हेटौंडा सिमेन्टले घटायो मूल्य

निजी क्षेत्रका उद्योगले सिमेन्टको मूल्य घटाएसँगै हेटौंडा सिमेन्टले पनि मूल्य समायोजन गरेको हेटौंडा सिमेन्ट उद्योगका महाप्रबन्धक प्रेमशंकर सिंहले जानकारी दिए । निजी क्षेत्रका उद्योगले बजारको मागका आधारमा रणनीतिक रूपमा मूल्य निर्धारण गर्ने गरेको उनको भनाइ छ । हेटौंडा सिमेन्टले पनि अब मासिक रूपमा बजारको माग र निजी क्षेत्रका उद्योगले निर्धारण गरेको मूल्यसँग प्रतिस्पर्धा गर्ने गरी मूल्य समायोजन गर्ने उनले बताए ।

हेटौंडाकै शिवम् सिमेन्ट उद्योगले ओपीसी सिमेन्ट प्रतिबोरा ६ सय ८० र रिद्धिसिद्धि सिमेन्ट उद्योगले ओपीसी सिमेन्ट प्रतिबोरा सात सय रुपैयाँमा बिक्री गरिरहेका छन् । निजी क्षेत्रका उद्योगले नगद भुक्तानी गर्दा नगदै छुट र बिक्रीका आधारमा बोनस दिने गरेको सिमेन्टको कारोबार गर्दै आएको नारायणी बहुउद्देश्यीय सहकारी संस्था लिमिटेडका अध्यक्ष रामहरि न्यौपानेले जानकारी दिए । सरकारी स्वामित्वको हेटौंडा सिमेन्ट उद्योग तीन वर्षदेखि घाटामा छ । सिमेन्टको बिक्रीमा आएको गिरावट र कारोनाको असहज परिस्थितिका कारण उद्योगले लगातार आर्थिक रूपमा ठूलो नोक्सानी बेहोरिरहेको छ ।

‘आर्थिक वर्ष २०७७/७८ मा तीन करोड रुपैयाँ घाटा अनुमान गरिएको छ । यकिन हिसाब आइसकेको छैन,’ महाप्रबन्धक सिंहले भने । २०७६/७७ मा २४ करोड र २०७५/७६ मा उद्योगले १६ करोड ६५ रुपैयाँ घाटा बेहोरेको थियो । ‘दुई वर्षदेखि निरन्तर कोरोनाको असहज परिस्थितिका कारण योजनाअनुसार सिमेन्ट उत्पादन तथा बिक्री हुन सकेको छैन । समय–समयमा उद्योगको मेसिनमा आउने समस्याले पनि घाटा भइरहेको हो,’ महाप्रबन्धक सिंहले भने । लामो समयपछि उद्योगले नाफा गर्न थालेको अवस्थामा कोरोना र मेसिनमा आएको समस्याले उद्योगलाई थप क्षति पुगेको उनको भनाइ छ ।