बुधबारबाट बजेट होलिडे !- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

बुधबारबाट बजेट होलिडे !

बजेट पास नहुँदा तीन वर्षअघि अमेरिकाका सरकारी कार्यालय ३५ दिन बन्द भएजस्तै अवस्था नेपालमा पनि आएकाे छ  
कान्तिपुर संवाददाता

काठमाडौँ — प्रतिनिधिसभाले बजेटको प्रतिस्थापन विधेयक टुंगो लगाउन नसकेपछि बुधबारबाट सरकारी खर्च गर्ने बाटो बन्द हुने भएको छ । अब सरकारले करमात्र उठाउन सक्छ, खर्च गर्न सक्दैन । यसअघि ल्याएको बजेट अध्यादेश संसद्‌ चलेको अवस्थामा ६० दिनभित्र प्रतिस्थापन विधेयकमार्फत पारित गर्नुपर्ने प्रावधान छ । ६० दिनको समय बुधबार सकिँदैछ ।

बजेटबारे कुनै नहुँदा सार्वजनिक निकाय बन्द गर्नुपर्ने र ‘बजेट होलिडे’ तर्फ मुलुक जाने पूर्वअर्थसचिव शान्तराज सुवेदी बताउँछन् । ‘अमेरिकामा तीन वर्षअघि बजेट पास नभएर मुलुकका सबै सरकारी कार्यालय बन्द गरिएजस्तै अवस्था आउन सक्छ,’ उनले भने ।

तत्कालीन अमेरिकी राष्ट्रपति डोनाल्ड ट्रम्पले मेक्सिकोसँगको सीमामा पर्खाल लगाउने कार्यक्रमसहित बजेट पेस गर्दा संसद्‌मा तोकिएकै मितिमा बजेट पास हुन नसकेर सार्वजनिक खर्च गर्न नमिलेपछि ३५ दिन सरकारी कार्यालय बन्द भएका थिए । ‘यही भदौ ३० भित्र बजेट पास नभए हाम्रोमा पनि हुने यस्तै हो,’ सुवेदीले भने ।

प्रकाशित : भाद्र २९, २०७८ १५:५१
प्रतिक्रिया
पठाउनुहोस्

गण्डकीका मुख्यमन्त्री नेपालीद्वारा बाढी पहिराबाट पुगेको क्षतिबारे प्रदेशसभालाई जानकारी

प्रतीक्षा काफ्ले

कास्की — गण्डकी प्रदेशका मुख्यमन्त्री कृष्णचन्द्र नेपालीले बाढी पहिराबाट पुगेको क्षतिबारे प्रदेशसभालाई जानकारी गराएका छन् ।

प्रदेश सभालाई मंगलबार सम्बोधन गर्दै मुख्यमन्त्रीले विकास निर्माण, जलविद्युत् परियोजना, घर, गोठ लगायतमा ठूलो क्षति पुगेको बताए । भौतिक क्षतिको विवरण ११ वटै जिल्ला प्रशासन कार्यालय र ८५ वटै स्थानीय तहबाट आउनेक्रम जारी रहेको भन्दै उनले असार १ यता ५ सय २ घर, ५ सरकारी कार्यालय, ७ विद्यालय, ६ सामुदायिक भवन, २५ हाइड्रोपावर, ३६ पक्की पुलमा क्षति पुगेको बताए ।

यस्तै, १ सय ७६ वटा सडकमा क्षति हुँदा यातायात नै ठप्प भएको उनले जानकारी दिए । ‘विपद्को समयमा ७ सय ३१ घरका ३ हजार ७ सय ७० जनालाई सुरक्षित स्थानमा स्थानान्तरण गरेका छौं’, उनले भने, ‘१२ सय ५ घरका ४ हजार ७ सय ६५ जनालाई ७० लाख ६१ हजार ८ सय ९३ रुपैयाँबराबरको जिन्सी सामान र ४१ लाख ८५ हजार नगद गरी १ करोड २१ लख ४६ हजार ९ सय ७३ रुपैयाँ बराबरको राहत वितरण गरेका छौं ।’ असार १ देखि हालसम्म गण्डकीमा बाढी पहिराका कारण ३३ जनाले ज्यान गुमाएका छन् भने २ बेपत्ता र ४४ जना घाइते भएका छन् ।

विपद् व्यवस्थापनमा तीन तहकै सरकारले आ-आफ्नो जिम्मेवारी पूरा गरेको उनले बताए । विपद्‍‌मा ज्यान गुमाएका परिवारलाई संघीय सरकारले २ लाख र प्रदेशले ५० हजार रुपैयाँ राहत दिँदै आएको छ । यस्तै, बेपत्ताका परिवारलाई तत्कालीन राहत, खाद्यान्नका लागि प्रतिपरिवार १५ हजार, अस्थायी आवासका लागि २५ हजार र उपचार खर्च ५० हजार रुपैयाँ प्रदेश सरकारले उपलब्ध गराउँदै आएको छ ।

बाढीपहिरोका कारण घर पूर्णरुपमा क्षति भएमा प्रदेशले १ लाख रुपैयाँ दिने निर्णय पनि गरेको बताउँदै उनले दुर्गम र हिमाली जिल्लामा पूर्ण रुपमा क्षति भएका प्रतिघरलाई २ लाख रुपैयाँ दिने निर्णय गरेको बताए ।

बाढीपहिरोकै कारण गोरखाको चुमनुब्री र मनाङमा खाद्यान्न संकट भएपछि यसको व्यवस्था पनि सरकारले गरेको मुख्यमन्त्रीले बताए । उनका अनुसार अविरल वर्षाबाट हुने क्षति रोक्न प्रदेश सरकाले प्रदेशका ८५ वटै स्थानीय तहलाई ५/५ लाख रुपैयाँ प्रदान गरेको छ । यस्तै, ११ वटै जिल्लामा ग्यावियन जालीका लागि २०/२० लाख रुपैयाँ उपलब्ध गराएको उनले जनाए ।


गण्डकी प्रदेशसभाको मंगलबारको बैठकलाई सम्बोधन गर्दै मुख्यमन्त्री कृष्णचन्द्र नेपाली । तस्बिर : प्रतीक्षा काफ्ले/कान्तिपुर ।

प्रकाशित : भाद्र २९, २०७८ १५:४१
पूरा पढ्नुहोस्
प्रतिक्रिया
पठाउनुहोस्
×