४ करोडको मास्क निर्यात- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

४ करोडको मास्क निर्यात

चालु आर्थिक वर्षको नौ महिनामा मास्क आयातबाट १० करोड ५ लाख ७४ हजार रुपैयाँ बराबर भन्सार महसुल संकलन
नुमा थाम्सुहाङ

काठमाडौँ — स्वदेशी उद्योगहरूले उत्पादन गरेको फेस मास्क निर्यात हुन थालेको छ । चालु आर्थिक वर्षको नौ महिना (साउन–चैत) सम्ममा ४ करोड १४ लाख ६७ हजार रुपैयाँ बराबरको फेस मास्क निर्यात भएको भन्सार विभागको तथ्यांक छ ।

यसमा ८ लाख ९७ हजार ४ सय ८७ थान र १ सय ६० केजी फेस मास्क निर्यात भएको हो । मास्क कुनै थान र कुनै केजीमा निर्यात भएको विभागको तथ्यांक छ ।

यसमध्ये सबैभन्दा धेरै मंसिरमा १ करोड १२ लाख २२ हजार रुपैयाँ बराबरको ३ लाख १६ हजार २ सय ८५ थान फेस मास्क निर्यात भएको तथ्यांकले बताउँछ । कात्तिकमा १ करोड ५ लाख ९७ हजार रुपैयाँ बराबरको ३ लाख ८ सय थान र भदौमा १ करोड ८५ लाख ४ हजार रुपैयाँ बराबरको २ लाख ६७ हजार ३ सय थान फेस मास्क बाहिर गएको छ । यसमा साउनमा मात्र ५ लाख ९ हजार रुपैयाँ बराबरको १ सय ६० केजी मास्क निर्यात भएको छ । माघमा भने मास्क निर्यात भएको छैन । असोज, पुस, फागुन र चैतमा केही थान मात्र फेस मास्क देश बाहिर गएको विभागको तथ्यांक छ ।

नेपालमा उत्पादित फेस मास्क निर्यात हुने देशहरूमा भुटान, फ्रान्स, जर्मनी, जापान, बेलायत, यूएई र अमेरिका छन् । साना–ठूला कम्पनीहरूले माक्स बनाइरहेको निर्यात व्यवसायी महसंघ नेपालका उपाध्यक्ष चण्डीप्रसाद अर्यालले जानकारी दिए । ‘यहाँ नै मास्क बन्ने भएकाले आयात कम गर्नेतर्फ गइरहेका छौं,’ उनले भने, ‘केही कम्पनीले बनाएका मास्क विश्व स्वास्थ्य संगठनले तोकेको मापदण्डअनुसार निर्यात भइरहेका छन् ।’

केएन–९५ र डिस्पोजेबल मास्क निर्यात भइरहेको रसायन तथा मेडिकल आपूर्ति संघ नेपालका अध्यक्ष सुरेश घिमिरेले बताए । ‘संक्रमण बढे पनि मास्कको अभाव हुने स्थिति छैन,’ उनले भने, ‘यहाँ पनि धेरै उद्योगहरूले मास्क उत्पादन सुरु गरिसकेका छन् । बाहिरबाट पनि सहज रूपमा मास्क आइरहेको छ ।’

१४/१५ वटा गार्मेन्ट उद्योगले मास्क बनाइरहेको गार्मेन्ट एसोसिएसन अफ नेपालका महासचिव अशोक अग्रवालले जानकारी दिए । ‘एसोसिएसनअन्तर्गत ४० वटा गार्मेन्ट उद्योग सदस्य छन्,’ उनले भने, ‘केही कम्पनीले मात्र मास्क बनाएर निर्यात गरिरहेका छन् । हाम्रै सदस्यले भने मास्क निर्यात गरिरहेको जानकारीमा आएको छैन ।’

२०७६ माघ ५ देखि फागुन १९ गतेसम्म ४३ लाख १७ हजार थान मास्क निर्यात भएको थियो । चीन र हङकङतर्फ निर्यात गरिएको त्रिभुवन अन्तर्राष्ट्रिय विमानस्थल भन्सार कार्यालयले जानकारी दिएको छ । त्यति बेला नेपालमा चीनबाट आयात हुने मास्क भाइरस संक्रमणबाट बच्न चिनियाँ नागरिकले नै किनेर आफ्नो देश लगेका थिए । कोभिड–१९ को संक्रमणबाट सर्जिकल मास्कको माग बढेपछि चिनियाँ नागरिकले यहाँ सर्जिकल स्टोरहरूबाट मास्क खरिद गरी आफ्नै मुलुक लगेका थिए । विभागले चालु आर्थिक वर्षदेखि मात्र मास्कको तथ्यांक राख्न थालेको हो । कोभिड–१९ को महामारीपछि मास्कको व्यापार देखिएकाले तथ्यांक राख्न थालिएको विभागले बताएको छ ।

चालु आर्थिक वर्षको साउनदेखि चैतसम्ममा ५६ करोड १३ लाख ९१ हजार रुपैयाँ बराबरको फेस मास्क आयात भएको छ । यसमा १० करोड ३९ लाख ३६ हजार ८३ थान र २७ हजार १ सय ७१ केजी फेस मास्क आयात भएको विभागको तथ्यांकमा छ । यसबाट विभागले १० करोड ५ लाख ७४ हजार रुपैयाँ बराबर भन्सार महसुल संकलन गरेको छ ।

