वीरगन्ज भन्सारको घट्यो राजस्व- अर्थ / वाणिज्य - कान्तिपुर समाचार

वीरगन्ज भन्सारको घट्यो राजस्व

कान्तिपुर संवाददाता

पर्सा — वीरगन्ज भन्सार कार्यालयको कात्तिकको राजस्व घटेको छ । कार्यालयले मासिक लक्ष्यअनुसार राजस्व संकलन गर्न नसकेको हो । यो भन्सारले कात्तिकमा मासिक लक्ष्यको ९७ दशमलव २ प्रतिशत मात्र राजस्व संकलन गरेको छ ।

उक्त महिनामा १७ अर्ब ५४ करोड ९७ लाख ५९ हजार रुपैयाँ राजस्व संकलनको लक्ष्य पाएकोमा १७ अर्ब ५ करोड २१ लाख ८० हजार रुपैयाँ उठाएको हो ।

पर्व बिदाको कारण झण्डै ५ दिन भन्सार कार्यालय बन्द भएपछि लक्ष्य अनुरुप राजस्व असुली हुन नसकेको प्रमुख भन्सार अधिकृत हरिहर पौडेलले जानकारी दिए । चालु आर्थिक वर्षको पहिलो चौमासिक अर्थात कात्तिकसम्म यो भन्सारले ६५ अर्ब ११ करोड ४१ लाख लक्ष्य पाएकोमा ७० अर्ब १२ करोड १४ लाख असुली गरेको छ । जुन लक्ष्य भन्दा ८ प्रतिशतले बढी हो ।

यस अवधिमा यो भन्सार नाकाबाट इन्धन, नयाँ सवारी साधन, औद्योगिक कच्चा पदार्थ आदि बढी आयात भएका छन् । त्यसैगरी, भटमासको तेल, जुस, पिना, सूर्यमुखीको तेल, सेन्थेटिक यार्न, स्पोर्टस जुत्ता आदि भारत तथा तेस्रो मुलुक तर्फ निकासी भएका छन् । गत वर्षको जस्तो लकडाउन वा अन्य कुनै बाधा अवरोध नभए वार्षिक राजस्व असुली लक्ष्य पनि भेट्टाइने पौडेलले दाबी गरे । यो मुलुककै सर्वाधिक राजस्व संकलन गर्ने भन्सार हो ।

प्रकाशित : मंसिर ५, २०७८ ०९:५९
प्रतिक्रिया
पठाउनुहोस्

ताप्लेजुङमा टुंगो लागे एमाले प्रतिनिधि

कान्तिपुर संवाददाता

ताप्लेजुङ — १० औं राष्ट्रिय महाधिवेशनका लागि नेकपा एमाले ताप्लेजुङले शनिबार प्रतिनिधिको टुंगो लगाएको छ । कात्तिक ३० मा पार्टी सदस्यलाई मतदान गराएको एमालेले ५ दिनपछि गणना सक्दै प्रतिनिधिको टुंगो लगाएको हो ।

जिल्ला संयोजक बलबहादुर साम्सोहाङ र सहसंयोजक भूपेन्द्र थेबे आ–आफ्नो समूह बनाएर निर्वाचनमा होमिएका थिए ।

निर्वाचनबाट थेबे समूहका अधिकांश विजयी भएका छन् । खुलातर्फको ८ पदमा थेबेसहित उनको समूहका दीपेन पोमु, छत्रपति प्याकुरेल, आशिष केदेम, ओङिद शेर्पा र गोपाल थोप्रा विजयी भएका छन् भने साम्सोहाङ समूहका साम्सोहाङ र डम्बरध्वज तुम्बाहाम्फे विजयी भएका छन् । खुलामा १६ जना प्रतिस्पर्धामा थिए । दलितको एक कोटामा थेबे समूहकै मनकुमार नेपाली विजयी हुँदा ४ महिला प्रतिनिधिमा पनि थेबे समूहकै भीमाकुमारी ओझा, मीनाकुमारी केदेम, टीकादेवी दाहाल र उर्मिला थेबे विजयी भएका छन् । महिलातर्फ साम्सोहाङ समूहकी एकमात्र उम्मेदवार निर्मला इजम पराजित भएकी हुन् ।

निर्वाचनमा दुवै उम्मेदवारले आफ्नो क्षेत्रमा भने पकड देखाएका थिए । एक पक्षले अर्कोलाई शून्य हुने गरी मतदान गराएको स्वयं नेताहरू बताउँछन् । थेबेको निवास रहेको सिरिजंगा गाउँपालिकाबाट सुरु गरिएको गणनाबाटै थेबे समूहले अग्रता लिएको थियो । साम्सोहाङको निवास रहेको पाथीभरा याङवरक र तुम्बाहाम्फेको निवास रहेको मेरिङदेन पुग्दा साम्सोहाङ समूह थेबे समूहको हाराहारीमा आएको थियो । फुङलिङ नगरपालिकामा समेत थेबे समूह हाबी भएपछि नतिजा थेबे समूहमै देखिएको हो ।

आफ्नै निवास रहेको फुङलिङ नगरपालिका र आठराई त्रिवेणी गाउँपालिकाको गणनापछि जिल्ला समन्वय समितिका संयोजक धनेन्द्र मादेन भने पराजित भएका छन् । नगरपालिकाको गणना हुनुअघिसम्म मादेन सातौं र थोप्रा नवौं नम्बरमा थिए । गणना सकिँदा थोप्रा आठौंमा अटाए र मादेन बाहिरिए ।

प्रकाशित : मंसिर ५, २०७८ ०९:५१
पूरा पढ्नुहोस्
प्रतिक्रिया
पठाउनुहोस्
×