जोगबनी नाकाबाट साढे सात करोड रुपैयाँ बराबरको झिलिमिली बत्ती आयात- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

जोगबनी नाकाबाट साढे सात करोड रुपैयाँ बराबरको झिलिमिली बत्ती आयात

विनोद भण्डारी

विराटनगर — तिहार र छठ पर्वका लागि जोगबनी नाकाबाट मात्र साढे सात करोड मूल्य बराबरको झिलिमिली बत्ती आयात भएको छ । दियो र पाला बाल्ने परम्परा हराउँदै जाँदा बर्सेनि झिलिमिली बत्तीको आयात बढ्दै गएको छ ।

विराटनगर भन्सार कार्यालयको तथ्यांकअनुसार तिहारमा प्रयोग गरिने खाद्य सामग्री र बत्तीमा मात्र यस वर्ष १८ करोड ५ लाख ६४ हजार रुपैयाँ बाहिरिएको छ । त्यसमध्ये ७ करोड ५८ लाख ७७ हजार मूल्य बराबरको झिलिमिली बत्ती आयात भएको भन्सार अधिकृत अमित तिवारीले बताए । उका अनुसार गत वर्ष अन्य नाका बन्द हुँदा यो नाकाबाट २४ करोड ७३ लाख ३४ हजार मूल्य बराबरका बत्ती भित्रिएको थियो ।

सजावटका लागि प्रयोग गरिने पलास्टिक फूल र गोदावरी फूल आयातमा ६५ लाख ७६ हजार रुपैयाँ विदेसिएको छ । भन्सार कार्यालयका अनुसार ६४ लाख ६९ हजार मूल्यको २१ हजार ८ सय ८८ किलो पलास्टिक फूल र एक लाख ७ हजार मूल्यको २ हजार ३ सय ८० किलो गोदावरी फूल तिहारका लागि आयात भएको छ ।

तिहारका लागि यो नाकाबाट यसपटक १ करोड २५ लाख २२ हजार मूल्यको १३ हजार २ सय ८४ किलो काजु आयात भएको छ । त्यसैगरी १९ लाख ८४ हजार मूल्यको १० हजार ५० केजी नरिवल, ५ करोड ९३ लाख मूल्यको ९५ हजार ५ सय ९७ किलो बदाम, एक करोड २२ लाख ३७ हजार मूल्यको ४० हजार २ सय ४० किलो ओखर, ६३ लाख ६८ हजार ६ सय मूल्यको पिस्ता र ओखर आयात भएको छ । भन्सारका अनुसार गत वर्ष तिहारका लागि यो नाकाबाट ओखर मात्र २३ करोड ९५ लाख ४० हजार मूल्यको आयात भएको थियो ।

प्रकाशित : कार्तिक १७, २०७८ ११:३८
प्रतिक्रिया
पठाउनुहोस्

सुक्खा बन्दरगाहमा दुर्घटना बढ्यो

शंकर आचार्य

पर्सा — वीरगन्जस्थित सिर्सिया सुक्खा बन्दरगाहको बीसीएन गोदाममा रेलबाट मालसामान अनलोड गर्ने क्रममा कात्तिक ३ मा दुर्घटनामा परी वीरगन्ज–२६ अठराहाका ३५ वर्षीय बिरजु पटेल गम्भीर घाइते भए । रेलबाट बोरा झार्दै गर्दा चिप्लिएपछि आफैले बोकेको बोराले किचिएर उनी घाइते भएका थिए ।

उपचारको क्रममा एक साताअघि काठमाडौंमा उनको मृत्यु भयो । उनका सहकर्मीले विरोध प्रदर्शन गरेपछि ठेकेदार पक्षले ६ लाख रुपैयाँ मृतक परिवारलाई क्षतिपूर्ति दिने सहमति भयो । गत बुधबारदेखि मजदुरले काम सुरु गरेका छन् ।

