बालुवाडाँडामा प्याराग्लाइडिङ

बालुवाडाँडा पर्यटन युवा सञ्जालको अगुवाइमा हालै समुद्री सतहदेखि ९ सय मिटर उचाइको डाँडाबाट उडान गरिएको हो । ‘गाउँका युवा मिलेर पोखरामा प्याराग्लाइडिङ गर्न जाने निधो भयो । एक जना साथीले समथर भूभागमा पनि सुरु गर्न सकिन्छ भन्ने प्रस्ताव राखे,’ सञ्जालका अध्यक्ष उमेश रानाले भने, ‘सुरुवाती चरणमा विश्वास लागेन । तर यसबारे बुझ्दै जाँदा आफ्नै ठाउँमा यो उडान गर्न सकिने प्राविधिक जानकारी पाएपछि अभियान सुरु गरेका थियौं । आज सफल भयौं ।’ दुई सय मिटर उचाइको पोखरी ताल क्षेत्रमा प्याराग्लाइडिङ ल्यान्ड गरिएको थियो ।

पूर्वी नवलपरासीमा तराई र पहाडको भूगोल भएकाले उडान सफल भएको हो । नागरिक उड्यन मन्त्रालयसँग अनुमति लिएर परीक्षण उडान गरिएको र सफल भएकाले अब यसलाई निरन्तरता दिने सञ्जालका सदस्य विमल रानाले जानकारी दिए । परीक्षण उडानका लागि कावासोती नगरपालिकाले सहयोग र समन्वय गरेको छ ।

स्थानीय युवाको योजनालाई नगरपालिकाले सहयोग गरेको छ,’ कावासोती नगरपालिकाका उपमेयर प्रेमशंकर मर्दनियाले भने, ‘होमस्टे, जंगल सफारी र पर्यापर्यटन रहेको नगरमा प्याराग्लाइडिङ थपिनुलाई हामीले नगरपालिकाको मात्र नभएर समग्र जिल्लाको पर्यटनमा कोसेढुंगा सावित भएको छ ।