नेपाल वायुसेवा निगमका अध्यक्षद्वारा राजीनामा- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

नेपाल वायुसेवा निगमका अध्यक्षद्वारा राजीनामा

कान्तिपुर संवाददाता

काठमाडौँ — नेपाल वायुसेवा निगमको संचालक समितिका अध्यक्षबाट पूर्वसचिव सुशील घिमिरेले राजीनामा दिएका छन् । उनले बिहीबार संस्कृति, पर्यटन तथा नागरिक उड्डयनमन्त्री उमाशंकर अरगरियालाई राजीनामा बुझाएको कान्तिपुरसँग बताए ।

उनलाई ०७७ वैशाख २ गते पर्यटनमन्त्री योगेश भट्टराईले मासिक डेढ लाख रुपैयाँ सेवासुविधासहित कार्यकारी अध्यक्षको जिम्मेवारी दिएका थिए । घिमिरेअघि निगमको संचालक समिति अध्यक्षमा पर्यटन सचिव अध्यक्ष रहने व्यवस्था थियो । घिमिरेललाई ल्याइने भएपछि यो नियम संशोधन गरिएको थियो ।

घिमिरे कार्यकारी अध्यक्ष भएको ७ महिनापछि तल्कालीन पर्यटनमन्त्री भट्टराईले निगमको संचालक समितिमा सदस्य रहेका डिमप्रसाद पौडेललाई निगमको महाप्रबन्धक नियुक्त गरेका थिए । पौडेल महाप्रबन्धक नियुक्त भएपछि घिमिरे संचालक समितिको अध्यक्षमात्रै रहँदै आएका थिए ।

‘म रिटार्यड मान्छे । पहिले पनि खोजेर निगम गएको थिइनँ,’ राजीनामा बुझाएको भोलिपल्ट शुक्रबार साँझ घिमिरेले भने, ‘अब म आराम गरेर बस्छु । तत्काल कहींकतै जादिनँ ।’ उनले आफूले योगेश भट्टराई छँदै र उनी हटेपछि पर्यटनमा मन्त्री भई आएका भानुभक्त ढकाललाई निगमबाट निस्किन खोजेको तर, वातावरण नमिलेको बताए । ‘अहिले मलाई निगमबाट निस्किनँ एकदम सही समय लागेकाले नयाँ मन्त्रीलाई राजीनामा दिएको छु । उहाँलाई यसअघि कहिल्यै भेटेको थिइनँ । हिजै चिनजान भयो ।’

कार्तिकमा महाप्रबन्धकमा ल्याइएका एमाले पृष्ठभूमिका पेसाले बेलायतबाट चार्टड एकाउन्टेन्ट (एसीसीए) पौडेलको अझै तीन वर्ष कार्यकाल बाँकी नै छ । गएको असारमा निगमको संचालक समिति सदस्य भएका महाप्रबन्धक पौडेललाई सरकारले नियुक्त गरिएको ७ महिनापछि जेठ १३ गतेको मन्त्रिपरिषद् बैठकबाट मासिक २ लाख ८५ हजार कररहित सेवा तोकेको थियो । करसहितको उनको तलब मासिक सेवा सुविधा ४ लाख हाराहारी रहेको निगको संचालक समितिले जनाएको छ ।

कोरोना महामारीमा पर्यटनको सहमतिमा अर्थ मन्त्रालयले तोकेको यो तलब स्केल निगमका भूतपूर्व कार्यकारी अध्यक्ष तथा प्रबन्ध निर्देशकहरुको तुलनामा हालसम्मकै सबैभन्दा धेरै भएको मन्त्रालयका एक सहसचिवले बताए ।

प्रकाशित : जेष्ठ २८, २०७८ २१:४८
प्रतिक्रिया
पठाउनुहोस्

गर्मी छल्न खोज्दा पोखरीमै गयो ५ बालिकाको ज्यान

सन्तोष सिंह

धनुषा — धनुषाको मुखियापट्टी मुसरनिया–६ की १२ वर्षीया लक्ष्मीनिया यादव शुक्रबार बिहानै ट्युसन पढेर घर फर्के । घर पुगेर रोटी तरकारी खाएपछि साथीहरुसँग बाख्र लिएर चौरी (खेतको ठूलो फाँट) तर्फ लागे । बाख्रा चराउने समूहमा १० देखि १४ वर्षसम्की ५ बालिका र ३ बालक थिए । 

