निजी क्षेत्रमैत्री बजार नीति बनाउन ध्यानाकर्षण- अर्थ / वाणिज्य - कान्तिपुर समाचार

निजी क्षेत्रमैत्री बजार नीति बनाउन ध्यानाकर्षण

अमृता अनमोल

बुटवल — च्याम्बर अफ कमर्स लुम्बिनी प्रदेशले निजी क्षेत्रमैत्री बजार नीति तथा कानुनहरुको अविलम्ब निर्माण गर्न माग गर्दै सरकारको ध्यानाकर्षण गराएको छ ।

मुख्यमन्त्री कुलबहादुर केसीलाई सोमबार ३२ बुँदे ध्यानाकर्षण पत्र बुझाउँदै निकासी पैठारीका लागि सरकारले निकै कम कानुनहरु निर्माण गरेकाले यसलाई बढाउन माग गरेको छ । प्रदेशका राजश्व संकलक कार्यालयहरुलाई कर दातामैत्री बनाउन तथा भन्सार केन्द्रित अर्थतन्त्र निरुत्साहित हुनेगरी सरकारी नीति बनाउन सरकारसमक्ष माग राखेको छ । मागपत्रमा प्रदेशमा उपलब्ध कच्चा पदार्थमा आधारित उद्योगको स्थापना तथा विकासलाई सरकारले उच्च प्राथमिकतामा राख्न आग्रह गरेको छ ।

प्रदेश सरकारले आयोजना गर्न लागेको लगानी सम्मेलनमा आफूहरु उत्सुक भएको जनाउँदै च्याम्बर अफ कमर्सले सम्मेलनमा निजी क्षेत्रको सहकार्यलाई उच्च महत्त्व दिन आग्रह गरेको छ । ‘लगानी सम्मेलन र प्रदेशमा उत्पादित सामग्रीहरुको प्रदर्शनी मेला आयोजनालाई उपलब्धिमूलक ढंगले सम्पन्न हुने गरी निरन्तरता दिन र त्यस्ता कार्यक्रमहरु आयोजना गर्दा निजी क्षेत्रलाई सहकार्यको अवसर प्रदान गर्न आग्रह गर्दछौं ।’ मागपत्रमा उल्लेख छ ।

कमर्सका अध्यक्ष टंक पोखरेलको नेतृत्वमा गएको टोलीले बुटवलको मोतिपुर औद्योगिक क्षेत्रको निर्माण कार्य अगाडि बढाउन पहल गरी प्रदेशमा लगानी र औद्योगिकीकरणको आधार तयार गर्न पनि सरकारसमक्ष आग्रह गरेको छ । यसअघिका दुई वटा लकडाउनले अर्थतन्त्रलाई धराशायी पारेको अवगत गराउँदै च्याम्बर अफ कमर्सले मुख्यमन्त्री केसीसमक्ष कोभिड–१९ को लागि भ्याक्सिन, स्वास्थ्य उपकरण तथा अस्पताल शय्याको उचित व्यवस्थापन गर्न पनि माग गरेको छ ।

मागपत्र बुझ्दै मुख्यमन्त्री केसीले प्रदेशको विकासका लागि निजी क्षेत्रको सहकार्य अपरिहार्य रहेकाले मागलाई सरकारले छिट्टै छलफलमा लैजाने बताए । उनले निजी क्षेत्रसँग सरकारले हातेमालो गरेर अगाडी बढ्ने प्रतिबद्धता पनि जनाए ।

प्रकाशित : कार्तिक ८, २०७८ २१:५६
प्रतिक्रिया
पठाउनुहोस्

पुरस्कृत भएको भोलिपल्टै डिएसपीको सरुवा

घनश्याम गौतम

रूपन्देही — जिल्लाले कार्यसम्पादनमा उत्कृष्ट घोषणा गरी पुरस्कृत गरेका इलाका प्रहरी कार्यालय बुटवलका प्रहरी नायब उपरीक्षकलाई गृह मन्त्रालयले भोलिपल्टै सरुवा गरेको छ ।

रूपन्देही प्रहरीले चलाइरहेको ‘हाई इन्टिग्रेटी इन्चार्ज अफ द मन्थ’ अभियान अन्तर्गत असोज महिनाको उत्कृष्ट प्रहरीको रुपमा शनिबार इलाका प्रहरी कार्यालयका प्रहरी नायब उपरीक्षक मदन कुँवरलाई घोषणा गर्दै पुरस्कृत गरेको थियो । कुँवरले अभिलेखमा उल्लेख हुने गरी नगदसहित पुरस्कार पाएका छन् । तर गृह मन्त्रालयले उनलाई आइतबार कार्य सम्पादन कमजोर रहेको भन्दै काज सरुवा गरेको हो ।

रूपन्देही प्रहरीले जिम्मेवारी अनुसारको कार्यसम्पादनमा उत्कृष्ट ठहरिएको, फरार अपराधी पक्राउ गरेको, अवैध सामान र लागूऔषध बरामद एवं नियन्त्रणमा प्रभावकारी भूमिका निर्वाह गरेको र मातहतका प्रहरी कर्मचारीलाई पनि गैरव्यावसायिक गतिविधि नियन्त्रण गर्दै उच्च नैतिक आचरणमा राख्न उल्लेखनीय भूमिका निर्वाह गरेको भन्दै पुरस्कृत गरेको थियो । उनी इलाका प्रशासन कार्यालयबाट ४ महिनामै प्रहरी प्रधान कार्यालयको राजमार्ग सुरक्षा तथा ट्राफिक निर्देशनालयमा सरुवा भएका हुन् । प्रहरी नियमावली २०७१ अनुसार जिम्मेवारी सम्हालेको एक वर्ष नपुगी सामान्यतया सरुवा नगर्ने उल्लेख छ ।

प्रहरी स्रोतका अनुसार डिएसपी कुँवरलाई गृहमन्त्रीको गृहनगर तिलोत्तमा नगरपालिकाको मणिग्राममा मृत्यु भएकी सीता भण्डारी प्रकरणसँग जोडेर गृहमन्त्री बालकृष्ण खाँणको ठाडो आदेशमा सरुवा गरिएको हो । गृहमन्त्री खाँण एक महिनाअघि गृहनगर आएर फर्किएका थिए । कोठामा झुण्डिएको अवस्थामा मृत भेटिएकी मणिग्रामकी सीता भण्डारीलाई परिवारले हत्या गरेको आरोप लगाउँदै माइती पक्षले ४५ दिनसम्म निरन्तर आन्दोलन गरेका थिए । ४५ दिनपछि सीताको परिवार र माइती पक्षबीच ११ लाख रुपैयाँ लेनदेनपछि विवाद टुंगिएको थियो । सोही घटनामा प्रहरीले माइती पक्षको किटानी जाहेरी लिन नमानेको आरोप कुँवरलाई लगाइएको थियो ।

कुँवरको स्थानमा गण्डकी प्रदेश ट्राफिक प्रहरी कार्यालय बेलचौतारा तनहुँमा कार्यरत प्रहरी नायब उपरीक्षक ठगबहादुर केसीको काज सरुवा गरिएको छ । केसीले केही वर्षअघि बुटवलको वडा प्रहरी कार्यालयमा प्रहरी निरीक्षकको रुपमा काम गरेका थिए ।

प्रकाशित : कार्तिक ८, २०७८ २१:४१
पूरा पढ्नुहोस्
प्रतिक्रिया
पठाउनुहोस्
×