वीरगन्जका भन्सारले तीन महिनामै संकलन गरे ६८ अर्ब बढी राजस्व- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

वीरगन्जका भन्सारले तीन महिनामै संकलन गरे ६८ अर्ब बढी राजस्व

शंकर आचार्य

पर्सा — वीरगन्जस्थित २ भन्सार कार्यालयले चालु आवको त्रैमासिक अवधिमा ६८ अर्ब रुपैयाँ बढी राजस्व संकलन गरेका छन् ।

कोरोना कहरपछि आयात निर्यात व्यापार पुरानै लयमा फर्किन नसकेको अवस्था बीच पनि मुलुकको प्रमुख स्थल नाकास्थित वीरगन्ज र सिर्सिया सुक्खा बन्दरगाहले गरी यति परिमाणमा राजस्व संकलन गरेका हुन् ।

दुबै भन्सारले त्रैमासिक अवधिमा लक्ष्यभन्दा बढी नै राजस्व संकलन गरेका हुन् ।

वीरगन्ज भन्सार कार्यालयको तथ्यांकअनुसार, चालु आवको साउनदेखि असोज महिनासम्मको त्रैमासिक अवधिमा यो भन्सारले ४४ अर्ब २८ करोड ७१ लाख ३६ हजार रुपैयाँ राजस्व संकलनको लक्ष्य रहेकोमा २० प्रतिशत बढी अर्थात् ५३ अर्ब ६ करोड ९२ लाख ८७ हजार रुपैयाँ राजस्व संकलन गरेको छ ।

असोज महिनामा मात्रै यो भन्सारले २० अर्ब ५१ करोड ६१ लाख ५७ हजार रुपैयाँ राजस्व संकलन गर्न सफल भएको छ । जुन मासिक लक्ष्यभन्दा २२ दशमलव ५ प्रतिशतले बढी हो । यो महिनामा १६ अर्ब ७५ करोड १९ लाख ७ हजार रुपैयाँ राजस्व संकलनको लक्ष्य यो भन्सारले पाएको थियो ।

यता सुक्खा बन्दरगाह भन्सार कार्यालयले चालु आवको त्रैमासिक अवधिमा १२ अर्ब ५५ करोड ४ लाख ६ हजार रुपैयाँ राजस्व संकलन गरेको छ । जुन लक्ष्यभन्दा ५ दशमलव ६६ प्रतिशतले बढी हो । यस अवधिमा ११ अर्ब ८८ करोड ११ लाख ४१ हजार रुपैयाँ राजस्व संकलनको लक्ष्य यो भन्सारले पाएको थियो ।

वीरगन्ज भन्सार स्तै यो भन्सारले असोज महिनामा भने मासिक राजस्व असूली लक्ष्य भेट्टाउन सकेन । यो महिनामा ४ अर्ब २१ करोड ५७ लाख ८५ हजार रुपैयाँ राजस्व संकलनको लक्ष्य पाएको यो भन्सारले ३ अर्ब ९९ करोड ५८ लाख ८६ हजार रुपैयाँ मात्र राजस्व असूली गर्न सक्यो । जुन लक्ष्यको ९४ दशमलव ७८ प्रतिशत मात्र हो ।

वीरगन्ज भन्सार कार्यालयका प्रमुख भन्सार अधिकृत हरिहर पौडेलले असोज महिनामा चाडपर्व लक्षित सामग्रीको बढी आयात भएपछि त्रैमासिक राजस्व असुली लक्ष्य भेट्टाउन सहज भएको बताए । विशेषगरी यो महिनामा जिप, कार, भ्यानजस्ता नयाँ सवारी साधनको आयात अत्यधिक भएको उनले बताए ।

सुक्खा बन्दरगाह भन्सार कार्यालयका सूचना अधिकृत चुडामणि शर्मा कट्टेलले समग्रमा त्रैमासिक अवधिमा राजस्व असुली लक्ष्यभन्दा बढी भए पनि असोज महिनामा भने मासिक राजस्व असुली लक्ष्य भेट्टाउन समस्या भएको बताए । उनले अघिल्ला वर्षहरुमा चाडपर्व नजिकिएसँगै चाडपर्व लक्षित वस्तुहरुको आयात बढ्ने गरेकोमा यस वर्ष भने त्यस्तो नभएको बताए । कोभिड महामारीसँगै विश्वव्यापी रुपमै कतिपय वस्तुको उत्पादन र मागसमेत घटेकाले त्यसको असर देखिएको हुन सक्ने उनले बताए ।

दसैंअघि रसुवा नाका सन्चालनमा आइसकेको र दसैं लक्षित लत्ताकपडा, जुत्ता तथा अन्य चिनियाँ वस्तुहरु उक्त नाकाबाट भित्रिएकाले समेत आयातकर्ताले यो नाका प्रयोग नगरेको हुन सक्ने उनले बताए । असोज महिनामा १५ गतेसम्म राजस्व संकलन लयमै रहे पनि त्यस पछि भने ओरालो लागेको उनले बताए ।

प्रकाशित : कार्तिक ३, २०७८ १८:३५
प्रतिक्रिया
पठाउनुहोस्

सिटिजन्स बैंकका ग्राहकले आगन्तुक रिसोर्टमा छुट पाउने

कान्तिपुर संवाददाता

काठमाडौँ — सिटिजन्स बैंकका ग्राहकले बनेपास्थित आगन्तुक रिसोर्टमा छुट पाउने भएका छन् । 

बैंक र रिसोर्टबीच एक समझदारीपत्रमा हस्ताक्षर भएको छ । उक्त सम्झौताअनुसार सिटिजन्स बैंकका मोबाइल बैकिङ्ग ग्राहक, डेबिट/क्रेडिट कार्डवाहक तथा कर्मचारीले रिसोर्टमा छुट पाउनेछन् ।

बैंकले घरमै बसी नि:शुल्क मोबाइल बैकिङ्गमार्फत डेबिट कार्डको लागि आवेदन दर्ता गर्न सक्ने व्यवस्था मिलाएको छ । मोबाइल बैकिङ्गमार्फत खानेपानी, विजुली तथा इन्टरनेटको बिल भुक्तानी, प्रिपेड तथा पोष्टपेड मोबाइल बिल भुक्तानी र मुद्दती खाताको आवेदन दिन सक्ने लगायतका व्यवस्था समेत बैंकले गरेको छ ।

बैंकले देशभरका १८३ वटा शाखा, १२१ वटा ए.टि.एम. र १११ वटा शाखा रहित बैंकिङ इकाईबाट करिव साढे १२ लाख ग्राहकलाई आधुनिक बैंकिङ्ग सेवा प्रदान गर्दै आएको छ।


प्रकाशित : कार्तिक ३, २०७८ १८:३३
पूरा पढ्नुहोस्
प्रतिक्रिया
पठाउनुहोस्
×