यसअघि भदौ १५ मा बन्दरगाह परिसरमै सहायक भन्सार एजेन्ट विनोद तोडीको मोटरसाइकल दुर्घटनामा परी मृत्यु भयो । मालवाहक ट्रकले उनी सवार मोटरसाइकललाई ठक्कर दिएको थियो । करिब ५ महिनाअघि बन्दरगाह सञ्चालक कम्पनी प्रिस्टिन भ्यालीका एक कर्मचारी रिचस्टेकरले किचेर घाइते भएपछि एउटा खुट्टा गुमाउनुपर्‍यो ।

अत्यधिक भीडभाड र मालवाहक सवारीसाधनको चाप भइरहने बन्दरगाह परिसरमा बर्सेनि यस्ता दुर्घटना भइरहन्छन् । ठूला दुर्घटनाले चर्चा पाउँछन् । ससाना दुर्घटनाहरू क्षतिपूर्ति पाएरै दब्छन् । ट्राफिक व्यवस्थापन अभावमा बन्दरगाहमा दुर्घटनाको उच्च जोखिम छ ।

यो परिसरमा मात्रै मजदुर, भन्सार एजेन्ट तथा तिनका सहयोगी, आयात निर्यातकर्ता, भन्सार कर्मचारी तथा बन्दरगाह सञ्चालक कम्पनीका समेत गरी दैनिक करिब २ हजार जनाको आवागमन भइरहेको हुन्छ । झन्डै १ हजार बढी मालवाहक सवारी साधन दैनिक आउजाउ गर्छन् । बन्दरगाह परिसरमा कन्टेनरको चाङ र अन्य बल्क कार्गो वस्तु थुपि्रँदा बन्दरगाह परिसर अस्तव्यस्त हुन्छ ।

यस्तो अवस्थामा त्यहाँ कामविशेषले पैदल वा मोटरसाइकल चलाएर जाने जो कोही पनि दुर्घटनामा पर्ने जोखिम छ । कन्टेनरको भण्डारण र सवारीसाधनलाई निश्चित बाटोको व्यवस्था नगरिँदा तीव्र गतिले दुर्घटनाको जोखिम भएको हो ।बन्दरगास्थित इन्टर मोडल यातायात विकास समितिका प्रमुख कमल ज्ञवालीले बन्दरगाहमा दुर्घटना बढेपछि त्यहाँ कन्टेनर जाँचपासका लागि जानेहरूका लागि छुट्टै लेनको व्यवस्था गरिएको बताए ।

‘विगतमा यस्तो लेन थिएन, मोटरसाइकल लिएर वा पैदल जो कोही पनि भित्र गएर आफ्नो कन्टेनर तथा मालवस्तु हेर्ने गर्थे,’ उनले भने, ‘अब भने दुर्घटना न्यूनीकरण गर्नकै लागि यार्डको प्रवेश विन्दुबाटै एउटा छुट्टै लेनको व्यवस्था गरिएको छ, त्यहाँबाट जानेहरूले एउटा निश्चित स्थानमा आफ्नो सवारी पार्किङ गरेर मात्र पैदल जान पाउँछन् ।’

दुर्घटना न्यूनीकरण गर्न कन्टेनरहरूमा ईसीटीएस प्रणालीको जस्तो चिप्स लगाउन सके सम्बन्धित आयातकर्ता तथा तिनका एजेन्टहरूले उक्त कन्टेनर कहाँ छ भनी सहजै यकिन गर्न सक्ने भए पनि यो प्रणाली खर्चिलो भएको उनले बताए । तर, बन्दरगाहमा एउटा एम्बुलेन्सको व्यवस्थासमेत गर्न लागिएको उनले जनाए ।

बन्दरगाहमा बेलाबेलामा सवारी चालक, भन्सार एजेन्ट तथा तिनका सहयोगीलाई सवारी चालकसम्बन्धी तालिम दिने, दुर्घटनाको जोखिम तथा गति सीमितको संकेत गर्ने सूचना तथा बोर्ड ठाउँठाउँमा राख्ने गरिए दुर्घटनाको जोखिम घट्ने उनको भनाइ छ ।

प्रकाशित : कार्तिक १७, २०७८ ११:३६
पूरा पढ्नुहोस्
प्रतिक्रिया
पठाउनुहोस्
×