काठमाडौँ — निर्यात व्यवसायी महासंघ नेपाल (फिन) ले पाँच वर्षभित्र सात खर्ब रुपैयाँ बराबरको स्वदेशी उत्पादन निर्यात गर्ने लक्ष्य लिएको बताएको छ । महासंघले तयार पारेको तीनवर्षे रणनीतिक योजनाअनुसार काम गरेर उक्त लक्ष्य हासिल गर्न सकिने महासंघ अध्यक्ष रामबहादुर गुरुङले बताए ।
‘निर्यात वृद्धिका लागि महासंघले सन् २०२१–२०२३ सम्मको रणनीतिक योजना तयार गरेको छ,’ काठमाडौंमा शुक्रबार आयोजित महासंघको प्रथम साधारणसभाका अवसरमा उनले भने, ‘महासंघ स्थापना भएको तीन वर्षमा ३ खर्ब रुपैयाँ र पाँच वर्षमा ७ खर्ब रुपैयाँ निर्यात पुर्याउने लक्ष्य छ । यसका लागि निर्यात विकास प्रवर्द्धन नीति तयार गर्न सरकारसँग पहल गर्छौं ।’
सरकारले निर्यात वृद्धिका लागि २०७८ साललाई निर्यात वर्ष घोषणा गर्नुपर्ने उनको भनाइ छ । आर्थिक वर्ष २०७८/७९ को बजेटमा निर्यात प्रवर्द्धनका लागि पाँच करोड रुपैयाँ छुट्याउनुपर्ने उनले बताए । ‘निकासीका वस्तु सीमित छन् । तर आयातको परिमाण बढेको बढ्यै छ,’ गुरुङले भने, ‘निर्यात व्यापारमा हामी कहाँ चुक्यौं ? यसको उत्तर खोज्नुपर्ने भएको छ ।’
कार्यक्रममा अर्थमन्त्री विष्णुप्रसाद पौडेलले व्यवसायीले उठाएका समस्या समाधान गर्न सके आफ्नो जिम्मेवारी पूरा भएको महसुस गर्ने बताए । व्यवसायीको मनोबल उच्च भए सरकारले लिएको ‘समृद्ध नेपाल, सुखी नेपाली’ को लक्ष्य पूरा हुने उनको भनाइ छ । ‘निर्यात व्यवसायमा देखिएका समस्यालाई आगामी बजेटमा सम्बोधन गरिनेछ,’ मन्त्री पौडेलले भने, ‘सरकार व्यवसायीहरूको सहयोगी बन्न तयार छ ।’
उक्त अवसरमा परराष्ट्रमन्त्री प्रदीप ज्ञवालीले सरकारले कूटनीतिक रूपमा निर्यात प्रवर्द्धनका प्रयास गरिरहेको उल्लेख गरे । ‘हामीले व्यापार प्रवर्द्धनका लागि भारतलगायत मुलुकसँग व्यापार सन्धिहरू अघि बढाएका छौं,’ उनले भने । व्यवसाय सहज बनाउन डिजिटल फ्रेमवर्कमा मन्त्रालयले काम गरिरहेको सञ्चारमन्त्री पार्वत गुरुङले जानकारी दिए । ‘ई–कमर्स, ई–बिजनेस जस्ता डिजिटल पूर्वाधार निर्माण गरे निर्यात व्यवसायमा सहयोग पुग्छ,’ उनले भने ।
निर्यात प्रवर्द्धनका लागि अन्तर्राष्ट्रिय कूटनीतिक नियोगहरूलाई नेपाली वस्तुको बजार प्रवर्द्धन गर्न व्यवसायीको लक्ष्य तोकिनुपर्ने नेपाल उद्योग वाणिज्य महासंघका वरिष्ठ उपाध्यक्ष चन्द्र ढकालले बताए । नेपाल उद्योग परिसंघ अध्यक्ष सतीशकुमार मोरले भने सरकारले निजी व्यवसायीलाई सहयोग गरे आर्थिक गतिविधि चलायमान बन्ने धारणा राखे ।
महासंघमा २७ सदस्यीय कार्यसमिति
यसैबीच निर्यात व्यवसायी महासंघ नेपालमा २७ सदस्यीय नयाँ कार्यसमिति गठन भएको छ । महासंघको प्रथम साधारणसभाका अवसरमा शुक्रबार रामबहादुर गुरुङको अध्यक्षतामा कार्यसमिति गठन गरेको हो । महासंघका उपाध्यक्षमा चण्डीप्रसाद अर्याल, शंकर पाण्डे, दुर्गाविक्रम थापा र गोविन्द घिमिरे छन् । यसैगरी महासचिवमा अमृत खड्का, सचिवमा तेन्जिङ शेर्पा, कोषाध्यक्षमा किरण डंगोललगायत छन् ।
प्रकाशित : चैत्र २८, २०७७ ०८:३९