१०८ ठाउँमा अनलाइन भूअभिलेख सूचना प्रणाली- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

१०८ ठाउँमा अनलाइन भूअभिलेख सूचना प्रणाली

बाँकी १८ कार्यालयमा चालु आर्थिक वर्षभित्रै सञ्चालनमा ल्याइने
नुमा थाम्सुहाङ

काठमाडौँ — भूमि व्यवस्थापन तथा अभिलेख व्यवस्था विभागले देशभर १ सय ८ स्थानका मालपोत कार्यालयबाट अनलाइनमा आधारित भूअभिलेख सूचना व्यवस्थापन प्रणाली (एलआरआईएमएस) सुरु गरेको छ । विभागअन्तर्गतका १ सय २६ मालपोत कार्यालयमध्ये अहिले १ सय ८ ठाउँमा एलआरआईएमएस सेवा सुरु भइसकेको विभागका प्रवक्ता गुरुदत्त सुवेदीले जानकारी दिए ।

फाइल तस्बिर


‘बाँकी १८ वटा कार्यालयमा चालु आर्थिक वर्षभित्र उक्त प्रणाली लागू गर्ने विभागको लक्ष्य छ,’ उनले भने, ‘यसका लागि दुई प्याकेज गरेर ९/९ वटा कार्यालयलाई १ करोड रुपैयाँ बजेट छुट्याइएको छ ।’ एक–दुई महिनाभित्र यी बाँकी कार्यालयमा एलआरआईएमएस सेवा पुर्‍याइसक्ने उनले सुनाए । यो प्रणाली सुरु भएपछि अनलाइनबाट प्रत्येक दिन कति राजस्व उठ्यो, कति कारोबार भयो, कति पूरा हुन बाँकी छन् लगायत जानकारी जहाँबाट पनि पाउन सकिने उनले जानकारी दिए ।

जग्गा प्रशासनसम्बन्धी सेवालाई समयअनुसार परिवर्तन गरी सूचना प्रविधिमा आधारित बनाउन सरकारले भूमि सुधार तथा मालपोत कार्यालयहरूमा एलआरआईएमएस कार्यान्वयनमा ल्याएको हो । सूचना तथा सञ्चार प्रविधि विकास आयोजना (आईसीटी डेभलपमेन्ट प्रोजेक्ट) अन्तर्गत एसियाली विकास बैंक (एडीबी) को अनुदान सहयोगमा वेबसाइटमा आधारित एप्लिकेसन विकास गरी १४ वटा मालपोत कार्यालयमा लागू गर्ने कार्यक्रमअन्तर्गत २०७२ साउन २५ देखि काठमाडौंको कलंकीस्थित मालपोत कार्यालयबाट यसको सुरुवात गरिएको विभागले जनाएको छ ।

आयोजनाको कार्य क्षेत्रभित्र परेका १४ वटा मालपोत कार्यालयमा सफल परीक्षणपछि सरकारको नियमित बजेट कार्यक्रमबाट हालसम्म देशभरका १ सय ८ कार्यालयमा उक्त सेवा सुरु भइसकेको छ । चालु आर्थिक वर्ष २०७७/७८ मा बाँकी १८ कार्यालयमा प्रणाली कार्यान्वयनमा ल्याउने विभागीय लक्ष्यअनुसार काम भइरहेको प्रवक्ता सुवेदीले बताए । मालपोत कार्यालयमा कार्यरत कर्मचारीले इन्टरनेट लिंक (प्राइभेट लिंक) र सेवाग्राहीलगायत अन्य सरोकारवालाले जुनसुकै ठाउँबाट इन्टरनेट कनेक्सनमार्फत यो प्रणालीमा पहुँच पुर्‍याउन सक्ने विभागले जानकारी दिएको छ ।

घरजग्गाको स्वामित्व हस्तान्तरण हुँदा मालपोत कार्यालयले उठाउने रजिस्ट्रेसन दस्तुर, पुँजीगत लाभकर तथा सेवा शुल्कलगायत अन्य राजस्व विवरण प्रणालीमा स्वचालित रूपमा गणना हुने व्यवस्था यो प्रणालीमा छ । जग्गाको स्वीकृत न्यूनतम मूल्यांकन रकम प्रणालीमा प्रविष्टि गर्ने व्यवस्था भएको र घरजग्गाको स्वामित्व हस्तान्तरण हुँदा न्यूनतम मूल्यांकनभन्दा कम थैली मूल्य राखी कारोबार गर्न नसकिने व्यवस्था प्रणालीमा छ । यो प्रणालीले राजस्व रकम गणनामा सहजता तथा पारदर्शिता हुने विभागले जनाएको छ ।

विभागले सेवाग्राहीले आफूअनुकूल किसिमले इन्टरनेटका माध्यमबाट जग्गाको कारोबारका लागि अनलाइनबाटै निवेदन दिन सक्ने पब्लिक एक्सेस मोडुल (पाम) प्रणाली पनि सञ्चालनमा ल्याएको छ । हालसम्म १९ वटा कार्यालयमा यो प्रणाली सञ्चालित छ । आर्थिक वर्ष २०७७/७८ मा थप २५ वटा कार्यालयबाट सेवा सञ्चालन गर्ने विभागले लक्ष्य राखेको छ ।

प्रकाशित : वैशाख ५, २०७८ ०७:३५
प्रतिक्रिया
पठाउनुहोस्

१० प्रतिशत भेन्टिलेटर भरिए

विज्ञ भन्छन्– ‘संक्रमण यही गतिमा जाने हो भने उपत्यकामा एक साताभित्र आईसीयू/भेन्टिलेटर पाउने अवस्था रहँदैन’
अतुल मिश्र

