विकास बैंकमा पनि निक्षेप संकलनभन्दा कर्जा वृद्धि दोब्बर- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

विकास बैंकमा पनि निक्षेप संकलनभन्दा कर्जा वृद्धि दोब्बर

कान्तिपुर संवाददाता

काठमाडौँ — वाणिज्य बैंकहरूमा जस्तै विकास बैंकहरुमा पनि निक्षेप संकलनको तुलनामा कर्जा प्रवाह दर उच्च देखिएको छ । विकास बैंकहरूको साप्ताहिक निक्षेप संकलन र कर्जा प्रवाहको तथ्यांकले यस्तो देखाएको हो ।

जसअनुसार गत साता मात्र विकास बैंकहरूले थप २ अर्ब ४८ करोड रुपैयाँ निक्षेप संकलन गरेका छन् । सोही अवधिमा ती विकास बैंकहरूको थप कर्जा प्रवाह ५ अर्ब ५१ करोड रुपैयाँ छ । गत साता विकास बैंकहरूको कूल निक्षेप ०.५५ प्रतिशतले बढेको छ भने कूल कर्जा प्रवाह १.३९ प्रतिशतले बढेको डेभलपमेन्ट बैंकर्स एसोसिएसनले जनाएको छ ।

गत शुक्रबारसम्म विकास बैंकहरूको कूल निक्षेप ४ खर्ब ५१ अर्ब ८१ करोड रुपैयाँ छ । अघिल्लो साताको अन्त्यमा यस्तो निक्षेप ४ खर्ब ४९ अर्ब ३३ करोड रुपैयाँ थियो ।

यस्तै, गत सातासम्म ४ खर्ब २ अर्ब ४० करोड रुपैयाँ रहेको विकास बैंकहरुको कूल कर्जा प्रवाह अघिल्लो साताको अन्त्यसम्म ३ खर्ब ९६ अर्ब ८८ करोड रुपैयाँ थियो ।

गत असारसम्म नेपालमा राष्ट्रिय र क्षेत्रीय स्तरका गरी १८ वटा विकास बैंक छन् । तीमध्ये १५ वटाको विवरण मात्र यहाँ समावेश गरिएको एसोसिएसनले जनाएको छ ।

प्रकाशित : आश्विन ६, २०७८ १७:०२
प्रतिक्रिया
पठाउनुहोस्

डा. भक्तमानको अपहरणमा संलग्‍न पण्डित पक्राउ

कान्तिपुर संवाददाता

काठमाडौँ — चितवनका चिकित्सक (बीपी कोइराला मेमोरियल क्यान्सर अस्पतालका तत्कालीन कार्यकारी निर्देशक) डा. भक्तमान श्रेष्ठको अपहरणमा संलग्न रही फरार एक व्यक्ति लामो समयपछि पक्राउ परेका छन् । 

प्रहरीको कन्द्रीय अनुसन्धान ब्यूरो (सिआइवी) को टोलीले नुवाकोट जिल्लाको विदुर नगरपालिका–१२ मुलाबारीबाट स्थानीय ४५ वर्षीय राजेन्द्र पण्डितलाई पक्राउ गरेको हो । अपहरण तथा शरीर बन्धक कसुरमा उच्च अदालत हेटौँडा इजलासको २०७० माघ २१ को फैसलाले उनलाई नौ वर्ष कैद र ५० हजार रुपैयाँ जरिवाना सुनाएको थियो ।

तत्कालीन मुलिकी ऐन, (२०२०) को अपहरण तथा शरीर बन्धक लिनेको महलको ३ नं बमोजिम सात वर्ष कैद र सोही महलको ७ नं बमोजिम दुई वर्ष थप कैद गरी जम्मा नौ वर्ष कैद तोकिएको थियो । त्यसपछि पण्डित फरार हुँदै कहिले नेपाल त कहिले भारतमा लुकेर बसेका थिए । पछिल्लो समयमा नेपाल प्रवेश गरेको सूचना पाएपछि केही अघिदेखि सिआइवीको टोलीले उनको खोजी थालेकोमा मङ्गलबार पक्राउ परेका हुन् । उनलाई फैसला कार्यान्वयनका लागि आज जिल्ला अदालत काठमाडौँमा पेस गरिएको सीआईबीका प्रवक्ता प्रहरी उपरीक्षक श्यामकुमार महतोले जानकारी दिए ।

अपहरणमा संलग्न नुवाकोटका बद्रिप्रसाद ढुंगाना, काठमाडौंका गौतम योञ्जन, भारतका रोहित पालिवाललगायत पक्राउ परिसकेका छन् । मुख्य अभियुक्त भनिएका नुवाकोटका भीमसेन पण्डित अझै फरार छन् । भारतमा रहेका उनको खोजी जारी रहेको प्रहरीले जनाएको छ । राजेन्द्र भने भीमसेनका नजिकका मान्छे हुन् । उनी डा श्रेष्ठको अपहरणपछि राख्ने ठाउँको व्यवस्थापनमा संलग्न रहेको प्रहरीले जनाएको छ ।

२०६७ जेठ ४ मा चितवनको भरतपुर महानगरपालिका–१०, साबिकको भरतपुर नगरपालिका–१० चौबिसकोटीस्थित चितवन अस्पतालबाट घर फर्कँदै गर्दा स्थानीय हाकिमचोक नजिकको भित्री सडकबाट डा श्रेष्ठलाई अपहरण गरिएको थियो ।

प्रहरी प्रधान कार्यालयका अनुसार अपहरणपछि उनलाई काठमाडौँ र नुवाकोटका विभिन्न ठाउँमा बन्धक बनाई राखिएको थियो । अपहरण भएको १८ दिनपछि फिरौती लिएर डा श्रेष्ठलाई अपहरणकारीले छाडेका थिए । अपहरणको चार दिनपछि उनको ब्रिफकेस चितवनको मुग्लिन नजिक घोप्टेभिरमा फेला परेको थियो ।

अपहरणकारीलाई उनका परिवारले फिरौतीबापत भारतमा साढे तीन किलो सुन (तत्कालीन मूल्यअनुसार एक करोड १० लाख रुपैयाँ पर्ने) बुझाएपछि डा श्रेष्ठ २०६७ जेठ २२ गते धादिङको माझिकोटबाट अपहरणमुक्त भएका थिए । त्यो बेला उनीहरुले कल बाइपास गरेर परिवारसँग सम्पर्क गर्ने गरेका थिए । यसअघि काठमाडौँ महानगरपालिका–४ बस्ने ४१ वर्षीय गौतम योञ्जनलाई पनि सिआइवीको टोलीले नै काठमाडौंबाट पक्राउ गरेको थियो ।

प्रकाशित : आश्विन ६, २०७८ १६:५९
पूरा पढ्नुहोस्
प्रतिक्रिया
पठाउनुहोस्
×