भीमफेदी–कुलेखानी सुरुङमार्ग : ६ परामर्शदाता छनोट- अर्थ / वाणिज्य - कान्तिपुर समाचार

भीमफेदी–कुलेखानी सुरुङमार्ग : ६ परामर्शदाता छनोट

छानिएका नेपालीसहित कोरिया, टर्की, सिंगापुर र अस्ट्रेलियाका कम्पनीसँग प्राविधिक र आर्थिक प्रस्ताव माग
प्रताप विष्ट

हेटौंडा — प्रदेश राजधानी हेटौंडा र संघीय राजधानी काठमाडौंबीचको आवतजावतलाई सहज बनाउन वाग्मती सरकारले पोस्टबहादुर बोगटी सुरुङमार्ग (भीमफेदी–कुलेखानी सुरुङमार्ग) निर्माणका लागि अन्तर्राष्ट्रिय स्तरका ६ वटा परामर्शदाता कम्पनीको छनोट गरेको छ ।

सुरुङमार्ग निर्माणका लागि भीमफेदी–कुलेखानी सुरुङमार्ग निर्माण आयोजनाले भदौ २ मा परामर्शदाता छनोट गर्न आशयपत्र माग गरेको थियो । १२ अन्तर्राष्ट्रियस्तरका कम्पनीले आशयपत्र दर्ता गराएका थिए । जसमध्ये नेपालको फुलब्राइट कम्पनीसहित, कोरिया, टर्की, सिंगापुर र अस्ट्रेलियाका कम्पनी छनोटमा परेका छन् । ‘यी कम्पनीहरूसँग प्राविधिक र आर्थिक प्रस्ताव माग गरेका छौं,’ आयोजना प्रमुख नवीनकुमार सिंहले भने, ‘यसका लागि आगामी जेठ २ सम्मको समयसीमा दिएका छौं ।’

उनका अनुसार अहिले सुरुङमार्गको वातावरणीय प्रभाव मूल्यांकन (ईआईए) को काम भइरहेको छ । एनईए इन्जिनियरिङ कम्पनीले सुरुङको डीपीआर पुनरावलोकनसमेत गरिरहेको छ । ईआईए र डीपीआर पुनरावलोकन रिपोर्ट वैशाख अन्तिम सातासम्म आइसक्नेछ । आगामी भदौसम्ममा सुरुङ निर्माणका लागि टेन्डर आह्वान गर्ने दाबी आयोजनाको छ ।

प्रदेश सरकारको गौरवको आयोजनाका रूपमा रहेको यो सुरुङमार्ग निर्माणमा सहकार्य गर्न संघीय सरकारले ६ महिनाअघि नै कार्यदल गठन गरेको थियो । संघीय सरकारले सह–लगानी गर्न प्राविधिक, आर्थिक र कानुनी पक्षको अध्ययन गरी प्रतिवेदन पेस गर्न उक्त कार्यदल गठन गरेको हो । कार्यदलमा भौतिक पूर्वाधार तथा यातायात मन्त्रालयका सहसचिवको संयोजकत्वमा अर्थ मन्त्रालयका सहसचिव, प्रधानमन्त्री तथा मन्त्रिपरिषद्को कार्यालयका कानुनी सहसचिव, भौतिक पूर्वाधार विकास मन्त्रालय वाग्मती प्रदेशका सचिव, नेपाली सेनाका प्रतिनिधि र भौतिक पूर्वाधार तथा यातायात मन्त्रालयले तोकेको पूर्वाधार विज्ञ सदस्य छन् ।

कार्यदललाई एक महिनाभित्र प्रतिवेदन पेस गर्न भनिए पनि हालसम्म भएको छैन । जसका कारण सुरुङमार्ग निर्माणको अन्य प्रक्रियाले समेत गति लिन सकेको छैन । ‘संघीय सरकारबाट कार्यदल गठन गरेर अड्काउने काम भएको छ,’ आयोजनाका एक वरिष्ठ इन्जिनियरले भने, ‘पूर्वाधार कम्पनीको दबाब सरकारमाथि परेको छ ।’ यो आयोजना निर्माणको जिम्मेवारी पूर्वाधार कम्पनीले पाएको थियो । तर रकमको अभावले उसले अहिलेसम्म काम सुरु गर्न सकेको छैन ।

१९ अर्ब ३२ करोड ५ लाख ७६ हजार लागतमा निर्माण हुन लागेको यो आयोजना ४२ महिनामा सम्पन्न गर्ने लक्ष्य छ । आयोजनाको डिनाइनअनुसार भीमफेदी–६ बगर र इन्द्रसरोवर–२ कुलेखानीको ड्याममुनि ७.५ मिटर व्यास भएका दुईवटा सुरुङ निर्माण हुनेछन् । जसले साँघुरो, घुमाउरो र जोखिमयुक्त १६ किलोमिटर सडकलाई ३ किमिमा छोट्याइदिनेछ ।

आयोजनाको प्रमुख संरचनाका रूपमा रहेका दुईवटा सुरुङ एकआपसमा ४० मिटरको फरकमा समानान्तर रूपमा निर्माण गरिने आयोजना प्रमुख सिंहले बताए । उनका अनुसार सुरुङका दुवैतिर गरी साढे २ किमि लामो एप्रोच सडक, ७५ मिटर र ३५ मिटर लम्बाइ भएका दुईवटा पुल निर्माण हुनेछन् । आयोजना पूरा भएसँगै हेटौंडाबाट राजधानी प्रवेश गर्ने यो वैकल्पिक मार्ग ६८ किलोमिटरमा झर्नेछ  ।

