सुक्खा बन्दरगाह र आईसीपीमा ५३ जग्गाधनीलाई डेढ अर्ब मुआब्जा- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

सुक्खा बन्दरगाह र आईसीपीमा ५३ जग्गाधनीलाई डेढ अर्ब मुआब्जा

शंकर आचार्य

पर्सा — वीरगन्जस्थित सिर्सिया सुक्खा बन्दरगाह र एकीकृत सुरक्षा जाँच चौकी (आईसीपी) बीचको जग्गाका ५३ जग्गाधनीले १ अर्ब ५० करोड रुपैयाँ मुआब्जा बुझेका छन् । हालसम्म ७२ कित्ता जग्गाका ५३ जग्गाधनीले करिब १७ बिघा जग्गाको मुआब्जा लिइसकेको सुक्खा बन्दरगाह भन्सार कार्यालयका प्रमुख लालबहादुर खत्रीले जानकारी दिए ।

‘अर्थ मन्त्रालयबाट निकासा भएर आएको मुआब्जा रकममध्ये पहिलो चरणमा स्थानीय किसानले १ अर्ब ५० करोड रुपैयाँ मुआब्जा बुझेका हुन्,’ उनले भने, ‘अब बाँकी करिब ३ सय किसानले झन्डै ४ अर्ब रुपैयाँ मुआब्जा लिन बाँकी छ । अर्थ मन्त्रालयमा फाइल पुगेको छ । रकम निकासा भएर आएपछि वितरण हुन्छ ।’ जिल्ला प्रशासन कार्यालयमार्फत स्थानीयले मुआब्जा लिइरहेका छन् । वीरगन्ज महानगरपालिका–२५ मा पर्ने सिर्सिया सुक्खा बन्दरगाह र एकीकृत सुरक्षा जाँचचौकीबीचको जग्गा अधिग्रहण प्रक्रिया सरकारले करिब ५ वर्षअघि सुरु गरेको हो ।

सरकारको २०७३ पुस १७ को निर्णयपछि जग्गा अधिग्रहण प्रक्रिया अघि बढेको हो । गत वर्ष कात्तिक २७ मा बसेको मन्त्रिपरिषद् बैठकले सिर्सिया खल्वाटोलाबासीलाई मुआब्जा बाँड्ने निर्णय पनि गरेको थियो । सुक्खा बन्दरगाह र आईसीपीबीच २ सय ९७ धनीको करिब १ हजार ४ सय कित्ता जग्गा छ । सरकारले निर्धारण गरेको मापदण्ड अनुसार यहाँ मुआब्जा रकम सबैभन्दा बढी प्रतिकट्ठा ६७ लाख ७० हजार र सबैभन्दा कम प्रतिकठ्ठा २४ लाख ६० हजार रुपैयाँ तोकिएको छ । ५ वर्षअघि स्थानीयको ६२ बिघा जग्गा अधिग्रहणका लागि भन्दै रोक्का गरिएको थियो ।

सिर्सिया सुक्खा बन्दरगाह केही वर्षयता साँघुरो भएको छ । आईसीपीसमेत सञ्चालनमा आएपछि दुवै भन्सारबाट गरी यस क्षेत्रमा हाल दैनिक करिब १ हजार ५ सय मालवाहक सवारीसाधनको आवागमन हुन्छ ।

प्रकाशित : कार्तिक १४, २०७८ २१:२०
प्रतिक्रिया
पठाउनुहोस्

डेढ महिनामा ६९ युवतीको उद्धार

वीरगन्ज नाका भएर असुरक्षित रूपमा भारत लग्ने क्रम बढ्दो
शंकर आचार्य

पर्सा — काठमाडौंको एक रेडिमेड पसलमा कार्यरत २० वर्षीया युवती आकर्षक जागिरको प्रलोभनमा दुई महिनाअघि भारतको पन्जाव पुगिन् । पसलमै कार्यरत एक सहकर्मीको उक्साहटमा परेर भैरहवा नाका हुँदै पन्जावको जिरापुर सहरमा पुगेपछि उनले जर्बजस्ती यौन पेसा अंगाल्नुपर्‍यो । त्यहाँ यौन व्यवसाय सञ्चालन गरेकी एक नेपाली महिलाको चंगुलमा फसेकी उनलाई ती महिलाले ज्यान मार्ने धम्की दिएपछि यौनकर्मी बन्न बाध्य भइन् ।


