद्ध उठ्न कसैले आँट नगरिरहेको अवस्थामा आफू अगाडि बढेको लिङ्देनको भनाइ थियो । आफूहरूले अहिलेसम्म अध्यक्षत्रयको आदेश मानेको तर अब आफै अगाडि बढ्नुपर्ने अवस्था आइलागेको उनको प्रष्टोक्ति थियो । 'सधैंभरी कारिन्दाको रूपमा हामीलाई लगाएको काम गरिरहेका थियौं । अह्राएको काम गरिरहेकाले अध्यक्ष उठ्छौं भनेपछि अलि असहज भएको होला । उपछि उहाँहरू पनि खुसी हुनुहुनेछ,' उनले भने ।

पार्टीको वर्तमान नेतृत्वलाई सहज रूपमा नेतृत्व हस्तान्तरण गर्न र अभिभावकीय भूमिकामा रहन पनि लिङ्देनले आग्रह गरेका छन् । पार्टीमा सबै पक्षलाई समेटेर अगाडि बढ्ने लिङ्देनको भनाइ थियो ।

प्रकाशित : मंसिर ९, २०७८ १२:१६
पूरा पढ्नुहोस्
प्रतिक्रिया
पठाउनुहोस्
×