नेपालगन्ज–मुगुको हवाई भाडा १२ हजार !- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

नेपालगन्ज–मुगुको हवाई भाडा १२ हजार !

खाली जहाज बोलाउनुपरेको भन्दै दुवैतर्फको भाडा असुल्दै निजी एयरलाइन्स
राजबहादुर शाही, छपाल लामा

मुगु/हुम्ला — मुगुको रारा विमानस्थलमा उडान गर्ने निजी एयरलाइन्सले कार्गोका नाममा दोब्बर भाडा असुल्न थालेका छन् । नेपालगन्जदेखि मुगु आउन यात्रु नभएको भन्दै एयरलाइन्सले एकतर्फी भाडा नै १२ हजार रुपैयाँ लिने गरेका हुन् । 

खाली जहाज बोलाउनुपरेको भन्दै दुवैतर्फको भाडा जोडेर १२ हजार रुपैयाँ लिन थालिएको एयरलाइन्सका कर्मचारीको दाबी छ । मुगुदेखि नेपालगन्ज जान प्रतिव्यक्ति ६ हजार ५ सय रुपैयाँ भाडा तोकिए पनि नेपालगन्जबाट मुगु आउने यात्रु नपाइने भन्दै बढी भाडा लिने गरेको रोयल कन्स्ट्रक्सनका प्रबन्धक रवीन्द्र स्वाँरले बताए ।

‘जहाजले जथाभावी भाडा उठाइरहेका छन्,’ उनले भने, ‘यात्रु चर्को भाडा तिरेर जहाज चढ्न बाध्य भए पनि विमानस्थल प्रशासन मौन छ ।’

टिकट पाउन मुस्किल भएपछि महँगो भाडा तिरेर पनि यात्रु जहाज चढ्न पाउँदैनन् । हवाई टिकट नपाएर ४/५ दिनसम्म भौंतारिनुपरेको सोरु गाउँपालिका–२ का राजेन्द्र शाहीको भनाइ छ । ‘सडक जीर्ण हुँदा गाडीबाट जान जोखिमयुक्त छ,’ उनले भने, ‘जहाजमा महँगो भाडा तिर्छु भन्दा पनि टिकट पाउन मुस्किल भयो ।’

नियम र पद्धतिलाई बेवास्ता गरी निजी एयरलाइन्सले पहुँचवालालाई मात्र टिकट वितरण गर्ने गरेको उनको गुनासो छ । एयरलाइन्सले कार्यालयबाहिरबाटै टिकट वितरण गरिरहेको उनको दाबी छ ।

नेपालगन्जदेखि मुगु आउने यात्रु नहुँदा खाली जहाज बोलाउनुपर्ने भएकाले प्रतिव्यक्ति १२ हजार रुपैयाँ भाडा लिने गरिएको तारा एयरलाइन्सका स्टेसन इन्चार्ज लक्ष्मी शाहीले बताए । रारा घुम्न आउने पर्यटकले दोहोरो हवाई टिकट लिएर आउँदा स्थानीयलाई टिकट पाउन मुस्किल भएको उनको भनाइ छ । ‘यताबाट नेपालगन्ज जाने यात्रुको भीड छ,’ उनले भने, ‘नेपालगन्जबाट मुगु आउने यात्रु नै पाइँदैनन् ।’

यता प्रमुख जिल्ला अधिकारी रोमबहादुर महतले भने महँगो हवाई भाडा नउठाउन निजी एयरलाइन्सलाई पत्राचार गरिए पनि बेवास्ता भएको प्रतिक्रिया दिए । ‘एयरलाइन्स कम्पनीलाई पर्यटक र स्थानीयलाई बराबर टिकट उपलब्ध गराउन पनि भनेका छौं,’ उनले भने, ‘अनुगमन गर्दा बढी भाडा लिएको पाइए कारबाही गर्छौं ।’

