एनसेलको बढेको शुल्क १९ देशमा लागू- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

एनसेलको बढेको शुल्क १९ देशमा लागू

कान्तिपुर संवाददाता

काठमाडौँ — दूरसञ्चार सेवा प्रदायक एनसेलले १९ देशमा कल गर्दा लाग्ने शुल्क परिमार्जन गर्दै लागू गरेको छ । नेपाल दूरसञ्चार प्राधिकरणबाट स्वीकृत यो शुल्क गत शुक्रबारदेखि लागू भएको एनसेलले जारी गरेको विज्ञप्तिमा उल्लेख छ ।

परिमार्जित शुल्क पुरानोभन्दा ६ गुणासम्म महँगो छ । प्राधिकरणले जेठ ९ देखि डेढ दर्जन देशमा एनसेलबाट कल गर्दा लाग्ने शुल्क बढाउन स्वीकृति दिएको थियो ।

प्राधिकरणले एनसेललाई इटली, माल्टा, जर्मनी, ताजकिस्तान, जोर्डन, थाइल्यान्ड, लाटभिया, स्लोभेनिया, माल्दिभ्स, बेल्जियम, इस्टोनिया, क्रोएसिया, फिनल्यान्ड, नेदरल्यान्ड्स, बुल्गेरिया, सिरियन अरब रिपब्लिक, लिथुआनिया र साइप्रसका लागि नयाँ अन्तर्राष्ट्रिय कल शुल्कको स्वीकृति दिएको हो । ‘प्राधिकणबाट प्राप्त स्वीकृतिसँगै यी देशका लागि एनसेलको अन्तर्राष्ट्रिय कल शुल्क अब अरू सेवा प्रदायकले प्राधिकरणको स्वीकृतिबमोजिम लिइरहेको न्यूनतम शुल्कसँग बराबर भएको छ,’ विज्ञप्तिमा भनिएको छ ।

नयाँ अन्तर्राष्ट्रिय कल शुल्कअनुसार १९ वटा देशमा प्रतिमिनेट कल शुल्क करबाहेक प्रतिमिनेट ३० रुपैयाँ निर्धारण गरिएको एनसेलले जनाएको छ । माल्दिभ्समा लाग्ने शुल्क भने करबाहेक प्रतिमिनेट ३० रुपैयाँ ६५ पैसा निर्धारण भएको छ । यसअघि यी देशमा कल गर्दा देशअनुसार प्रतिमिनेट ४ रुपैयाँ ९९ पैसादेखि १५ रुपैयाँसम्म लाग्ने गरेको थियो । सम्बन्धित देशका साझेदारले सन् २०१६ देखि आफ्नो शुल्क बढाएका कारण ५ वर्षमा एनसेललाई अन्तर्राष्ट्रिय कलबापतको राजस्वमा ठूलो नोक्सान पर्दै आएको एनसेलले विज्ञप्तिमा जनाएको छ । विगत ५ वर्षमा अन्तर्राष्ट्रिय कलबाट हुने आयमा साढे २७ करोडभन्दा बढी नोक्सान भोगेको एनसेलको दाबी छ ।


प्रकाशित : जेष्ठ २६, २०७८ ०६:४३
प्रतिक्रिया
पठाउनुहोस्

संक्रमण घट्दै, मृत्युदर उस्तै

विज्ञ भन्छन्– ‘दुई तिहाइभन्दा बढी जनसंख्याले कोभिडविरूद्धको खोप नपाएसम्म र जनस्वास्थ्य मापदण्डमा हेलचक्य्राइँ भएसम्म संक्रमण पुनः विस्तार हुँदै जाने जोखिम छ’ 
अतुल मिश्र

काठमाडौँ — पछिल्लो साता कोभिड–१९ संक्रमण दर घट्दै गए पनि मृत्युदरमा उल्लेखनीय सुधार नआएको विज्ञहरूले बताएका छन् । संक्रमण दर घट्दै गएकाले अस्पतालमा शय्या पाउन खासै समस्या छैन । मृत्यु भने दैनिक एक सय हाराहारीभन्दा घट्न सकेको छैन ।

