पहिलो त्रैमासमा ८ बैंकको निक्षेप घट्यो, १९ को बढ्यो (सूचीसहित)  

साउन, भदौ र असोज महिनामा २७ वाणिज्य बैंकमा समग्रमा कुल ६३ अर्ब ७४ करोड रुपैयाँ निक्षेप थपिएको छ । जसमा स्वदेशी मुद्रामा जम्मा ३४ अर्ब ६८ करोड रुपैयाँ थपिएको हो । असार मसान्तसम्म ती बैंकको कुल निक्षेप ४२ खर्ब ४ अर्ब रुपैयाँ रहेकोमा असोज मसान्तसम्म ४२ खर्ब ६८ अर्ब रुपैयाँ पुगेको छ ।

सो अवधिमा सनराइज बैंकमा सबैभन्दा धेरै २१ अर्ब ९० करोड रुपैयाँ निक्षेप थपिएको छ । बैंकले असोजमा व्यक्तिगत मुद्दतीमा सबैभन्दा धेरै १०.०७ प्रतिशत ब्याज घोषणा गरेको थियो । सानिमा, एनसिसी, एनआइसी एसिया, नेपाल, कुमारी र एनएमबि बैंकले पनि उल्लेख्य निक्षेप बढाएका छन् । सो अवधिमा कतिपय बैंकमा भएको निक्षेप पनि घटेको छ । राष्ट्रिय वाणिज्य बैंकको सबैभन्दा धेरै २४ अर्बले निक्षेप घटेको छ । कृषि विकास, नेपाल बंगलादेश बैंकबाट पनि ठूलै निक्षेप घटेको छ ।

पछिल्लो समय निक्षेपभन्दा कर्जा प्रवाहको दर अत्याधिक बढेपछि यतिबेला बैंकहरुमा लगानीयोग्य रकमको चरम अभाव छ । जसले गर्दा केही दिनअघि मात्रै बैंकहरुले ब्याजदर बढाएपछि राष्ट्र बैंकले हस्तक्षेप गर्नुपरेको थियो । संघका अनुसार पहिलो तीन महिनामा ६३ अर्ब निक्षेप थपिए पनि कर्जा प्रवाह भने २ खर्ब ७८ अर्बले बढेको छ । असार मसान्तसम्म २७ बैंकले कुल ३७ खर्ब २० अर्ब रुपैयाँ कर्जा प्रवाह गरेकोमा असोज मसान्तसम्म आउँदा ३९ खर्ब ९८ अर्ब रुपैयाँ पुगेको छ ।

बैंकअनुसार थप/घट भएको निक्षेप रकम अर्बमा

स्रोत: नेपाल बैंकर्स एसोसिएसन