दोहोरो अंकले घट्यो नेप्से, कारोबार रकम साढे ४ अर्बमा सीमित
काठमाडौँ — अघिल्लो दिनको तुलनामा सोमबार सेयर कारोबार मापक नेप्से परिसूचक दोहोरो अंक (११.७८ अंक)ले घटेको छ । यो वृद्धिसँगै समग्र नेप्से परिसूचक २ हजार ८ सय २२.८३ विन्दुमा ओर्लेको छ । अघिल्लो दिनको तुलनामा यो ०.४२ प्रतिशतले कम हो ।
आइतबार करिब साढे ८ अंकले घटेको नेप्सेमा सोमबार पनि सोही प्रवृति दोहोरिएको हो । आइतबार नेप्से ८.४८ अंकले घटेपछि २ हजार ८ सय ३४.५२ विन्दुमा बन्द भएको थियो ।
नेप्से परिसूचकसँगै सोमबार कारोबार रकममा पनि उल्लेख्य कमी आएको छ । सो दिन सेयर बजारमा ४ अर्ब ५८ करोड रुपैयाँ बराबरको सेयर कारोबार भएको छ । आइतबार ५ अर्ब ५ करोड रुपैयाँ बराबरको सेयर कारोबार भएको थियो ।
करिब ५३ हजार कारोबारबाट २ सय २४ कम्पनीका १ करोड ६३ हजार ६ सय ३६ कित्ता सेयर किनबेच भए । ती किनबेचबाट करिब साढे ४ अर्ब रुपैयाँ बराबरको सेयर कारोबार भएको छ । नेप्से घटेपछि सेयर बजारको आकार कुल बजार पुँजीकरण पनि खुम्चिएर ३९ खर्ब २२ अर्ब रुपैयाँमा सीमित भएको छ । आइतबार कूल बजार पुँजीकरण ३९ खर्ब ३७ अर्ब रुपैयाँ थियो ।
प्रकाशित : असार २१, २०७८ १५:४४