नेपाल एयरलाइन्सले नियमित उडान नगर्दा यात्रुहरू मर्कामा परेका छन् । झन्डै १९ महिनापछि गत साता नेपाल एयरलाइन्सले उडान थाले पनि नियमित भएको छैन । नेपाल एयरलाइन्सको जहाजले मुगु–नेपालगन्ज उडानमा प्रतियात्रु ५ हजार ३ सय ३५ रुपैयाँ भाडा लिने गरेको छ ।

टिकट पाउन महाभारत

सडक सञ्जालसँग नजोडिएको हुम्लाका नागरिकलाई यति बेला जिल्ला बाहिर जान टिकट पाउन गाह्रो पर्छ । पर्यटकीय सिजनका बेला प्रतिदिन पाँच वटासम्म उडान गर्ने समिट र तारा एयरलाइन्सले अहिले एक–एक मात्र उडान गर्ने गरेकाले यात्रुलाई टिकट पाउन समस्या भएको हो । सीता एयरलाइन्सले एक सातायता सिमकोट विमानस्थलमा उडान गरेको छैन ।

जहाजको उडान कम हुँदा टिकट पाउन मुस्किल भएको सर्केगाडका चन्द्रजंग शाहीले बताए । ‘एक त उडानै हुँदैन,’ उनले भने, ‘उडान भए पनि टिकट पाउन पावर लगाउनुपर्ने बाध्यता छ ।’ नेपाल एयरलाइन्सको जहाज नियमित नहुँदा पनि निजी एयरलाइन्सको मनोमानी बढेको उनको भनाइ छ । टिकटका लागि चार दिनदेखि विमानस्थल धाइरहे पनि टिकट नपाएको स्थानीय सुवास शाहीले बताए ।

हुम्लामा उडान गर्ने निजी एयरलाइन्सले भाडासमेत बढाएका छन् । दसैंअघि ५ हजार ६ रुपैयाँ भाडा लिने निजी एयरलाइन्सले अहिले ६ हजार ३० रुपैयाँ भाडा बनाएका हुन् । नेपालगन्जबाट हुम्लाका लागि भने १० हजार ५ सय भाडा लिने गरिएको समिट एयरलाइन्सका कर्मचारी कार्बु लामाले जानकारी दिए ।

प्रकाशित : कार्तिक २४, २०७८ ०७:३६
प्रतिक्रिया
पठाउनुहोस्

निर्मला कुर्मीको मृत्यु भारतमै : प्रहरी

‘उनको मृत्यु स्वाभाविक देखिन्छ, थप पुस्ट्याइँका लागि प्राप्त कागजातबारे अनुसन्धान गर्दै छौं’ 
रूपा गहतराज

नेपालगन्ज — बेपत्ता भनिएकी बाँकेको नेपालगन्ज–१७ परस्पुरकी निर्मला कुर्मीको भारतमा मृत्यु भइसकेको प्रहरीको प्रारम्भिक अनुन्धानबाट खुलेको छ । भारतमै दोस्रो विवाह भएको, त्यहीं उनको मृत्यु भइसकेको फोटो प्राप्त भएको र अनलाइनमा मृत्यु दर्तासमेत राखिएको प्रहरीले दाबी गरेको छ ।

प्रहरीका अनुसार २०७६ चैत १४ मा उनको मृत्यु भएको हो ।

रुपैडिया नाकाबाट १५ किलोमिटर टाढा पर्ने जगन्नाथपुरको बलहामा उनको मृत्यु भएको विवरणको प्रमाणित प्रतिलिपि स्थानीय ग्राम पञ्चायत अधिकारीले नेपाल प्रहरीलाई पठाएको बाँकेका डीएसपी मधुसूदन न्यौपानेले बताए । ‘प्रहरीले गरेको अनुसन्धानले उनको मृत्यु स्वाभाविक भएको देखिएको छ,’ उनले भने, ‘तर पुस्ट्याइँका लागि प्राप्त कागजातबारे थप अनुसन्धान गर्दै छौं ।’

