चाडवाड लक्षित सहुलियत पसल सुरु- अर्थ / वाणिज्य - कान्तिपुर समाचार

चाडवाड लक्षित सहुलियत पसल सुरु

कान्तिपुर संवाददाता

काठमाडौँ — सरकारले चाडवाडलाई लक्षित गर्दे शुक्रबारदेखि सहुलियत पसल सुरु गरेको छ । खाद्य व्यवस्था तथा व्यापार कम्पनीले शुक्रबार औपचारिक कार्यक्रम गरेर ३९ जिल्लाका ४३ आउटलेटबाट छुट दिएको जनाएको छ ।

खाद्यको सहुलियत पसलमा दाल/चामलमा प्रतिकिलो ५ रुपैयाँ, खाने तेलमा प्रतिलिटर ५ देखि १० रुपैयाँ, कर्णालीको सिमी र फापरमा १० रुपैयाँ छुट पाइने जनाएको छ । कम्पनीका बिक्री वितरण विभाग प्रमुख भीम थापाका अनुसार उपत्यकामा थापाथली, रामशाहपथ, ललितपुरको नख्खु र भक्तपुरको सूर्यविनायकका आउटलेटबाट छुट दिइने छ ।

खाद्यले अनलाइन सेवाबाट समेत खाद्य वस्तुमा छुट दिइ निःशुल्क होमडेलिभरी गर्ने जनाएको छ । यस्तै, खसीबोकामा पनि छुट दिएको छ । यद्यपी खसीबोका घटस्थापनासम्म काठमाडौं आइपुग्ने जनाएको छ ।

खाद्यसँगै साल्ट ट्रेडिङ कर्पोर्रेसन्सले पनि मुलुकभर ३२ आउटलेटबाट छुट दिएको जनाएको छ । साल्टका सहमहाप्रबन्धक कुमार राजभण्डारीका अनुसार उपत्यकामा रहेका ६ आउटलेट (कालीमाटी -२, कोटेश्वर, सतुङगल, जावलाखेल र भक्तपुर) र ३ वटा घुम्त सेवा सञ्चालन गरिनेछ ।

‘सहुलियत पसलबाट नुन प्रतिकिलो १८ र चिनी ७९ रुपैयाँमा बिक्री गर्देछौ,’ उनले भने, ‘प्रति ग्राहक नुन ६ र चिनी २ केजी दिन्छौँ ।’ यी बाहेक दाल, चामल, तेल लगायतमा पनि बजारभाउ भन्दा सस्तोमा बिक्री गर्ने उनले बताए । दुग्ध विकास संस्थान (डीडीसी)ले पनि घीउ र पनिरमा छुट दिएको छ ।

डीडीसीले लैनचौर, न्युरोड, खुमलटारसगै डीडीसीको विभिन्न आयोजना/आउटलेटबाट छुट दिएको महाप्रबन्धक रुद्र पौडेलले बताए । ‘डीडीसीले एक लिटर घीउमा ५० रुपैयाँ, पनिर २०० ग्राममा ५ रुपैयाँ, आधा केजीमा १० रुपैयाँ र १ किलोमा २० रुपैयाँ दिएका छौ,’ उनले भने ।

प्रकाशित : आश्विन १, २०७८ १२:४४
प्रतिक्रिया
पठाउनुहोस्

महामारीमै जुर्‍यो अवसर

पर्वत पाेर्तेल

काँकडभिट्टा — धेरैका लागि अभिशाप बनेको कोरोना महामारीको समय कसैका लागि भने अवसर बनेको छ । झापा बाहुनडाँगीका युवा विकास प्रधानका लागि यो अवसर बन्यो । दुई वर्षयता कोरोना संक्रमणबाट धेरैले ज्यान गुमाए । उद्योगधन्दा चौपट बन्यो ।

उक्त समयमा कतिपय मान्छे होटल व्यवसायबाट पलायन हुँदै थिए । प्रधान भने त्यसै बेला नयाँ सोच र योजनाका साथ होटल सञ्चालनको तयारीमा जुट्दै थिए ।

‘महामारीलाई दुःखको रूपमा हैन, अवसरको रूपमा ग्रहण गरें’, प्रधानले सुनाए । नेपाल–भारत सीमावर्ती मेची नदीदेखि करिब ५ सय मिटर वरैको नेपाली भूभागमा उनको २७ कठ्ठा जमिन छ । त्यही जमिनमध्ये करिब ६ कठ्ठामा होटल व्यवसाय सुरु गरे । नाम जुराए, ‘दशगजा’ । दशगजा होटललाई उनले मजाले सजाएका छन् । प्रवेशद्वारमै बयलगाडाको चक्का छ । वरिपरि सजाइएको चोयाको डोकोले होटललाई थप खुलाएको छ । दशगजा उनको पुरानो योजना हो । करिव दस वर्षअघिदेखि उनले दशगजानजिकै दशगजा होटल र होमस्टे सञ्चालनको योजना बुनेका थिए । भदौ १ बाट उनको योजना कार्यान्वयनमा आयो ।

‘श्रीमती घरमै हुँदादेखि मेरो दिमागमा यो योजना घुमेको थियो’, प्रधानले भने, ‘श्रीमती विदेश बसेर फर्किएपछि बल्ल पूरा भयो ।’ प्रधानकी पत्नी पिङ्की १० वर्ष इजराइल बसेर हालै घर फर्किइन् । पत्नीसँगको सहकार्यमा उनले इजराइलको कमाइ होटलमा खर्चिए । उनले होटल निर्माणमा करिब ३५ लाख रुपैयाँ लगानी गरेको जनाए । उनका अनुसार निकट भविष्यमा करिब २ करोड रुपैयाँ खर्चिएर होटललाई व्यवस्थित गर्ने योजना छ । ‘होटललाई अत्याधुनिक बनाउने योजना छ’, उनले सुनाए, ‘स्विमिङ पुल, माछापोखरी आदि निर्माण गर्छु, होटललाई यो क्षेत्रकै उत्कृष्ट बनाउँछु ।’

बाहुनडाँगी हात्ती प्रभावित क्षेत्र पनि हो । हात्तीका कारण धेरै सर्वसाधारणले दुःख भोगेका छन् । तर, हात्तीलाई उनले पर्यटनसँग जोडे । होटलमा दुईतले टावर बनाए । टावरमाथि चढेर हात्ती हेर्न सकिने चाँजोपाँजो मिलाए । ‘हात्ती हेर्नकै लागि अहिले साँझको समयमा भीड लाग्ने गरेको छ’, पिङ्कीले भनिन् । हात्ती हेर्न दूरबिन पनि राखिएको छ । फोटो खिच्न चाहनेका लागि क्यामेरा उपलब्ध छ । यो होटलको अर्को विशेषता यहाँ पाक्ने सबै परिकार रैथाने उत्पादनको छ ।

उनको ‘गोठदेखि भान्छासम्म’ भन्ने अर्को अभियान छ । त्यही अभियानलाई साकार पार्ने योजनाअनुसार अर्ग्यानिक तरकारीदेखि कुखुरा, हाँस, टर्की, खसी र बंगुरसम्म पालेका छन् । लोकल कुखुरा खान चाहने ग्राहकलाई खोरबाट कुखुरा झिक्छन् अनि काटेर ख्वाउँछन् । ‘एक हजार रुपैयाँ तिरेपछि एक किलो लोकल कुखुराको मिठो मासु उपलब्ध गराउँछौं’, प्रधानले भने ।

प्रकाशित : आश्विन १, २०७८ १२:३७
पूरा पढ्नुहोस्
प्रतिक्रिया
पठाउनुहोस्
×