खेतमा बाली नभएका कारण बाख्रा छोडेर समूहमै उनीहरु खेल्न थाले । मध्याह्नको घाम चर्को भएपछि खेल्दै गरेका बालबालिकाहरु तिर्खाए । प्यास मेट्न सडक छेउको कलमा पानी खान पुगे । पानी खाएर पनि लक्ष्मीनिया र उनका साथीको प्यास मेटिएन । चौरीतर्फ फर्किंदै गर्दा पाँचै जनाले नुहाउने योजना बनाए । लक्ष्मीनियाले ५ जना साथी हात जोडरे समूहमै पोखरीमा हाम फाले ।

गर्मीमा नुहाएर शितलताको आन्नद लिन पोखरीमा हाम फालेकी नातिनीको ज्यान गएपछि भकानिँदै हजुरबुबा रामलक्ष्मण यादवले भने, ‘एकमात्रै नातिनी थिइ । दुलारी थिइ । गरिब भए पनि उनलाई पढाएर ठूलो बनाउने सपना थियो । सबै सपना पोखरीमै डुब्यो ।’ उनका अनुसार लक्ष्मीनिया कहिलेकाहीं बाख्रा चराउन जान्थिन् ।

शुक्रबार लक्ष्मीनियासँगै पोखरीमा डुबेर ५ बालिकाको मृत्यु भएको छ । उनीहरुसँगै रहेको ३ जना बालकको ज्यान जोगिएको स्थानीय अरुण यादवले बताए । साना २ जना बालकलाई डुब्नै लाग्दा अर्काले बाहिर तानेर ज्यान जोगाएको यादवले बताए ।

निर्माणधीन पोखरीमा वर्षा हुँदा जमेको पानीमा डुबेर उनीहरुको मृत्यु भएको हो । पोखरीमा डुबेर पल्टु यादवको १२ वर्षीया छोरी लक्ष्मीनिया, जोगिन्द्र यादवका १० वर्षीया छोरी चन्द्रकुमारी भगत, राजगिर पुर्वेको १३ वर्षीया छोरी मन्जु, जगरनाथ ठाकुरीको १२ वर्षीया नातिनी चाँदनी र उतीम सहनीको १२ वर्षीया छोरी ललिता सहनीको मृत्यु भएको प्रहरी नायव उपरीक्षक मकेन्द्र मिश्रले बताए । पोखरीमा डुबेर मृत्यु भएका बालिकाहरुको शव स्थानीयले निकालेका थिए ।

भावविह्वल परिवारजन

'गरिब परिवारका बालबालिका बाख्रा चराउन जाँदा पहिले पनि जमेको पानीमा नुहाउने गर्थे', प्रहरी नायव उपरीक्षक मिश्रले भने,‘बच्चाहरु डुबेर मृत्यु भएको पाखेरी खन्ने क्रममा रहेको छ । पोखरी पूर्वतर्फ ५ फिटमात्रै गहिरो छ । पश्चिमतर्फ १० फिट गहिरो छ । पश्चिम तर्फबाट हाम फालेका बालिकाहरु निस्किन पाएन ।’ बालिकाहरुसँगै रहेका बालकको भने ज्यान जोगिएको मिश्रले बताए ।

'गाउँमा गएर बालिका डुबेको जानकारी दिने बालक डराएका कारण सोधपुछ हुन सकेन', मिश्रले भने,‘गरिब परिवारका बालिकाहरुको डुबेर मृत्यु भएको हो ।’ मृतक बालिकाहरुको शव शुक्रबार साझ पोस्टमार्टमका लागि जनकपुर ल्याइएको छ ।

५ बालिकाको मृत्युले गाउँ शोकमा डुबेको छ । एक महिनाअघि मुखियापट्टी मुसरनिया–५ का हुलास यादवले पोखरी खन्न सुरु गरेका थिए । तर, दाजुभाइबीच विवाद हुँदा पोखरीको काम रोकिएको हुलासका बुबा परीक्षण यादवले बताए । मालापोत कार्यालय बन्द हुँदा छोराहरुबीच अंशवण्डा हुन नसक्दा पोखरी निर्माण रोकिएको बुबा रामपरीक्षणले बताए । बालिकाहरुको मृत्युपछि यादव परिवार फरार भएका छन् । प्रहरीले उनीहरुको खोजी गरिरहेको जनाएको छ ।

प्रकाशित : जेष्ठ २८, २०७८ २१:३९
पूरा पढ्नुहोस्
प्रतिक्रिया
पठाउनुहोस्
×