फास्ट ट्य्राकमा विकास समितिको पनि छानबिन- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

फास्ट ट्य्राकमा विकास समितिको पनि छानबिन

कान्तिपुर संवाददाता

काठमाडौँ — काठमाडौं–तराई–मधेस द्रुतमार्ग (फास्ट ट्य्राक) को सुरुङमार्ग निर्माणमा सीमित निर्माण व्यवसायीलाई सर्टलिस्ट गरिएपछि संसद्का विभिन्न समितिले यसबारे चासो देखाएका छन् । केही समयअघि राष्ट्रिय सभाको प्रत्यायोजन व्यवस्थापन तथा सरकारी आश्वासन समितिले समिति सदस्य, रक्षासचिव, सार्वजनिक खरिद अनुगमन कार्यालय र काठमाडौं–तराई मधेस द्रुतमार्ग आयोजना प्रमुखलाई बोलाएर छलफलसमेत गराएको थियो ।


प्रतिनिधिसभाअन्तर्गत लेखा समितिले सुरुङ निर्माणको सर्टलिस्टमा सीमित निर्माण व्यवसायी मात्र छानिएपछि मिलेमतोको शंकामा छानबिन थालेको छ । आवश्यक कागजात मागेर समितिले छानबिन अघि बढाएको बताएको छ । एक साताअघि मात्र प्रतिनिधिसभाको विकास तथा प्रविधि समितिले समिति सदस्य र आयोजना प्रमुखलाई बोलाएर छलफल गराएको थियो । छलफलबाट सांसद गणेश पहाडीको संयोजकत्वमा यसबारे अध्ययन गर्ने गरी पाँच सदस्यीय उपसमिति बनाइएको छ । समिति सदस्यमा इन्दुकुमारी शर्मा, केदार सिग्देल, अनिलकुमार झा र जिपछिरिङ लामा छन् ।

उपसमितिको पहिलो बैठक मंगलबार बस्ने समिति सभापति कल्याणीकुमारी खड्काले बताइन् । ‘अहिलेसम्म समयमै काम हुने/नहुने अन्योल छ, सुरुङको सर्टलिस्टिङको विषय विवादास्पद बनेको छ,’ खड्काले भनिन्, ‘वित्तीय एवं भौतिक प्रगतिको पनि कुरा छ । यसबारे अध्ययन गर्ने गरी उपसमिति बनाइएको हो ।’ नेपाली सेनाको व्यवस्थापनमा ७२.५ किमि सुरुङमार्ग निर्माण जारी छ । राष्ट्रिय गौरवको आयोजनाका रूपमा रहेको द्रुतमार्ग आर्थिक वर्ष २०८०/८१ सम्म सक्नुपर्ने कार्यतालिका छ । यसमा अहिलेसम्म १८ अर्ब ३६ करोड रुपैयाँ खर्च भइसकेको छ । भौतिक प्रगति भने १२ प्रतिशत मात्र छ । सेनाले २०७४ जेठबाट द्रुतमार्ग निर्माण एवं व्यवस्थापनको जिम्मेवारी लिएको हो । द्रुतमार्गअन्तर्गत महादेवटार ३.३५५ किमि, धेद्रे १.६३० र लेनडाँडामा १.४३० किमि सुरुङ निर्माण गर्नुपर्नेछ ।

सुरुङ निर्माणका लागि ‘प्रि–क्वालिफिकेसन’ (पीक्यू) टेन्डरबाट दुई कम्पनी मात्र छानिएका छन् । सुरुङ निर्माणका लागि पीक्यूमा सहभागी ४३ निर्माण कम्पनीमध्ये निर्माण प्याकेजमा एउटा र अर्को प्याकेजमा दुई कम्पनी मात्रै छानिएका छन् । एउटा कम्पनी दुवैतिर छानिएको छ । थोरै कम्पनी मात्र छनोटमा परेपछि मिलेमतोको आशंका गरिएको हो ।

प्रकाशित : चैत्र १७, २०७७ ०७:२८
प्रतिक्रिया
पठाउनुहोस्

सबैतिर नयाँ प्रणालीमा मेलम्ची पुग्न सात महिना लाग्ने

कान्तिपुर संवाददाता

काठमाडौँ — उपत्यकामा वितरण थालिएको मेलम्चीको पानी नयाँ प्रणालीअनुसार सबै धारामा पुर्‍याउन सात महिना लाग्ने भएको छ । लामो प्रतीक्षापछि आइतबारबाट मेलम्चीको पानी उपत्यकामा वितरण थालिएपछि स्थानीय उत्साहित छन् ।

काठमाडौंको अनामनगर क्षेत्रमा आइतबार मेलम्चीको पानी थाप्दै सर्वसाधारण । तस्बिर : दीपक केसी/कान्तिपुर

पानी वितरण भने काठमाडौं उपत्यका खानेपानी लिमिटेड (केयूकेएल) को पुरानै प्रणालीबाट भइरहेको छ । केही स्थानमा परीक्षणका रूपमा मात्र नयाँ प्रणालीबाट मात्र वितरण भइरहेको छ ।

