वर्षाले बन्द गरायो औद्योगिक क्षेत्रका उद्योग, अर्बौं रुपैयाँको क्षति पुगेको उद्योगीको दाबी- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

वर्षाले बन्द गरायो औद्योगिक क्षेत्रका उद्योग, अर्बौं रुपैयाँको क्षति पुगेको उद्योगीको दाबी

कान्तिपुर संवाददाता

विराटनगर — बेमौसमी बाढीले सुनसरी–मोरङ औद्योगिक करिडोरमा अर्बौं रुपैयाँ बराबरको क्षति पुगेको उद्योगीहरूले गुनासो गरेका छन् । उद्योगमा बाढी पसेको र विद्युत् आपूर्ति ठप्प हुँदा करिडोरका सबै उद्योग चार दिनदेखि बन्द रहेको उनीहरूको भनाइ छ ।

उद्योगमा बाढी पसेर कच्चा पदार्थ र तयारी वस्तु नष्ट हुँदा प्रत्येकजसो उद्योगमा एक करोड रुपैयाँभन्दा बढीको क्षति पुगेको उद्योगीहरूको आकलन छ । धेरैजसो उद्योगमा पसेको पानी फाल्ने काम भइरहेको र क्षतिको मूल्यांकन गर्न बाँकी रहेको मोरङ व्यापार संघका अध्यक्ष प्रकाश मुन्दडाले बताए । नेपाल विद्युत् प्राधिकरणको दुहवी ग्रिडको सेक्सनमा पानी जमेपछि मंगलबार साँझदेखि बिहीबार अपराह्नसम्म करिडोरमा विद्युत् आपूर्ति ठप्प थियो । उद्योगमा विद्युत् आपूर्ति बन्द भएसँगै बाढी पस्यो ।

करिडोरमा साना–ठूला गरी पाँच सयभन्दा बढी उद्योग छन् । तीमध्ये इटहरी, खनार, दुहवी, हात्तीमुढा र कटहरी क्षेत्रका सबै उद्योग डुबानमा परेका हुन् । उद्योग संगठन मोरङका अध्यक्ष सुयश प्याकुरेलले भने क्षतिको यकिन गर्न नसकिएको प्रतिक्रिया दिए ।

प्रकाशित : कार्तिक ५, २०७८ २२:०४
प्रतिक्रिया
पठाउनुहोस्

१८ दिनपछि जेलभित्र शाहरुखका बाबु-छोराको भावुक भलाकुसारी

एजेन्सी

मुम्बइ — बलिउड स्टार शाहरुख खानले आफ्ना छोरा आर्यनलाई जेलमै पुगेर भेट गरेका छन् । अक्टोबर २ मा लागूऔषध मुद्दामा पक्राउ परेपछि आर्यनलाई  शाहरुखले पहिलो पटक भेटेका हुन् ।



बिहीबार छोरासँग भेट्न मुम्बइस्थित अर्थर रोड पुगेका शाहरुखलाई हौसला प्रदान गर्न जेल बाहिर उनका थुप्रै समर्थक भेला भएका थिए । त्यहाँ उपस्थित समर्थकहरुलाई शाहरुखले दुई हात जोडेर अभिभादन गरेका थिए । तर उनले मिडियासामु केही प्रतिक्रिया भने दिएनन् ।

इन्डिया टुडेका अनुसार जेलमा बाबु-छोराको १८ मिनेटसम्मको भेट भावुक बनेको थियो । प्रहरीले भने उनीहरुलाई गफ गर्न २० मिनेटको समय मात्रै दिएको थियो । बिहीबारको भेटभन्दा पहिले पनि उनीहरुबीच भ्वाइस कल भने भएको थियो । तर बाबु-छोराको प्रत्यक्ष भेट भने १८ दिनपछि मात्रै भएको हो ।

इन्डिया टुडेको समाचार अनुसार शाहरुखले छोरालाई जेलभित्रको खाना मन पर्छ कि पर्दैन भनेर सोधेका थिए । २३ वर्षीय आर्यनले भने त्यहाँको खाना मन नपर्ने जवाफ दिएकोसमेत समाचारमा छ । त्यसपछि शाहरुखले जेलका अधिकारीहरुसँग यदी अनुमति भए आफूले आर्यनलाई घरबाटै खाना पठाउने बताएका थिए । जेल प्रशासनको स्रोतको हवाला दिँदै इन्डिया टुडेले यसबारे समाचार लेखेको छ ।

सुरक्षागार्ड लिएर जेल पुगेका शाहरुखका लागि जेल प्रशासनलेसमेत सुरक्षाकर्मी खटाएको थियो । छोरासँगको १८ मिनेटको भलाकुसारीपछि भने शाहरुख फर्किएका थिए । छोरासँगको उनको भेटघाटलाई समर्थकहरुले प्रशंसा गर्दै आर्यनप्रति पनि सहानूभुति प्रकट गरेका छन् । आर्यनलाई भेट्न पुगेका शाहरुखको समर्थनमा ट्विटरमा उनका प्रशंसकले ह्यासट्याग नै चलाए ।

गत अक्टोबर २ मा मुम्बइस्थित समुद्री किनारमा आर्यनसहित ८ जना लागूऔषध मुद्दामा पक्राउ परेका थिए । मुम्बइ प्रहरीको लागूऔषध नियन्त्रण शाखाले यस मुद्दामा जम्मा २० जनालाई पक्राउ गरिसकेको छ । शाहरुखका समर्थकहरुले भने आर्यन निर्दोष रहेको तर उनलाई फसाइएको भन्दै प्रहरीको आलोचना गर्दैआएका छन् ।


प्रकाशित : कार्तिक ५, २०७८ २१:४७
पूरा पढ्नुहोस्
प्रतिक्रिया
पठाउनुहोस्
×