काठमाडौँ — देशभर कोभिड–१९ का लागि छुट्याइएका भेन्टिलेटरमध्ये करिब १० प्रतिशत कोरोनाका जटिल बिरामीले भरिएका छन् । कोभिडकै लागि भनेर ४ सय ६१ वटा भेन्टिलेटर छुट्याइएका छन् । तीमध्ये शनिबारसम्म ४५ वटामा जटिल बिरामी उपचाररत छन् ।

हालसम्म ९४ वटा आईसीयू बेड जटिल बिरामीले भरिएका छन् । वैशाख १ यता सघन उपचारअन्तर्गत आईसीयू र भेन्टिलेटर उपयोग गर्नुपर्ने बिरामीको संख्या दिनहुँ बढ्दो छ ।

‘कोभिड संक्रमणले आईसीयू र भेन्टिलेटर चाहिने बिरामीको संख्या बढ्दो छ,’ स्वास्थ्य मन्त्रालयका सहप्रवक्ता डा. समीरकुमार अधिकारीले कान्तिपुरसँग भने, ‘राजधानीमै आईसीयू, भेन्टिलेटर पाउन गाह्रो भइसक्यो, बाँकेमा त यहाँभन्दा पनि बढी गाह्रो भएको अवस्था छ ।’ सरकारी तथ्यांकअनुसार गण्डकीमा समेत कोभिडको केस उकालो लाग्दै छ । गण्डकीमा आईसीयू र भेन्टिलेटरको संख्या तुलनात्मक रूपमा कम छ । विराटनगरमा पनि अवस्था जटिल बन्दै गएको छ । राजधानीको शुक्रराज ट्रपिकल तथा सरुवा रोग अस्पताल टेकु र पाटन अस्पतालमा कोभिड बिरामीका लागि आईसीयू र भेन्टिलेटर भरिँदै गएका छन् । ‘हामीकहाँ भएका २१ वटा आईसीयू र १५ वटा भेन्टिलेटर नै प्याक छन्,’ पाटन अस्पतालका डा. आशिष श्रेष्ठले भने, ‘हाल अस्पतालमा जति कोभिड बिरामी छन्, सबै जटिल अवस्थाका छन् ।’

जटिल बिरामी बढेपछि अन्य उपचारका लागि छुट्याइएको आईसीयू र भेन्टिलेटरसमेत कोभिडकै लागि छुट्याउँदै जानुपर्ने अवस्था आएको चिकित्सक बताउँछन् । कोभिडको दोस्रो लहर सुरु भएपछि सघन उपचारमा आउने र मृत्यु हुनेको संख्या गत वर्षको दाँजोमा बढी देखिएको छ । गत वर्ष सास फेर्ने गाह्रो हुनेबित्तिकै अस्पताल पुग्नेहरू बढी भए पनि हाल जटिल अवस्था बनेपछि आउनेको संख्या बढ्दो छ । ‘अहिले त संक्रमित अस्पताल पुग्दै आईसीयू वा भेन्टिलेटर चाहिन्छ, कतिको त पुग्नासाथ मृत्युसमेत हुने गरेको छ,’ सहप्रवक्ता डा. अधिकारी भन्छन्, ‘हाल संक्रमित भए पनि धेरैले परीक्षण गराएका छैनन्, जसले गर्दा अवस्था भयावह देखिएको हो ।’ अहिलेको संक्रमण विस्तार र चक्रलाई तुरुन्त तोड्न कडा प्रक्रिया नअपनाए मुलुकले कोभिडको सघन उपचार थेग्न नसक्ने उनले बताए । ‘संक्रमण यही गतिमा जाने हो भने उपत्यकामा एक साताभित्र आईसीयू/भेन्टिलेटर पाउने अवस्था रहँदैन,’ उनले भने ।

हाल कोभिडको उपचार गराउनेमा निमोनिया भएका बिरामी बढी देखिएका छन् भने युवाहरूको संख्या उल्लेख्य छ । ‘कोभिडको मारमा युवापुस्ता बढी छन्,’ शुक्रराज ट्रपिकल तथा सरुवा रोग अस्पतालका प्रमुख कन्सलटेन्ट डा.अनुप बाँस्तोलाले भने, ‘कोभिडका बिरामी सरदर आईसीयूमा दुई सातासम्म बस्ने गरेका छन्, यस्तै अवस्था रहे सघन उपचार पाउन गाह्रो छ ।’ बेलायती भेरियन्टको कोभिड व्यापक रूपमा देखिन थालेको अवस्थामा ‘डबल म्युटेन्ट भेरियन्ट’ समेत पाइएकाले संक्रमणपछि देखिने स्वास्थ्य जटिलता पहिलेको दाँजोमा बढी छ । बेलायती भेरियन्टबाट संक्रमितलाई अस्पतालमा भर्ना हुनुपर्ने, रोगमा गम्भीरता देखिने र मृत्युदर बढी हुने विश्व स्वास्थ्य संगठनले जनाएको छ ।

शनिबार ६ हजार ४ नमुनाको पीसीआर परीक्षण गर्दा ७ सय ६८ जनामा संक्रमण देखिएको छ भने पछिल्लो २४ घण्टामा ५ जनाको मृत्यु भएको छ । हाल देशभर ५ हजार ५ सय ४५ जना सक्रिय संक्रमित छन् । कोभिडबाट मृत्यु हुनेको संख्या ३ हजार ७५ पुगेको छ ।

प्रकाशित : वैशाख ५, २०७८ ०७:२९
पूरा पढ्नुहोस्
प्रतिक्रिया
पठाउनुहोस्
×