वर्षाले बन्द गरायो औद्योगिक क्षेत्रका उद्योग, अर्बौं रुपैयाँको क्षति पुगेको उद्योगीको दाबी- अर्थ / वाणिज्य - कान्तिपुर समाचार

वर्षाले बन्द गरायो औद्योगिक क्षेत्रका उद्योग, अर्बौं रुपैयाँको क्षति पुगेको उद्योगीको दाबी

कान्तिपुर संवाददाता

विराटनगर — बेमौसमी बाढीले सुनसरी–मोरङ औद्योगिक करिडोरमा अर्बौं रुपैयाँ बराबरको क्षति पुगेको उद्योगीहरूले गुनासो गरेका छन् । उद्योगमा बाढी पसेको र विद्युत् आपूर्ति ठप्प हुँदा करिडोरका सबै उद्योग चार दिनदेखि बन्द रहेको उनीहरूको भनाइ छ ।

उद्योगमा बाढी पसेर कच्चा पदार्थ र तयारी वस्तु नष्ट हुँदा प्रत्येकजसो उद्योगमा एक करोड रुपैयाँभन्दा बढीको क्षति पुगेको उद्योगीहरूको आकलन छ । धेरैजसो उद्योगमा पसेको पानी फाल्ने काम भइरहेको र क्षतिको मूल्यांकन गर्न बाँकी रहेको मोरङ व्यापार संघका अध्यक्ष प्रकाश मुन्दडाले बताए । नेपाल विद्युत् प्राधिकरणको दुहवी ग्रिडको सेक्सनमा पानी जमेपछि मंगलबार साँझदेखि बिहीबार अपराह्नसम्म करिडोरमा विद्युत् आपूर्ति ठप्प थियो । उद्योगमा विद्युत् आपूर्ति बन्द भएसँगै बाढी पस्यो ।

करिडोरमा साना–ठूला गरी पाँच सयभन्दा बढी उद्योग छन् । तीमध्ये इटहरी, खनार, दुहवी, हात्तीमुढा र कटहरी क्षेत्रका सबै उद्योग डुबानमा परेका हुन् । उद्योग संगठन मोरङका अध्यक्ष सुयश प्याकुरेलले भने क्षतिको यकिन गर्न नसकिएको प्रतिक्रिया दिए ।

प्रकाशित : कार्तिक ५, २०७८ २२:०४
प्रतिक्रिया
पठाउनुहोस्

बक्सिङ टोली सर्बियातिर जाँदै

कान्तिपुर संवाददाता

काठमाडौँ — अन्तर्राष्ट्रिय बक्सिङ संघ (आइबा)को आयोजनामा अक्टोबर २५ देखि नोभेम्बर ६ सम्म सर्वियाको राजधानी बेलग्रेडमा हुने २१ औं आइबा वर्ल्ड मेन्स बक्सिङ च्याम्पियनसिपमा नेपालका ४ खेलाडीले प्रतिस्पर्धा गर्ने भएका छन् ।

विश्वका १ सय ५ राष्ट्रका ६ सय ५० भन्दा बढी खेलाडीले १३ तौल समूहमा प्रतिस्पर्धा गर्नेछन् । प्रत्येक तौलका स्वर्ण विजेताले एक लाख डलर, रजत विजेताले ५० हजार र कांस्य जित्ने दुई जनाले २५ हजार डलर पुरस्कार पाउनेछन् ।

नेपालबाट ४८ केजी तौलमा रविन थापा, ५७ केजीमा पुरन राई, ६३.५ केजीमा भूपेन्द्र थापा र ६७ केजीमा सनिल शाहीले प्रतिस्पर्धा गर्नेछन् । प्रशिक्षकमा प्रमुख प्रशिक्षक प्रकाश थापामगर, प्रशिक्षक किशोर लिम्बु र अफिसियलमा नेपाल बक्सिङका संघ सदस्य मानबहादुर भण्डारी र प्रनिर अधिकारी रहेका छन् । बक्सिङ टोली शुक्रबार राति फ्लाइ दुबईबाट त्यसतर्फ गएको छ ।

आइबाले ७५ वर्ष (हीरक महोत्सव) मनाउने क्रममा रहेकाले निमन्त्रणामा बक्सिङ संघका अध्यक्ष राम अवाले पनि त्यसतर्फ गएका छन् ।

नेपाली टोलीलाई युवा तथा खेलकुदमन्त्री महेश्वरजंग गहतराजले शुक्रबारै बिदाइ गरे । उनले बक्सिङको महाकुम्भमा नेपाली खेलाडीलाई पदक जित्नका लागि हौसला दिएका थिए ।


प्रकाशित : कार्तिक ५, २०७८ २१:२०
पूरा पढ्नुहोस्
प्रतिक्रिया
पठाउनुहोस्
×