‘रेल सेवा सम्झौता संशोधनले व्यापार तथा पारवहन उचाइमा’
काठमाडौँ — नेपाल–भारत रेल सेवा सम्झौता संशोधनले व्यापार तथा पारवहन उचाइमा पुग्ने निजी क्षेत्रले बताएको छ । नेपाल उद्योग वाणिज्य महासंघलगायत निजी क्षेत्रका विभिन्न छाता संगठनले शनिबार विज्ञप्ति जारी गर्दै सरकारी निर्णयको स्वागत गरेका छन् ।
संशोधनले तेस्रो मुलुकसँगको व्यापारमा समेत सहजता ल्याउने उनीहरूको भनाइ छ । ‘बहुप्रतीक्षित नेपाल र भारतबीचको रेल सेवा सम्झौतामा संशोधन भई दुवै देशका सरकारतर्फबाट हस्ताक्षरसमेत भएको छ । संशोधनसँगै अब सबै रेल सेवा प्रदायकले नेपालबाट भारतको समुद्री बन्दरगाहसम्म दुईतर्फी ढुवानी गर्न पाउनेछन्,’ महासंघले जारी गरेको विज्ञप्तिमा भनिएको छ, ‘यसबाट दुवै देशबीचको व्यापार तथा पारवहन सम्बन्ध थप नयाँ उचाइमा पुग्ने विश्वास लिएका छौं ।’ यो मुद्दालाई हरेक औपचारिक–अनौपचारिक भेटवार्तामा लामो समयदेखि निरन्तर उठाइरहेको महासंघको दाबी छ ।
सम्झौताअनुसार नेपाललक्षित पारवहन कार्गो ढुवानीका लागि नेपाल रेलवे कम्पनीको स्वामित्वमा रहने रेल तथा वागनले वीरगन्ज र विराटनगरदेखि कोलकाता, हल्दियासम्म रेल सेवा दिन सक्नेछन् । हाल वीरगन्जसम्म रेल सेवा उपलब्ध भएकामा विराटनगर, भैरहवा र इनरुवामा रेल सम्बद्ध पूर्वाधार तयार भएपछि रेल सेवा उपलब्ध हुने गरी र नेपाल–भारत सीमाका अन्य पारवहन बिन्दु तथा द्विपक्षीय व्यापार नाकामा सहमतिका आधारमा रेल सेवा विस्तार हुँदै जानेछ । यो सुविधाले तेस्रो मुलुकसँगको व्यापारमा सहजता आउने महासंघले जनाएको छ ।
नेपाल–भारत उद्योग वाणिज्य संघले पनि रेल सेवा सम्झौतामा संशोधनको स्वागत गरेको छ । ‘नेपाल–भारत व्यापारलाई समयानुकूल मूल्य प्रतिस्पर्धी बनाउन नभई नहुने विषय पनि भएकाले सम्झौतामा संशोधन भई एलओई आदानप्रदान हुनु सुखद हो,’ संघले जारी गरेको विज्ञप्तिमा भनिएको छ ।