संयोगवश, फेसबुकबाट साथी बनेका पन्जावका युवकको सहयोगमा उनी त्यहाँबाट उम्केर गतसाता नेपाल फर्किन् । उनी हाल वीरगन्जस्थित माइती नेपालको आवधिक गृहमा आश्रित छिन् । पछिल्लो समय वीरगन्ज नाका भएर युवतीलाई असुरक्षित रूपमा सीमा कटाई भारत लग्ने क्रम बढेको छ । दोस्रो लकडाउनपछि सरकारले सार्वजनिक सवारीसाधनको आवागमन खुल्ला गरेपछि यो क्रम अझै बढ्दो छ ।

चेलीबेटी बेचबिखन नियन्त्रणको क्षेत्रमा वीरगन्जमा कार्यरत तीन वटा संस्थाले साउनयता ठूलो संख्यामा युवतीको सीमा तथा भारतबाट उद्धार गरेको छ । माइती नेपाल, आफन्त नेपाल र साना हातहरू नेपाल गरी तीन संस्थाले चालु आर्थिक वर्षको साउनदेखि मंगलबारसम्ममा गरी ६९ युवतीलाई असुरक्षित रूपमा भारत जानबाट तथा केहीलाई भारतबाट समेत उद्धार गरी ल्याएका हुन् ।

माइती नेपालले ३०, आफन्त नेपालले ३० र साना हातहरू नेपालले ९ युवतीको उद्धार गरेको हो । गत आर्थिक बर्षमा माइती नेपालले १ सय १३, आफन्त नेपालले १ सय ३९ र साना हात नेपालले १७ जनाको उद्धार गरेका थिए । माइती नेपाल आवधिक गृह प्रमुख संगीता पुरीले साउन पहिलो सातादेखि नै सार्वजनिक सवारीसाधन चल्न थालेदेखि चेलीबेटीको सीमाबाट उद्धार हुने क्रम बढेको बताइन् । ‘यसअघि लकडाउनका कारण सार्वजनिक सवारीसाधन चलेका थिएनन्,’ उनले भनिन्, ‘सरकारले सार्वजनिक सवारीसाधनको आवागमन खुल्ला गरेपछि यात्रा गर्न सहजता भएसँगै चेलीबेटीको ओसारपसार बढेको हो ।’

संस्थाले गत वर्षमा सीमा तथा भारतबाट गरी नेपालका ३२ जिल्लाका १ सय १३ युवातीको उद्धार गरेको उनले बताइन् । गत आवमा लकडाउनका कारण लामो समय सीमानाका बन्द रहेकाले सीमा नाकाबाट उद्धार हुनेको संख्या पनि कम थियो । आफन्त नेपालले गत साउनदेखि मंगलबारसम्ममा गरी ३० जनाको सीमा र भारतबाट उद्दार गरेको संस्थाकी वीरगन्ज शाखा प्रमुख मनु रानाले बताइन् । उनले पनि यो आव सुरु भएलगत्तै सार्वजनिक सवारीसाधन चल्न थालेपछि चेलीबेटीलाई सीमा नाका कटाउन खोज्नेहरू बढी सक्रिय भएको बताइन् ।

‘यो नाकाबाट बेचबिखनमा संलग्न गिरोह सक्रिय भएको अनुभव गरेका छौं,’ उनले भनिन्, ‘कतिपयलाई भारतको विभिन्न महानगरमा आकर्षक तलबसहितको रोजगारीको प्रलोभनमा परी भारत लग्ने प्रयास गरिन्छ । केहीलाई अर्केस्ट्रा कम्पनीमा र केहीलाई आर्थिक कारोबार गर्ने भारतीय नेटवर्किङ कम्पनीहरूमा लग्ने प्रयास गरिन्छ ।’ गत आर्थिक वर्षभरिमा यो संस्थाले १ सय ३९ युवतीको सीमा तथा भारतबाट समेत उद्धार गरेको रानाले बताइन् । त्यस्तै, साना हातहरू नेपाल संस्थाले पनि साउनयता मंगलबारसम्ममा गरी ९ जनाको उद्धार गरेको छ ।

गत आर्थिक वर्षभरि यो संस्थाले १७ चेलीको उद्धार गरेको थियो । संस्थाका वीरगन्ज शाखा प्रमुख बाबुराम क्षेत्रीले साउनयता सीमावर्ती क्षेत्रमा रिक्सा, अटो, टांगा, मोटरसाइकल सवारीसाधन चल्न सहज भएपछि चेलीबेटीलाई सीमा पार गराउन सहज भएकाले बेचबिखनमा संलग्न गिरोह सक्रिय भएको बताए ।

प्रकाशित : भाद्र २५, २०७८ ११:४७
पूरा पढ्नुहोस्
प्रतिक्रिया
पठाउनुहोस्
×