कुर्मीले २०६९–७० सालतिर भारतीय नागरिक अर्जुन कुर्मीसँग दोस्रो विवाह गरेको पनि खुलेको छ । ‘अर्जुनसँग पनि बयान लिएका छौं । निर्मलाको गाउँ आएका बेला विवाह गरेर उनले भारत लगेको देखिन्छ,’ डीएसपी न्यौपानेले भने, ‘उनको बयानका आधारमा जग्गाका कारण असुरक्षित महसुस गरेर निर्मला भारत गएको र केही वर्षपछि उनको उतै मृत्यु भएको देखिन्छ ।’

यद्यपि साविक परस्पुर–९ का ओमकार कुर्मीले २०६८ कात्तिक १७ मा अपुताली भएको दाबी गर्दै निर्मलाका पति महलुको सम्पूर्ण जग्गा सार्वजनिक गर्न अख्तियार दुरुपयोग अनुसन्धान आयोगमा निवेदन दिएका बेला निर्मलाले भारतमा दोस्रो विवाह गरेको कागज फर्जी भएको प्रशासनले प्रमाणित गरेको थियो ।

सो घटनामा जिल्ला प्रशासन कार्यालय बाँकेका तत्कालीन प्रमुख जिल्ला अधिकारी कृष्णचन्द्र घिमिरेले निर्मलाको भारतमा बिहे नभएको र भारतमा कसैसँग कुनै सम्बन्ध नरहेको निर्णय सुनाएका थिए । तत्कालीन प्रजिअ घिमिरेको आदेशपत्रमा निर्मलाले आफूमाथि जग्गाकै कारण कुटपिट भएको र असुरक्षित महसुस भएको भनी निवेदन दिएको उल्लेख छ । आदेशपत्रअनुसार निर्मलाले २०६८ असोज ३० मा जीउधनको सुरक्षा गरिपाऊँ भनी निवेदन दिएकी थिइन् ।

त्यसमा प्रशासनले प्रहरीलाई जीउधनको सुरक्षा र संरक्षणमा भरपर्दो व्यवस्था मिलाउन आदेश दिएको थियो । आदेशअनुसार निर्मलाले २०६८ मंसिर १२ मा रोक्का राखिएको जग्गा फुकुवा गरिपाऊँ भनी निवेदन दिएको देखिन्छ । जिल्ला प्रशासनको आदेशमा निर्मलाले भारतीय नागरिक अर्जुनसँग विवाह गरी बसेको भन्ने प्रमाण झूटो भएको उल्लेख छ ।

प्रशासनको त्यही आदेशले अपुताली परेको निवेदन झूटो भएको तथ्य पुष्टि गरेको छ । जसमा निर्मलाको भारतमा कुनै सम्बन्ध नरहेको, अर्जुनसँग कुनै नाता नभएको र ग्रामसभाको निवासी पनि नरहेको उल्लेख छ ।

भारतीय नागरिक अर्जुनको पारिवारिक रजिस्टर र मतदाता सूचीमा निर्मलाको नाम नरहेको र उनीहरूको विवाहको सम्बन्धमा कुनै पनि पत्राचार नभएको सन् २०११ नोभेम्बर १४ मा ग्रामसभा जगन्नाथपुर पुरे बेचई जिल्ला बहराइचका प्रधान रामेश्वरद्वारा हस्ताक्षरित पत्रको छायाप्रति पेस भएको छ । आदेशको व्यहोरामा २०६८ मा निर्मलाको अर्जुनसँग कुनै पनि नाता नभएको उल्लेख छ ।

१० वर्षबीचमा निर्मलाका नाममा सबै जग्गा नामसारी गरी बिक्री पनि भइसकेको छ । भूमाफियाले जग्गा किनबेच गरेपछि निर्मलाको भारतको आधार कार्ड बन्नु, नाता नै नभएको पुष्टि गरिएको त्यही व्यक्ति अर्जुनसँग बिहे भएको प्रमाण पनि भेटिनुले निर्मलाको जग्गामा आँखा लगाउने भूमाफियाले खेल खेलेको आशंका बढेको छ ।