मंगलबारको तथ्यांकअनुसार पछिल्लो २४ घण्टामा १२ हजार ६५ जनाको पीसीआर परीक्षण गर्दा ३२.०७ प्रतिशत अर्थात् ३ हजार ८ सय ७० जनामा संक्रमण देखिएको छ भने १ सय ८ जनाको मृत्यु भएको छ । ‘मृत्युदरमा उल्लेख्य सुधार हुन अझै बाँकी छ,’ स्वास्थ्य तथा जनसंख्या मन्त्रालयका सहप्रवक्ता डा.समीरकुमार अधिकारीले भने, ‘संक्रमण दरमा भने सुधारोन्मुख लक्षण देखिन्छ ।’ संक्रमणको पहिलो लहर कम हुने बेला यस्तै अवस्था देखिएको उनको भनाइ छ । ‘तर पहिलो लहर पिकमा हुँदासमेत आज (मंगलबार) जति मृत्यु भएको छ, त्यसको करिब एकतिहाइ मात्र मृत्यु भएको तथ्यांक छ,’ उनले भने ।

अझै केही समय स्वास्थ्य सावधानी आवश्यक रहेको जनाउँदै उनले छिमेकी मुलुक भारतमा समेत संक्रमण कम हुँदै गएकाले त्यसको सकारात्मक प्रभाव नेपालमा पर्ने विश्वास व्यक्त गरे । भारतमा मंगलबार २ हजार १ सय ३० जनाको मृत्यु भएको छ । ४.५० प्रतिशत अर्थात् १३ लाख ३ हजार ७ सय २० जना सक्रिय संक्रमित छन । नेपालमा मंगलबार १ सय ८ जनाको मृत्यु भएको छ । १३.९० प्रतिशत अर्थात् ८२ हजार ७ सय ३६ जना सक्रिय संक्रमित छन् ।

संक्रमण दरमा सामान्य कमी भएपछि एक व्यक्तिले अन्यलाई संक्रमण सार्ने दरमा समेत केही सुधार देखिएको छ । एक व्यक्तिले २ देखि ३ जनासम्मलाई संक्रमण सारेको देखिएको थियो भने हाल एक जनाले एक जनालाई सारिरहेको डा. अधिकारीले बताए ।

उनका अनुसार विभिन्न भागमा यो दर भने फरक छ । इपिडिमियोलोजी तथा रोग नियन्त्रण महाशाखाका पूर्वनिर्देशक डा.बाबुराम मरासिनी कोभिडविरुद्घको खोप नलगाएका र संक्रमित नभएको जनसंख्या ठूलो रहेकाले जनस्वास्थ्यको मापदण्ड पालना नभए संक्रमण फेरि विस्तार हुने बताउँछन् । ‘दुई तिहाइभन्दा बढी जनसंख्याले कोभिड विरुद्घको खोप नपाएसम्म र जनस्वास्थ्य मापदण्डमा हेलचक्य्राइँ भए संक्रमण पुनः विस्तार हुँदै जाने जोखिम छ,’ उनले भने ।

सबैभन्दा बढी संक्रमण वाग्मती र प्रदेश ५ मा देखिएको छ भने सबैभन्दा धेरै संक्रमित काठमाडौंमा छन् । वाग्मती प्रदेशमा ३२ हजार ८ सय ४९ सक्रिय संक्रमित छन् भने प्रदेश ५ मा यो संख्या १२ हजार ६ सय ८७ छ । काठमाडौंमा ११ हजार ४ सय २३, भक्तपुरमा ३ हजार ४ सय ५४ र ललितपुरमा ४ हजार ५ सय १ गरी उपत्यकामा १९ हजार ३ सय ७८ जना सक्रिय संक्रमित छन् । धेरै जिल्लामा अझै एक हजारभन्दा बढी सक्रिय संक्रमित छन् । कम सक्रिय संक्रमित रुकुम पूर्वमा २ जना, डोल्पामा ७, मुगुमा ९ र बाजुरामा ४ जना छन् ।

संक्रमण दर आशालाग्दो तरिकाले नघटेकाले जोखिम बाँकी नै रहेको विज्ञहरूको ठम्याइ छ । ‘संक्रमण दर शून्य भएकै राम्रो हो तर महामारीमा दर शून्य हुँदैन, यो दरलाई ५ प्रतिशतभन्दा तल झार्न सकियो भने ठाउँ विशेष रणनीतिक रूपमा संक्रमण रोकथाम गर्न सजिलो हुन्छ,’ डा.अधिकारीले भने, ‘जनस्वास्थ्य मापदण्डमा अझै केही समयसम्म कडाइ जारी राख्नुपर्ने अवस्था देखिएको छ ।’

प्रकाशित : जेष्ठ २६, २०७८ ०६:३८
पूरा पढ्नुहोस्
प्रतिक्रिया
पठाउनुहोस्
×