४६ लाखको खानेतेल बोकेको ट्रक ८ दिनपछि फेला

केही कार्टुन तेलसहित ट्रक बेवारिसे अवस्थामा प्रहरीले फेला पारेको हो । सिरहाका प्रहरी प्रमुख एसपी सुदीप राजभण्डारीका अनुसार स्याङ्जातर्फ जाँदा बीचबाटोबाटै गायब भएको ट्रकमा करिब ४६ लाख रुपैयाँ बराबरको २२ सय कार्टुन पशुपति उद्योगका ‘हेलो सनफलाबर’ खानेतेल थियो । तर बेवारिसे अवस्थामा फेला पार्दा ट्रकमा केही कार्टुनमा मात्र तेल भेटिएको प्रहरीले जनाएको छ ।

ट्रक चालक र सहयोगी फरार छन् । प्रहरीका अनुसार त्यही चालक वा अन्य व्यक्तिको संग्लनतामा तेल चोरी गरी बेचेको हुन सक्छन् । सिरहाको लहान, सुखीपुर, गोलबजारमा तेल बिक्री भएको सूचना पाएको इलाका प्रहरी कार्यालय गोलबजारले जनाएको छ ।

फेला परेको ट्रक र तेल खरिद बिक्री भएको सूचनाको आधारमा छानबिन भइरहेको एसपी राजभण्डारीले बताए ।