उब्रिएको कपडाबाट मास्क बनाउने ज्ञानशोभा- अर्थ / वाणिज्य - कान्तिपुर समाचार

उब्रिएको कपडाबाट मास्क बनाउने ज्ञानशोभा

कान्तिपुर संवाददाता

काठमाडौँ — ललितपुर, पाटनकी ज्ञान शोभा बज्राचार्यले १८ वर्ष हुँदा नै बुटिकको काम सुरु गरिन् । अहिले उनी ५८ वर्ष भइन् ।

२० वर्षदेखि पाटनको गाबहालमा आफ्नै लगानीको ‘बसुन्धारा क्रिएसन’ चलाइरहेकी छन् । जहाँ ग्राहकले कपडा सिलाउन ल्याउँछन् । सिलाएर बाँकी रहेको कपडाको थुप्रो धेरै हुन्थ्यो । यस्तो कपडालाई कसरी प्रयोगमा ल्याउने भनेर उनले उपाय निकालिन्– मास्क बनाएर बिक्री गर्ने ।

हाल उनले त्यस्ता कपडाबाट मास्क, रोटी पट, डुअर म्याट, प्याड, हेयर ब्यान्ड, मेकअप बक्स, वासिङ मेसिन कभर बनाएर बिक्री गर्छिन् । कुनै सामान बनाइसकेपछि बाँकी रहेको कपडा फ्याक्नुपर्दा उनलाई माया लाग्छ । हाल उनले एउटा मास्क सय रुपैयाँमा मात्र बिक्री गर्छिन् । काम सिक्न चाहने अरुलाई पनि सिकाउँछिन् । यो काम नाफाको दृष्टिकोणले मात्रै नगरेको उनी सुनाउँछिन् । फालिएका कपडाबाट आफैले प्रयोग गर्न मिल्ने अन्य सामान बनाउन सकिन्छ भन्ने सन्देश दिन खोजेको उनले बताइन् ।

प्रकाशित : मंसिर ६, २०७८ १८:२५
प्रतिक्रिया
पठाउनुहोस्

विवाद भएपछि कांग्रेस रुपन्देही क्षेत्र नम्बर ३ को मतदान स्थगित

मतदान प्रक्रिया अघि बढाउन देउवा पक्षको माग
माधव ढुंगाना

भैरहवा — मतदानको विषयलाई लिएर दुई पक्षबीच विवाद हुँदा कांग्रेस रुपन्देहीको प्रतिनिधि सभा क्षेत्र नम्बर ३ को मतदान प्रक्रिया स्थगित भएको छ ।


अपरान्ह ५:४५ बाट मतदान प्रक्रिया सुरु भएपछि क्षेत्रीय कमिटीका सभापति पदका उम्मेदवार मातृकाप्रसाद यादवसहितको समूहले मतदान ढिलो भएको भन्दै बहिष्कार गर्दै मतदानस्थलबाट बाहिरिएको थियो । साँझबाट मतदान गर्दा रातिसम्म हुने अबेरसम्म हुने र सुरक्षा हुन नसक्ने जनाउँदै बहिष्कार गरेको हो । उक्त समूह रामचन्द्र पौडेल पक्ष हो ।

बहिष्कार गरेलगत्तै निर्वाचन मण्डलले एक पक्षीयरुपमा मतनदान गराउन उपयुक्त नहुने भन्दै स्थगित गरेको छ । यद्यपि त्यतिन्जेल ५० वटा मत खसिसकेको थियो । देउवा पक्षले भने मतदान प्रक्रिया अघि बढाउन माग गरिरहेको छ । मतदान सुचारु राख्नु पर्ने भन्दै मतदानस्थलमा नाराबाजी जारी छ ।

देउवा पक्षले सोमबार नै मतदान गर्ने भनेर मुचुल्कामा हस्ताक्षर गरेपछि बहिष्कार गरेको आरोप लगाएको छ । प्रमुख निर्वाचन अधिकृत जीवनारायण अधिकारीले एक पक्षले बहिष्कार गरेर गएपछि अनिश्चितकालका लागि निर्वाचन प्रक्रिया रोकिएको बताए । उनले भने, 'निर्वाचनका लागि मुचुल्कामा हस्ताक्षर गरेपछि पनि ढिलो गरी सुरु भयो भनेर एक पक्ष हिँडेपछि हामीले स्थगित गरेका हौं । ' दुवै पक्षले पत्रकार सम्मेलन गरी एकअर्कालाई दोषारोपण गरेका छन् ।

प्रकाशित : मंसिर ६, २०७८ १८:१४
पूरा पढ्नुहोस्
प्रतिक्रिया
पठाउनुहोस्
×