निर्मलालाई जग्गा नामसारी गरेको पाँच वर्षपछि भारतीय नागरिक बनाइएको छ । पाँच वर्षको बीचमा उनको सबै जग्गा बिक्री भइसकेको छ ।

निर्मलाले २०६९ असार ८ मा श्रीमान् महलु कुर्मीका नाममा रहेको जग्गा ४ बिघा ८ कट्ठा १० धुर खेतबारी र घरबारसहित साढे २ कट्ठा जग्गा आफ्नो नाममा नामसारी गरेको देखिन्छ । त्यसको दुई महिनामै उनको खेतीबारी भएको ४ बिघा ८ कट्ठा १० धुर जग्गा बर्दियाको साविक धधवार गाविस–४ की पार्वती विष्टका नाममा गरिएको छ ।

निर्मलाले पार्वती विष्टलाई २५ लाख ७५ हजार ८ सय रुपैयाँमा जग्गा बिक्री गरेको मालपोतको अभिलेखमा देखिन्छ । त्यही जग्गालाई रत्नादेवी थापाले पार्वती विष्टबाट दाखा (दाखिला खारेज) प्रक्रिया अपनाएर ३ करोड रुपैयाँ डाँक सकार (लिलामी) गरिएको छ । रत्नादेवीले पार्वतीसँग लेनदेनका आधार देखाएर मुद्दा मामिला उठान गरी डाँक सकारबाट आफ्नो नाममा जग्गा सारेकी छन् ।

कुर्मीको अपहरण तथा शरीर बन्धक गरी हत्या गरिएको भन्दै २० चैत २०७७ मा ८ जनाविरुद्ध किटानी जाहेरी परेको थियो । प्रहरीले सामान्य सोधपुछ मात्रै गरेको थियो, विस्तृत अनुसन्धान हुन सकेको थिएन ।

घटनामा प्रहरी अनुसन्धान चित्त बुझ्दो नभएको भन्दै रुबी खानको समूह नेपालगन्जबाट २० दिन पैदल हिँडेर न्याय माग्दै काठमाडौं पुगेका थिए । त्यसपछि उनी आमरण अनशनसमेत बसिन् । सरकारले उनीसँग वार्ता गर्‍यो र गृह मन्त्रालयका सहसचिव हीरालाल रेग्मीको संयोजकत्वमा ६ सदस्यीय छानबिन समिति पनि बनायो । त्यसपछि खानले अनशन तोडेकी थिइन् ।

समितिले प्रतिवेदन बुझाएपछि त्यसकै आधारमा प्रहरीले अनुसन्धान गरिरहेको छ । प्रहरीले किटानी जाहेरीमा उल्लिखित ६ जनालाई सोमबार पक्राउ गरेको छ । तीमध्ये आरोपित ८० वर्षीय कुबर बब्बन सिंहलाई अदालतले उमेर हदम्यादका कारण साधारण तारिखमा छाडेको छ । अभियुक्तमध्ये पूर्वसभासद बादशाह कुर्मीले भदौ १० मा आफैं जिल्ला प्रहरी कार्यालयमा उपस्थित भएर बयान दिएका थिए ।

उनी त्यतिबेलै हाजिरी जमानतमा छुटेका थिए । ‘प्रहरीले पक्राउ पुर्जी जारी गरेपछि कुर्मीले आफैं उपस्थित भएर बयान दिएका हुन्,’ डीएसपी न्यौपानेले भने, ‘हामीले छाडेका होइनौं । सरकारी वकिल कार्यालयमा बयान लिएका छौं । बाहिर राखेर अनुसन्धान गरिराखेका छौं ।’

प्रकाशित : कार्तिक २४, २०७८ ०७:१८
पूरा पढ्नुहोस्
प्रतिक्रिया
पठाउनुहोस्
×