प्रकाशित : वैशाख ११, २०७८ ०८:२८
प्रतिक्रिया
पठाउनुहोस्

अक्सिजन भारततिर

नुमा थाम्सुहाङ

काठमाडौँ — दोस्रो लहरको कोभिड–१९ संक्रमण तीव्र रूपमा फैलिएसँगै नेपालबाट अक्सिजन भारत निर्यात हुन थालेको छ । भारतमा संक्रमितको संख्या ह्वात्तै बढेर अक्सिजन अभाव देखिन थालेपछि निकासीका लागि केही व्यवसायीले यहाँका बजारबाट अक्सिजन र त्यससँग सम्बन्धित सामग्री उठाइरहेको रसायन तथा मेडिकल आपूर्ति संघका अध्यक्ष सुरेश घिमिरेले बताए ।

फाइल तस्बिर

व्यवसायीका अनुसार नेपालमा अक्सिजन हाल पुग्दो मात्रामा रहे पनि माग बढिरहेको छ । संक्रमितको संख्या दिनहुँ बढिरहेको छ भने अस्पताल भर्ना भएका अधिकांशलाई अक्सिजन दिनुपरिरहेको छ । ‘यहाँ पनि अक्सिजन अभाव हुने जोखिम देखेर हाम्रा व्यवसायीलाई निकासी नगर्न आग्रह गरेका छौं,’ संघका अध्यक्ष घिमिरेले भने । संघले मंगलबार आफ्ना साधारण सदस्य र आजीवन सदस्यलाई छिट्टै अक्सिजन अभाव हुन सक्ने भन्दै अक्सिजन कन्सन्ट्रेटर, पल्स अक्सिमिटर, नेबुलाइजर, हाई फ्लो अक्सिजन क्यानुला र अक्सिजनसँग सम्बन्धित सामग्री निर्यात नगर्न सूचना जारी गरेको हो जसको बोधार्थ स्वास्थ्य तथा जनसंख्या र अर्थ मन्त्रालयमा समेत पठाइएको छ ।

त्रिपुरेश्वरस्थित अक्सिजन ट्रेड लिंकका सञ्चालक सोहेल श्रेष्ठले गएको सातादेखि अक्सिजनबारे सोधखोज गर्ने र किन्ने ग्राहक बढेको बताए । उनी इलेक्ट्रिक अक्सिजन कन्सन्ट्रेटर बिक्री गर्छन् । ‘पहिले साता एउटा अक्सिजन कन्सन्ट्रेटर बिक्री हुन्थ्यो । अहिले २/३ दिनमै २ वटासम्म बिक्री हुन्छ,’ उनले भने । नेपालमा अक्सिजन कन्सन्ट्रेटर चीन र भारतबाट आउने श्रेष्ठले जानकारी दिए । ‘चीनबाट त्यहीँ बनेको कन्सन्ट्रेटर आउँछ । यसको मूल्य ६५–८५ हजार रुपैयाँ पर्छ,’ उनले भने, ‘अमेरिकामा बनेको चाहिँ भारतबाट आउँछ, यसको १ लाख रुपैयाँभन्दा माथि पर्छ ।’

उनका अनुसार दमलगायतका श्वाससम्बन्धी समस्या भएकाहरूका लागि पहिले अक्सिजन खपत बढी हुन्थ्यो । ‘अहिले कोभिडका सिकिस्त बिरामीलाई पनि अक्सिजन चाहिने देखिएकाले बजारमा माग बढेको छ । कतिपयले स्टकका लागि भनेर किनिरहेका छन्,’ उनले भने, ‘पहिला जस्तै लकडाउन भएर मेडिकल सामान आयात गर्न समस्या भयो भने अक्सिजन ग्यास अभाव हुन सक्छ ।’

भक्तपुरस्थित जयश्री इन्द्रेणी अक्सिजन ग्यास सप्लायर्सका सञ्चालक रामचन्द्र देशेमरुले कोभिडका संक्रमितहरू बढेसँगै अक्सिजनको माग बढेको बताए । ‘अहिले त फ्याक्ट्री (अक्सिजन उत्पादक) ले नै मागअनुसार अक्सिजन सिलिन्डर दिन सकेका छैनन्, समस्या होला जस्तो छ,’ उनले भने, ‘पहिले विज्ञापन गर्दै पसल–पसल आउँथे ।’ अक्सिजन अभाव हुन सक्ने भएकाले सरकारले बेलैमा ध्यान दिनुपर्नेमा उनले जोड दिए । त्रिपुरेश्वरका सर्जिकल व्यवसायी शिव खनालले पनि केही दिनयता अक्सिजन सिलिन्डरको माग बढेको जानकारी दिए ।

‘म अक्सिजन बिक्री गर्दिनँ तर यसमा चाहिने रेगुलेटर धेरै बेचिसकें,’ उनले भने, ‘अभाव हुने अनुमानमा पनि स्टक गर्न मानिसले किनिरहेका छन् ।’ मास्कमा जस्तै कालोबजारी हुन नदिन सरकारले सावधानी अपनाउनुपर्ने उनको भनाइ छ ।

प्रकाशित : वैशाख १०, २०७८ ०७:३६
पूरा पढ्नुहोस्
प्रतिक्रिया
पठाउनुहोस्
×