अनामनगर क्षेत्रमा पहिलो दिन नयाँ प्रणालीबाट ५ सय २२ घरमा चौबीसै घण्टा पानी दिइएको मेलम्ची उपआयोजना–२ आयोजना कार्यान्वयन निर्देशनालयका निर्देशक कमलराज श्रेष्ठ बताउँछन् । सोमबार बबरमहलदेखि उत्तर र पुरातत्त्व विभागको दक्षिणतर्फको धोबीखोलासम्म २ सय घरमा चौबीसै घण्टा आउने गरी पानी छाडिएको थियो । पानी आएपछि उत्साहित स्थानीय कतै पाइप लिकेज देखिए तिनको मर्मतसम्भारमा जुटेको उनको भनाइ छ । अहिले २ सय २० किमि क्षेत्रको पाइपमा परीक्षणको काम भएको छ ।

‘नयाँ सिस्टम पूरा भएपछि पुरानो सिस्टम मूलबाटै काटिदिन्छौं, त्यसपछि नयाँ सिस्टम लागू हुनेछ,’ श्रेष्ठले भने । नयाँ सिस्टममा १ लाख १० हजार धारा बन्नेछन् । महाराजगन्ज, बसपार्क, विशालनगर, छाउनी, बाफल, स्वयम्भूलगायत केही क्षेत्रमा अझै नयाँ पाइप विस्तारको काम भएको छैन । ‘असोजमा ठेक्का सम्झौता भएर काम भइरहेको छ,’ उनले भने, ‘रिङरोड क्षेत्रमा दुई वर्षभित्र सबै नेटवर्कबाट चौबीसै घण्टा पानी आउने गरी काम भइरहेको छ ।’ नयाँ प्रणालीबाट पानी नआउँदासम्म केयूकेएलको अन्तरिम व्यवस्थापनअन्तर्गत मौजुदा प्रणालीबाट वितरण हुनेछ । ‘सबै ठाउँमा नयाँ सिस्टमबाट पानी आउन दुई वर्ष लाग्नेछ,’ श्रेष्ठले भने, ‘जुन प्रणालीमा सबै गरेर १ लाख ८० हजार धारा हुनेछन् ।’

पानी वितरणको क्रम सोमबार पनि जारी नै रहेको केयूकेएलका प्रवक्ता प्रकाशकुमार राईले जानकारी दिए । महाँकाल, अनामनगर, मीनभवन, बानेश्वर र खुमलटारमा वितरण भइरहेको छ । अनामनगरमा केही दिनभित्रमै १६ सय घरमै पानी पुर्‍याइने उनको भनाइ छ । पहिलो दिन सबै क्षेत्रमा थोरै समय भए पनि पानी पुर्‍याउने केयूकेएलले जनाएको थियो । ‘सबै धारामा पानी पुर्‍याउने भनिएको थियो । तर यसमा प्राविधिक समस्या देखियो,’ उनले भने, ‘सुरुसुरुमा मोटर लगाएर पानी तानेपछि अन्यत्र नपुगेको हो ।’

पानी नआएको धेरै भएको र एकैचोटि पानी आउँदा सबैले मोटर लगाएपछि प्रेसर व्यवस्थापन गर्न गाह्रो भएको राईको भनाइ छ । अहिले चार करोड लिटर पानी आएको छ । केही दिनभित्र साढे ६ करोड पुग्ने उनको भनाइ छ । दोस्रो चरणमा बालाजु, तेस्रो चरणमा बाँसबारी र महाराजगन्जस्थित ट्यांकीमा गरी साढे ८ करोड लिटर पानी जम्मा हुनेछ । त्यस्तै चौथो चरणमा कीर्तिपुर, ठिमी र भक्तपुरका ट्यांकीमा गरी १७ करोड लिटर पानी जम्मा हुने केयूकेएलले जनाएको छ ।

‘सबै पानी आएर वितरण गर्न करिब २० दिन लाग्ने अनुमान गरेका छौं,’ राईले भने, ‘त्यो बेलासम्म सबै २ लाख २५ हजार धारामै नियमित रूपमा पानी वितरण हुनेछ ।’ महाँकालचौरबाट मात्र ५८ हजार धारामा पानी पुगेको छ । बानेश्वर शाखाका २७ हजार धारामध्ये कोटेश्वर र नरेफाँट क्षेत्रमा अहिले पानी दिइएको छैन । अहिले बानेश्वरका १८ हजार धारामा आएको छ । ललितपुरमा खुमलटार वितरण शाखाबाट वितरण भइसकेको छैन ।

उपत्यकामा दैनिक पानीको माग ४३ करोड लिटर छ । सुक्खा सिजनमा करिब १० करोड लिटर ग्राहकको धारामा पानी पुर्‍याउन सकिने राईको भनाइ छ । काठमाडौं, भक्तपुर र ललितपुरका करिब ५० लाख जनसंख्याले यो पानी उपभोग गर्न पाउनेछन् ।

प्रकाशित : चैत्र १७, २०७७ ०७:२५
पूरा पढ्नुहोस्
प्रतिक्रिया
पठाउनुहोस्
×