नाडा अटो शोका लागि मंसिर पहिलो साताबाट स्टल बुकिङ खुल्दै - अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

नाडा अटो शोका लागि मंसिर पहिलो साताबाट स्टल बुकिङ खुल्दै 

कान्तिपुर संवाददाता

काठमाडौँ — अटोमोवाइल्स एसोसिएसन अफ नेपाल (नाडा)ले आगामी फागुनमा हुने अटो शोका लागि स्टल बुकिङ खुल्ला गर्ने निर्णय गरेको छ । फागुन ९ देखि १४ गतेसम्म हुने शोका लागि १८ नोभेम्बर (मंसिर १, बिहीबार) देखि २२ नोभेम्बर (मंसिर ६, सोमबार) भित्र स्टल राख्नेले नाम दर्ता गरिसक्नुपर्ने नाडाले जनाएको छ ।

कोभिड–१९का कारण गएका दुई वर्ष अटो शो हुन सकेन । भृकुटीमण्डपमा हुने अटो शोका लागि प्रारम्भिक तयारी सुरु भएको नाडाका अध्यक्ष कृष्णप्रसाद दुलालले बताए ।

पहिला–पहिला दसैं तिहारलाई लक्षित गर्दै अटो शो हुने गर्थ्यो । हाल कोभिड–१९ ले गर्दा समय तालिका अनुसार हुन नसकेको र फागुनमा गर्न लागिएको अध्यक्ष दुलाल बताउँछन् । अटो व्यवसायीका लागि अटो शो ठूलो चाड हो । मेलामा व्यवसायीबीच छुट दिने र नयाँ सवारी साधन सार्वजनिक गर्न प्रतिस्पर्धा नै चल्ने गर्छ ।


प्रकाशित : कार्तिक २९, २०७८ १६:२७
प्रतिक्रिया
पठाउनुहोस्

लाइसेन्सका लागि तीन सातामा चार लाख आवेदन

रासस

काठमाडौँ — लामो समयको बन्दपछि खुलेको चालक अनुमति पत्र (लाइसेन्स) लिन तीन सातामा झण्डै चार लाखले आवेदन दिएका छन् । यातायात व्यवस्था विभागले कात्तिक ८ गतेदेखि आवेदन पुनः खुलाएको थियो । दुई वर्षयता नियमित रुपमा सेवा चालू नभएकाले पनि छोटो समयमा धेरैको आवेदन परेको यातायात व्यवस्था विभागले जनाएको छ ।

कात्तिकभन्दा पहिले झण्डै दुई लाख आवेदन दिएकाको परीक्षा लिन बाँकी रहेकामा अहिले त्यो संख्या झण्डै छ लाखको हाराहारीमा पुगेको विभागका प्रवक्ता लोकनाथ भुसालले बताए ।

कोभिड संक्रमणका कारण यातायात व्यवस्था कार्यालयलले परीक्षा लिने अवस्था नहुँदा आवेदन स्थगित गरिएको थियो । विभागले आवेदन लिइरहँदा यातायात व्यवस्था कार्यालयले पनि नियमित रुपमा परीक्षा सञ्चालन गरिरहेका छन् । दैनिक रुपमा नयाँ आवेदन दिने बढिरहेको विभागका प्रवक्ता भुसालले बताए ।

कात्तिक दोस्रो सातादेखि नै आवेदन खुलाइएको भए पनि बीचमा चार दिन अवरुद्ध भएको थियो । एकैपटक धेरै सेवाग्राहीले आवेदन भर्न खोज्दा समस्या आएको प्रवक्ता भुसालले बताए ।

गत वर्ष पनि विभागले अनलाइन फाराम खुलाउनासाथ भर्न नसकिने समस्या देखिएको थियो । सेवाग्राहीको चापका आधारमा पनि सफ्टवेयरको क्षमता बढाइएकाले अहिले समस्या नआएको विभागले जनाएको छ । उनले भने, 'अहिले अपडेट गरेपछि फाराम बुझाउन सकिएन भन्ने गुनासो छैन ।'

२०७६ चैतमा कोभिडका कारण सरकारले बन्दाबन्दी लागू गरेसँगै नयाँ चालक अनुमतिपत्रको परीक्षा रोकिएको थियो । गत वर्ष माघमा संक्रमण कम भएको भन्दै अनलाइन फाराम खुलाइएको भए पनि संक्रमण पुनःबढेपछि स्थगित भएको थियो । दुई वर्षयता नियमित रुपमा परीक्षा हुन नसकेकाले धेरै सेवाग्राही परीक्षामा सहभागी हुन पाइरहेका छैनन् ।

प्रकाशित : कार्तिक २९, २०७८ १६:१६
पूरा पढ्नुहोस्
प्रतिक्रिया
पठाउनुहोस्
×