चाडपर्व लक्षित अनुगमन बिहीबारदेखि, जिल्लामा पनि केन्द्रबाट अनुगमन टोली खटाइने

उनका अनुसार अनुगमन टोलीले आवश्यकताअनुसार सहुलियत पसलसहित विभिन्न क्षेत्रको अनुगमन गर्नेछ । यस्तो अनुगमन प्रदेश सरकार र स्थानीय तहले पनि गर्नेछन् । ‘संविधानले दिएको अधिकारअनुसार बजार अनुगमनमा स्थानीय तहलाई पनि सक्रिय बनाउने निर्णय भएको छ । गृह मन्त्रालयले सबै जिल्ला प्रशासन कार्यालयलाई निर्देशन पनि दिइसकेको छ,’ उनले भने, ‘नापतौल र गुणस्तरबारे हुने ठगीबाट बच्न गुणस्तर तथा नापतौल विभागले एक साताको सचेतना कार्यक्रम सञ्चालन गर्नेछ । त्यसपश्चात् पनि सुधार नभए ऐनअनुसार कारबाही गरिन्छ ।’ विभागले उपत्यकासँगै सबै जिल्लामा पनि केन्द्रबाट अनुगमन टोली खटाउने योजना बनाएको छ ।

काठमाडौं महानगरपालिकाले पनि दैनिक अनुगमन गर्ने जनाएको छ । अनुगमनकै लागि महानगरले विभागसँग प्रतिनिधि माग गरेको छ । ‘महानगरले गर्ने अनुगमनमा कारबाहीको अधिकार हुँदैन, त्यसैले वाणिज्यसँग अनुगमन निरीक्षक माग गरेको छ,’ महानिर्देशक पौडेलले भने, ‘त्यहाँबाट पनि २/३ टोलीबाट अनुगमन हुन्छ ।’

विभागका प्रवक्ता शिवराज सेढाईंले बजार अनुगमन दैनिक भइरहेको दाबी गर्छन् । उनका अनुसार अनुगमन गर्नै सामान्य प्रशासन मन्त्रालयबाट १०/१२ जना कर्मचारी थपिएका छन् । ‘केन्द्रीय अनुगमन समितिको निर्णयअनुसार नै अनुगमन भइरहेको छ । एउटा टोली विभागमै हुन्छ, केही उजुरी/गुनासो भए तत्काल अनुगमन हुन्छ,’ उनले भने, ‘अन्य टोलीले दसैंमा कारोबार हुने वस्तु, लत्ताकपडा, मसला, खाद्यन्न, मासु पसलमा अनुगमन गरिरहेका छन् ।’

अनुगमनको क्रममा मुख्यत: बिलबिजक र स्टिकरको समस्या देखिएको उनले बताए । ‘त्यस्ता व्यवसायीलाई ५ हजारदेखि २० हजार रुपैयाँसम्म जरिवाना भइरहको छ,’ उनले भने । उपत्यकामा करिब साढे ४ लाख पसल छन् । अनुगमन निरीक्षक सीमित भएकाले अहिले भइरहेको अनुगमन सांकेतिक मात्रै रहेको विभागकै भनाइ छ । ‘सरकारले गर्ने अनुगमन सांकेतिक हो । ठग्न पाइँदैन, सर्वसाधारणलाई ठगी गरे कारबाही हुन्छ भन्ने व्यवसायीलाई सचेत गराउनु यसको उद्देश्य हो,’ उनले भने ।