नेप्से दोहोरो अंकले घट्यो, झण्डै १७ अर्बको सेयर कारोबार- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

नेप्से दोहोरो अंकले घट्यो, झण्डै १७ अर्बको सेयर कारोबार

कान्तिपुर संवाददाता

काठमाडौँ — सेयर कारोबार मापक नेप्से परिसूचक बुधबार दोहोरो अंकले घटेको छ । अघिल्लो दिनको तुलनामा १३.५६ अंकले घटेपछि समग्र नेप्से २ हजार ९ सय ४६.५८ अंकमा बन्द भएको छ । 

मंगलबारको तुलनामा नेप्से ०.४६ प्रतिशतले कम हो । बढी रहेको बजारमा लगानीकर्ताले नाफा सुरक्षण गर्न लागेपछि समग्र नेप्सेमा दबाब परेको हो ।

नेप्से परिसूचक घटेपनि अघिल्लो दिनको तुलनामा कारोबार रकम भने बढेको छ । करिब १ लाख ५५ हजार वटा कारोबारबाट २ सय २१ कम्पनीका ३ करोड १३ लाख ३५ हजार २२ कित्ता सेयर किनबेच भए । ती किनबेचबाट १६ अर्ब ९९ करोड रुपैयाँ बराबरको सेयर कारोबार भएको छ । अघिल्लो दिनको तुलनामा कारोबार रकम करिब ४ करोड रुपैयाँ बढी हो । मंगलबार १६ अर्ब ९५ करोड रुपैयाा बराबरको सेयर कारोबार भएको थियो ।

नेप्से परिसूचकसँगै सेयर बजारको आकार कुल बजार पुँजीकरण पनि केही घटेको छ । बुधबार सेयर बजारमा ४० खर्ब ९० अर्ब रुपैयाँ कूल बजार पुँजीकरण कायम भएको छ । अघिल्लो दिन यो सूचक ४१ खर्ब ९ अर्ब रुपैयाँ थियो । यस्तै, सो दिन सेन्सेटिभ परिसूचक ०.५४ प्रतिशत र फ्लोट परिसूचक ०.५ प्रतिशतले घटेको छ ।

उत्पादन तथा प्रशोधन उपसमूहको परिसूचक बुधबार सबैभन्दा बढी ३.९८ प्रतिशतले बढेको छ । यसैगरी, वित्त कम्पनी उपसमूहको परिसूचक २.०४, व्यापारिकको १.९२, निर्जीवन बीमाको ०.२६, जीवन बीमाको ०.१५ र सामूहिक लगानी कोष उपसमूहको ०.०३ प्रतिशतले उकालो लागे । तर, विकास बैंक उपसमूहको परिसूचक सबैभन्दा बढी ४.४१ प्रतिशतले घट्यो । सो दिन बैकिङ उपसमूहको परिसूचक ०.५८, होटल्स तथा पर्यटनको ०.०६, जलविद्युतको ०.५३, अन्यको १.३६, लघुवित्तको ०.३४ र लगानी उपसमूहको परिसूचक ०.९८ प्रतिशत परिसूचक घटे ।

प्रकाशित : जेष्ठ २६, २०७८ १६:३९
प्रतिक्रिया
पठाउनुहोस्

रहेनन् लोकसंस्कृतिविद् मोतीलाल पराजुली

कान्तिपुर संवाददाता

काठमाडौँ — लोकसंस्कृतिविद् प्राध्यापक मोतीलाल पराजुलीको ६५ वर्षको उमेरमा निधन भएको छ । क्यान्सरका बिरामी पराजुली पछिल्लो पटक कोरोनाबाट पीडित भई सहिद मेमोरियल अस्पताल कलंकीमा उपचारको क्रममा मंगलबार साँझ निधन भएको हो । उनका धर्मपत्नीसमेत १५ दिनअघि कोरोनाका कारण निधन भएको थियो ।

२०१३ साल माघमा कास्कीको चापाकोटमा जन्मिएका पराजुली त्रिभुवन विश्वविद्यालयमा चार दशक प्राध्यापन गरेका थिए । पराजुलीका ‘नेपाली लोकगाथा’, ‘नेपाली रचना कला’, ‘धर्मात्मा राजा’, ‘विशेष लेखन’, ‘नेपाली लोकनाटक : सिद्धान्त र विवेचना’, ‘सोरठी नृत्य नाटिकाः सैद्धान्तिक अध्ययन’, नेपालीमा प्रचलित नृत्य र नाटिकाहरू’, चार भागमा ‘नेपाली लोककथा संग्रह’ (चार भाग), ‘नेपाल लोकसाहित्यको रुपरेखा’ (सहलेखन), नेपाली लोककथा सिद्धान्त र विश्लेषण’, ‘नेपाली प्रदर्शनकारी कला भाग–४’ लगायत कृति प्रकाशित छन् । ‘नेपाली लोककथामा अभिप्राय’ शीर्षकमा विद्यावारिधि गरेका पराजुलीले ‘बालन लोकनाट्य’, ‘सवाई लोककाव्य’, ‘लोक साहित्यका अध्ययन पद्धति’, ‘रामकथा’, ‘सोरठी पावरा र सोरठी लोकनाटकको तुलना’, ‘कास्की जिल्लाका गाथा’, ‘गण्डकी अञ्चलका लोकनाच’, ‘आँधीखोले भजन चुड्का’ विषयमा अनुसन्धान गरेका थिए ।

पराजुली नेपाल लोकवार्ता संस्कृति समाजका सदस्य र लोकवार्ता परिषद् नेपालका सल्लाहकार थिए । आफ्ना गुरु पराजुलीबारे लोकसंस्कृतिका अनुसन्धाता सहप्राध्यापक डा. ध्रुवप्रसाद भट्टराई उल्लेख गर्दै लोकसाहित्य तथा पूर्वीय वाङ्मयका क्षेत्रमा अपूरणीय क्षति पुगेको बताए । पराजुलीका एक छोरा र एक छोरी छन् ।

प्रकाशित : जेष्ठ २६, २०७८ १६:३४
पूरा पढ्नुहोस्
प्रतिक्रिया
पठाउनुहोस्
×