प्रदेश सरकारले आर्थिक वर्ष २०७५/७६ देखि यो आयोजनालाई बर्सेनि नीति तथा कार्यक्रममा राख्दै आएको छ । बहुवर्षीय योजनाका रूपमा रहेको आयोजनालाई चालु आव २०७७/७८ मा १ अर्ब रुपैयाँ बजेट विनियोजन गरिएको छ  । संघीय सरकारले पनि आर्थिक साझेदारी गर्ने चालु आवको बजेट वक्तव्यमा उल्लेख गरेको छ । सुरुङमार्गसँगै सिस्नेरीतर्फको मोटरबाटोलाई फराकिलो र स्तरोन्नति गरिने भौतिक पूर्वाधार विकास मन्त्रालयले जनाएको छ । भैंसेदेखि भीमफेदीसम्मको मोटरबाटो दुई लेनको बनाउने कार्य सुरु भइसकेको छ ।

प्रकाशित : वैशाख २, २०७८ ०७:१२
प्रतिक्रिया
पठाउनुहोस्

नर्सिङ कलेजका २२ छात्रामा कोरोना

शंकर आचार्य, तृप्ति शाही

पर्सा/बैतडी — वीरगन्जको बिर्तास्थित चिकित्साशास्त्र अध्ययन संस्थानअन्तर्गतको नर्सिङ क्याम्पसका २२ छात्रामा कोरोना संक्रमण भएको छ । नारायणी अस्पतालका कोभिड संयोजक डा. सरोज रोशन दासका अनुसार आइतबारदेखि मंगलबारसम्म २२ छात्रामा कोरोना पुष्टि भइसकेको छ ।

डा. दासका अनुसार जिल्लामा तीन दिनमा ९६ संक्रमित थपिएका छन् । नारायणी अस्पतालमा गरिएको परीक्षणमा आइतबार ६० जनाको स्वाब परीक्षण गर्दा २८ जना, सोमबार ९५ जनाको परीक्षणमा ४० र मंगलबार ७९ जनाको परीक्षणमा २८ जनामा कोरोना देखिएको हो । यसबाहेक यहाँस्थित नेपाल–भारत सीमामा गरिएको परीक्षणबाट बुधबारसम्म १० जना संक्रमित भेटिएका छन् ।

बस्तीको बीचमा रहेको उक्त क्याम्पसका छात्राहरू दैनिक बजार र अस्पतालसम्म पुग्ने गरेकाले समुदायमा संक्रमण फैलन सक्ने डर बढेको छ । सामाजिक अभियन्ता प्रकाश थारू स्कुल कलेजमा संक्रमण प्रवेश गरेकाले केही दिनका लागि बन्द गर्नुको विकल्प नरहेको बताउँछन् । ‘यस पटक बालबालिकामा संक्रमण बढी देखिएको छ, उनीहरूलाई पढाइको नाममा अझै पनि स्कुल आउन बाध्य गरिएको छ,’ उनले भने, ‘स्कुले बालबालिकाबाट घरघरै कोरोना संक्रमण पुगे स्थिति भयावह हुन सक्छ ।’

यसैबीच, वीरगन्जको सीमानाकास्थित हेल्थ डेस्कमा बुधबार एकै दिन ५ जनामा संक्रमण पाइएको छ । तीमध्ये एक नेपाली र ४ भारतीय छन् । वीरगन्ज भन्सारस्थित सशस्त्र प्रहरी राजस्व गस्ती टोलीका निमित्त प्रमुख सशस्त्र प्रहरी निरीक्षक विष्णु उप्रेतीका अनुसार भारतको कोलकातामा रोजगारी गरेर फर्किएका सिन्धुलीका ३७ वर्षीय युवकमा कोरोना पुष्टि भएको हो । उनी गृहजिल्ला सिन्धुली फर्कंदै थिए ।

छैन तयारी

भारतबाट बैतडी फर्किएका १५ जनामा कोरोना संक्रमण देखिएको छ । नेपाल–भारत सीमानाका झुलाघाटबाट फर्केका उनीहरूमा संक्रमण देखिएको स्वास्थ्य कार्यालय बैतडीले जनाएको छ । स्वास्थ्य प्रमुख योगेश भट्टका अनुसार संक्रमित सबै घरमै छन् । उनीहरू दशरथचन्द नगरपालिका, दोगडाकेदार र पञ्चेश्वर गाउँपालिकाका हुन् ।

दिनहुँजसो भारतबाट आउनेमा कोरोना देखिन थाले पनि स्थानीय तहमा क्वारेन्टाइन र आइसोलेसनमा राख्ने तयारी भने शून्य छ । यसबारे प्रमुख जिल्ला अधिकारीसँगै बसेर स्थानीय तहका प्रतिनिधिसँग धेरै पटक छलफल गरे पनि पालिकाहरूले संक्रमितको व्यवस्थापनका लागि कुनै तयारी नगरेको स्वास्थ्य कार्यालय प्रमुख भट्टले बताए । अस्थायी अस्पताल भएका

पालिकाले पनि संक्रमितलाई घरमै राखिरहेको उनको भनाइ छ । झुलाघाट नाकाबाट अहिले दैनिक दुई सय जना बढी नेपाली भित्रिइरहेका छन् ।

प्रकाशित : वैशाख २, २०७८ ०७:०७
पूरा पढ्नुहोस्
प्रतिक्रिया
पठाउनुहोस्
x
×