नेप्सेमा झन्डै ८० अंकको गिरावट- अर्थ / वाणिज्य - कान्तिपुर समाचार

नेप्सेमा झन्डै ८० अंकको गिरावट

कान्तिपुर संवाददाता

काठमाडौँ — सेयर कारोबार मापक नेप्से परिसूचक आइतबार करिब ८० अंकले घटेको छ । यो गिरावटसँगै समग्र नेप्से परिसूचक २ हजार ४ सय ७४.३९ विन्दुमा ओर्लेको छ । अघिल्लो दिनको तुलनामा यो ३.१२ प्रतिशत घटेको हो । गत बिहीबार करिब ४५ अंक घटेको नेप्से आइतबार ७९.७४ विन्दुले घटेको हो ।

मुलुकको बदलिँदो राजनीतिक घटनाक्रमसँगै सेयर बजार ओरालो लाग्न थालेको छ । सोही क्रममा गत साता आइतबार र बुधबारबाहेक सबै दिन नेप्से घटेको थियो । गत आइतबार नेप्से ३.६६ अंक र बुधबार १३.०४ अंकले बढेको थियो । तर बजार सोमबार ३२ अंक, मंगलबार २१ अंक र बिहीबार झन्डै ४५ अंकले नेप्से घटेको थियो । यसले सेयर बजारमा बढ्दोभन्दा घट्दो चाप बलियो छ भन्ने देखाउने जानकारहरु बताउँछन् ।

आइतबार बजार खुल्दा नेप्से सामान्य बढे पनि त्यसपछि निरन्तर घटेको थियो । नेप्से घटे पनि बजारमा करिब साढे ८ अर्ब रुपैयाँ बराबरको सेयर कारोबार भएको छ । सो दिन करिब ९६ हजार कारोबारबाट २ सय ७ कम्पनीका १ करोड ६० लाख १७ हजार कित्ता बराबर सेयर किनबेच भएका थिए । परिसूचक घटेपछि सेयर बजारको आकार कुल बजार पुँजीकरण पनि ३४ खर्ब ०७ अर्ब रुपैयाँ कायम भएको छ ।

होटल्स तथा पर्यटन बाहेकका सबै उपसमूहका परिसूचक आइतबार घटे । नेप्सेले आइतबारदेखि चन्द्रागिरि हिल्सलाई होटल्स तथा पर्यटन समूहमा राखेर कारोबार सुरु गरेको छ । सो दिन होटल्स तथा पर्यटन उपसमूहको परिसूचक ०.५४ प्रतिशत बढेको छ । सो दिन लगानी समूहको परिसूचक सवैभन्दा बढी ४.१३ प्रतिशत घटेको छ । यस्तै बैंकिङ उपुसमूहको परिसूचक २.९६, व्यापारको ०.३८, विकास बैंकको २.८६, जलविद्युत्को ३.३५, वित्त कम्पनीको २.५७, निर्जीवन बिमाको १.३८ र उत्पादन तथा प्रशोधनको ३.५५ प्रतिशत घटेको नेप्सेले जनाएको छ ।

प्रकाशित : फाल्गुन १६, २०७७ १९:१७
प्रतिक्रिया
पठाउनुहोस्

सैनिक ‘कु’ को विरोधमा म्यान्मारमा प्रदर्शन, प्रहरीको गोलीले १० जनाको मृत्यु

एजेन्सी

यांगुन — सैनिक ‘कु’ को विरोधमा म्यान्मारमा गरिएको प्रदर्शनका क्रममा प्रहरीले गोली चलाउँदा कम्तीमा १० जनाको मृत्यु भएको छ । कम्तीमा १२ जना घाइते भएका छन् ।

सैनिक ‘कु’ को विरोधमा म्यान्मारमा दंगा भड्किएपछि स्थिति नियन्त्रणमा लिने प्रयासमा अश्रुग्यास प्रहार गर्दै प्रहरी : तस्बिर : रोयटर्स

यांगुन, दावेई र म्यान्डलेमा गरिएका प्रदर्शन दबाउन प्रहरीले आइतबार अत्याधिक बल प्रयोग गरेको जनाइएको छ । त्यसक्रममा प्रहरीले गोली, अश्रुग्यांस, लाठी तथा पानीका फोहोरा हानेको बीबीसीले उल्लेख गरेको छ ।

म्यान्मारमा फेब्रुअरी १ मा सेनाले सत्या हत्याएपछि विरोधमा दिनहुँ प्रदर्शन हुँदै आएको छ । तर आइतबार सुरक्षाकर्मीले गरेको दमन त्यसयताकै हिंसात्मक भएको जनाइएको छ । सामाजिक संजालमा पोष्ट गरिएका दृष्यहरुमा प्रहरीले प्रदर्शनकारीलाई लखेटि लखेटि कुटेका र केयौं मानिसहरु रक्ताम्य भएका देखिन्छ । तर सामाजिक संजालमा सार्वजनिक अपुष्ट विवरणअनुसार आइतबारका प्रदर्शनमा प्रहरीले गरेको दमनका क्रममा कम्तीमा २० जनाको मृत्यु भएको छ ।

सबैभन्दा ठूलो सहर यांगुनमा अश्रुग्यांसले प्रदर्शनकारीलाई भगाउन नसकेपछि प्रहरीले गोली तथा स्टन ग्रिनेट प्रहार गरेको हो । यांगुनमा कम्तीमा ५ जनाको मृत्यु भएको चिकित्सक तथा मानवअधिकारवादीले पुष्टि गरेका छन् ।

‘हामी प्रदर्शनस्थलमा आउनेबित्तिकै प्रहरीले गोली चलायो । उनीहरुले चेतावनीको एक शब्दसम्म पनि उच्चारण गरेनन् । केही शिक्षकहरु गम्भिर घाइते भएका छन् र केहि नजिकैका घरहरुमा लुकेका छन्,’ प्रदर्शनकारी एमी क्यावलाई उद्धृत गर्दै समाचार संस्था एएफपीले जनाएको छ । उनका अनसार केहि प्रदर्शनकारीलाई प्रहरीले नियन्त्रणमा लिएको छ ।

त्यसैगरी, दावेई शहरमा गरिएको र्‍यालीका क्रममा प्रहरीले दर्जनौं राउण्ड गोली चलाएको थियो । त्यहाँ कम्तीमा ४ जनाको मृत्यु भएको हो । अन्य एक प्रदर्शनकारीको म्यान्डले सहरमा ज्यान गएको हो ।

प्रकाशित : फाल्गुन १६, २०७७ १८:५१
पूरा पढ्नुहोस्
प्रतिक्रिया
पठाउनुहोस्
×