उत्पादनमा कटौती गर्दै उद्योग- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

उत्पादनमा कटौती गर्दै उद्योग

कान्तिपुर संवाददाता

मकवानपुर — दोस्रो लहरको कोरोना संक्रमण तीव्र भएसँगै मकवानपुरका उद्योगले आफ्ना उत्पादनमा कटौती सुरु गरेका छन् । हेटौंडा औद्योगिक क्षेत्रमा सञ्चालित उद्योगले ‘बजार अनिश्चित’ बनेको भन्दै उत्पादन क्षमता घटाएका हुन् ।

एक महिनाअघि शतप्रतिशत क्षमतामा सञ्चालित उद्योगले हाल ८० प्रतिशत मात्र उत्पादन गरिरहेका छन् । ‘सुरुकै लकडाउनबाट कतिपय उद्योग पूर्ण क्षमतामा सञ्चालनमा आएका थिएनन् । ती उद्योगले क्षमताको ५० प्रतिशत मात्र उत्पादन गर्न थालेका छन्,’ हेटौंडा औद्योगिक क्षेत्र व्यवस्थापन कार्यालयका प्रमुख राजेन्द्र कँडेलले भने ।

औद्योगिक क्षेत्रभित्र रहेका १ सय ३६ उद्योगमध्ये १ सय १२ सञ्चालनमा छन् । तीमध्ये ८० प्रतिशत उद्योगले उत्पादन क्षमता घटाएका छन् । ‘खाद्यान्न तथा सरसफाइजन्य सामग्री उत्पादन गर्ने उद्योग पूर्णरूपमा सञ्चालित छन् । अन्य उद्योगले उत्पादनमा कटौती गरिसकेका छन्,’ कँडेलले भने । देशका विभिन्न स्थानमा भइरहेको निषेधाज्ञा कति समय लम्बिने हो, निश्चित नभएपछि त्यसको असर उद्योगमा परेको छ ।


प्रकाशित : वैशाख २४, २०७८ ०६:५८
प्रतिक्रिया
पठाउनुहोस्

राष्ट्रिय सभा उपनिर्वाचन उम्मेदवारी आज

कान्तिपुर संवाददाता

काठमाडौँ — वाग्मती प्रदेशमा रिक्त हुन पुगेको राष्ट्रिय सभा सदस्य पदको उपनिर्वाचनका लागि शुक्रबार उम्मेदवारी मनोनयन हुँदै छ । निर्वाचन आयोगका अनुसार प्रदेश राजधानी हेटौंडामा खोलिएको निर्वाचन अधिकृतको कार्यालयमा बिहान १० देखि ४ बजेसम्म उम्मेदवारी दर्ता गरिनेछ ।

वाग्मती प्रदेशबाट निर्वाचित भएकामध्ये रामबहादुर थापालाई माओवादी केन्द्रले कारबाही गरेपछि उनको पद रिक्त भएको हो । माओवादी केन्द्रबाट निर्वाचित भएका थापा एमालेमा प्रवेश गरेपछि उनलाई माओवादीले कारबाही गरेको थियो । मतदान ६ गते हुनेछ ।

आयोग प्रवक्ता राजकुमार श्रेष्ठका अनुसार राष्ट्रिय सभा निर्वाचनमा वाग्मती प्रदेशको प्रदेशसभाका १ सय १० सदस्य तथा प्रदेशभित्रका नगरपालिकाका प्रमुख, उपप्रमुख र गाउँपालिकाका अध्यक्ष र उपाध्यक्षसमेत २३८ गरी कुल ३ सय ४८ जना मतदाताले मतदान गर्न पाउने छन् । विपक्षी दल कांग्रेस, माओवादी, एमालेकै माधव नेपाल–झलनाथ खनाल समूहले संघीयताका जानकार खिमलाल देवकोटालाई उम्मेदवार बनाउने निर्णय गरेको छ । त्यस्तै, सत्तारुढ दल एमाले रामबहादुर थापालाई उम्मेदवार बनाउने तयारीमा छ ।

थापालाई उम्मेदवार बनाउँदा जित्न सक्छन् कि सक्दैनन् भनेर एमालेले मतको आन्तरिक हिसाबकिताब गरिरहेको छ । एमाले स्थायी कमिटीको बिहीबारको बैठकमा यो विषयमा पनि कुराकानी भएको थियो । थापाले जित्ने सुनिश्चितता नदेखिए एमालेले अर्को उम्मेदवार खडा गर्ने सम्भावना छ ।

त्यसैगरी, लुम्बनी प्रदेशबाट रिक्त राष्ट्रिय सभा सदस्यको निर्वाचन जेठ १७ मा हुँदै छ । त्यसका लागि जेठ १ देखि ९ सम्मको निर्वाचन कार्यतालिका आयोगले तयार गरेको छ । राजधानी तोकिएको दाङमा निर्वाचन अधिकृतको कार्यालय खोलिएको छ ।

प्रकाशित : वैशाख २४, २०७८ ०६:५७
पूरा पढ्नुहोस्
प्रतिक्रिया
पठाउनुहोस्
×