मास्क र अक्सिमिटरमा अचाक्ली मूल्य वृद्धि- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

मास्क र अक्सिमिटरमा अचाक्ली मूल्य वृद्धि

जितेन्द्र साह

विराटनगर — थोक विक्रेताले मूल्य बढाएपछि विराटनगरका बजारमा सर्जिकल मास्क र पल्स अक्सिमिटर अभाव भएको छ । संक्रमणको दोस्रो लहरअघिसम्म थोक विक्रेताले प्रतिपोका १ सय १० रुपैयाँमा बिक्री गरेको मास्कको मूल्य ३ सय रुपैयाँसम्म लिन थालेका छन् ।

शरीरमा अक्सिजनको मात्रा नाप्ने पल्स अक्सिमिटरको थोक मूल्य गत चैत २५ अघिसम्म ६/७ सय रुपैयाँसम्ममा बिक्री भए पनि अहिले १ हजार १ सय रुपैयाँ पुर्‍याइएको छ । खुद्रा बजारमा प्रतिपोका मास्कको मूल्य ३ सय ५० देखि ४ सय रुपैयाँ र अक्सिमिटर १ हजार ७ सयदेखि २ हजार ५ सय रुपैयाँसम्ममा बिक्री हुँदै छ । उत्पादकले खुद्रा बजारमा ५० पिसको प्रतिपोका र स्वास्थ्य संस्थामा सय पिसको पोका बनाएर मास्क बिक्री गर्छन् । ‘डिलरले बढी मूल्यमा किन्नेलाई माल दिन्छ, मैले राख्न छाडें,’ खुद्रा औषधि व्यवसायी अरुण ठाकुरले भने ।

पाँच/छ दिनदेखि यी सामग्रीको मूल्यमा अचाक्ली वृद्धि भएको उनले बताए । साताअगाडि खुद्रा बजारमा प्रतिपोका मास्कको मूल्य १ सय ५० रुपैयाँदेखि १ सय ८० रुपैयाँ रहेको उनको भनाइ छ । ‘थोक विक्रेताले सर्जिकल मास्कको हामीलाई नै ६ रुपैयाँ गोटा भन्न थाले, बेच्ने कतिमा ?,’ अर्का एक व्यवसायीले नाम उल्लेख नगर्ने सर्तमा भने, ‘ग्राहकले डिलरलाई चिनेका हुँदैनन्, हामीले नै कालोबजारी गरेको ठान्छन्, झगडा गर्छन्, गाली गर्छन् ।’

जानकारहरूका अनुसार नेपाली बजारमा २ हजार ५ सय रुपैयाँमा समेत राम्रा खाले अक्सिमिटर पाइन्न । ‘गुणस्तरीय भनेर बेचिए पनि बजारमा उपलब्ध प्रायः अक्सिमिटर कामै नलाग्ने ६/७ सय रुपैयाँ पर्ने चिनियाँ उत्पादन हुन्,’ एक जानकारले भने, ‘बजारमा अनुगमन गर्ने निकायको कतै उपस्थिति देखिन्न ।’ राम्रो अक्सिमिटरमा दुई–तीन सय रुपैयाँभन्दा बढी मूल्यवृद्धि भएको छैन । यस्तो अक्सिमिटर बजारमा उपलब्ध पनि छैन । मास्कको डोरी अभाव भएर उत्पादनमा समस्या आएको थोक औषधि व्यवसायी संघ प्रदेश १ का अध्यक्ष विपुल दासले बताए ।

प्रकाशित : वैशाख २३, २०७८ ०६:४५
प्रतिक्रिया
पठाउनुहोस्

बेलझुन्डी कोरोना अस्पतालमा एकैदिन चार जना संक्रमितको मृत्यु

दुर्गालाल केसी

दाङ — कोरोना विशेष अस्पताल बेलझुन्डीमा बुधबार एकैदिन चार कोरोना संक्रमितको मृत्यु भएको छ ।

घोराही उपमहानगरपालिका ९ का ६५ वर्षीय पुरुष, घोराही १५ का ६५ वर्षीय पुरुष, घोराही १८ की ४५ वर्षीया महिला र बबई गाउँपालिका ४ का ४० वर्षीय पुरुषको अस्पतालमा उपचारका क्रममा मृत्यु भएको हो ।

चारैजना कोरोना र निमोनियाबाट प्रभावित भएको अस्पतालका व्यवस्थापक दोर्ण वलीले जानकारी दिए । अस्पतालमा अक्सिजन अभाव भएका कारण बिरामीलाई बचाउन कठिन भइरहेको पनि उनले बताए । १ सय शय्याको अस्पताल भए पनि अक्सिजन अभावमा ५७ जना मात्रै बिरामी राखिएको उनले बताए । थप बिरामी राखिदिन निरन्तर दबाब आए पनि अक्सिजन अभावका कारण राख्न नसकिएको उनको गुनासो छ ।

अक्सिजन अभावमा बिरामी राख्नु भनेको जानाजान बिरामीको ज्यान जोखिममा पार्नु भएकाले यसमा अनावश्यक दबाब सिर्जना नगर्न उनले अनुरोध गरेका छन् । अक्सिजनको तत्काल व्यवस्था गरिदिन उनले मन्त्री, सांसद्, स्थानीय सरकार, नेता, समाजसेवीलगायतलाई सार्वजनिक रुपमै आह्वान गरेका छन् ।


प्रकाशित : वैशाख २३, २०७८ ०६:३७
पूरा पढ्नुहोस्
प्रतिक्रिया
पठाउनुहोस्
×