घोषणाको पाँच वर्षपछि औद्योगिक क्षेत्र शिलान्यास- अर्थ / वाणिज्य - कान्तिपुर समाचार

घोषणाको पाँच वर्षपछि औद्योगिक क्षेत्र शिलान्यास

२०७२ चैत १ को मन्त्रिपरिषद् बैठकले मयूरधापको तीन सय बिघा क्षेत्रलाई औद्योगिक क्षेत्र घोषणा गरेको थियो
कान्तिपुर संवाददाता

मकवानपुर — सरकारले घोषणा गरेको पाँच वर्षमा हेटौंडा–१४ स्थित मयूरधापमा औद्योगिक क्षेत्रको शिलान्यास गरिएको छ । संघीय सरकारका उद्योग, वाणिज्य तथा आपूर्तिमन्त्री लेखराज भट्टले शुक्रबार औद्योगिक क्षेत्रको शिलान्यास गर्दै देशभरका पाँच स्थानमा चालु आर्थिक वर्षभित्रबाटै भौतिक पूर्वाधारको काम अगाडि बढाइएको बताए । २०७२ चैत १ को मन्त्रिपरिषद् बैठकले मयूरधापको तीन सय बिघा क्षेत्रलाई औद्योगिक क्षेत्र घोषणा गरेको थियो ।

काठमाडौं उपत्यकाको बालाजु, ललितपुर, पाटन र भक्तपुर आद्योगिक क्षेत्रको विकल्पका रूपमा औद्योगिक क्षेत्र निर्माण गर्न लागिएको हो । ‘अब उपत्यकाभित्र थप उद्योग सञ्चालन गर्न दिन्नौं,’ औद्योगिक क्षेत्र व्यवस्थापन लिमिटेडका अध्यक्ष नन्दकिशोर बस्नेतले भने । उपत्यकाभित्रका तीन वटै औद्योगिक क्षेत्र भरिभराउ भइसकेको र नयाँ उद्योगका लागि जग्गा नभएको उनले बताए । सडक सञ्जालका कारण छोटो दूरीमा रहेको मयूरधापलाई उपत्यकाको औद्योगिक क्षेत्रको विकल्पका रूपमा विकास गर्न लागिएको उनले बताए ।

शिलान्यास गरिएको ६ महिनाभित्र उद्योग स्थापनाका लागि आशयपत्र जारी गरिने र दुई वर्षभित्र आवश्यक पूर्वाधार निर्माण गरिएपछि काठमाडौंभित्र उद्योग खोल्न चाहनेलाई प्राथमिकतामा राखेर मयूरधापको जग्गा उपलब्ध गराइने बताइएको छ । सरकारले तीन सय बिघालाई औद्योगिक क्षेत्र घोषणा गरे पनि त्यसभित्र हाल १ सय ९९ दशमलव १२ बिघा अर्थात् १ सय ३४ दशमलव ८४ हेक्टरमा मात्र संरचना निर्माण गर्ने गरी आयोजना अघि बढाइएको औद्योगिक क्षेत्र व्यवस्थापन लिमिटेडका निर्देशक सञ्जयलाल मानन्धरले बताए । पाँच वर्षभित्र सम्पूर्ण भौतिक संरचना निर्माण गरिने र उद्योग स्थापनासँगै सञ्चालन भइसक्ने उनको दाबी छ ।

औद्योगिक क्षेत्र स्थापनका लागि आवश्यक डीपीआर तयार पारिसकेपछि मात्र शिलान्यासको तयारी गरिएको मानन्धरले बताए । मयूरधापमा ७ देखि १४ रोपनीको ६२ वटा प्लट निर्माण गरिनेछ । लिमिटेडले निर्माण गर्ने संरचनाका लागि ७ अर्ब २ करोड लागत अनुमान गरिएको छ । औद्योगिक क्षेत्रभित्र सडक, विद्युत्, पानी, ढल, उद्योगबाट निकास हुने दूषित पानी प्रशोधन केन्द्र, अत्याधुनिक प्रविधिसहितको स्मार्ट प्रशासनिक भवन निर्माण गरिने मानन्धरले जानकारी दिए ।

औद्योगिक क्षेत्र निर्माणको पहिलो चरणमा २०७८ वैशाखदेखि जग्गा विकास र तटबन्धको काम सुरु गर्ने तयारी रहेको उनको भनाइ छ । दोस्रो चरणमा सडक निर्माणका लागि ट्रयाक खोल्ने, तेस्रो चरणमा २०७९ बाट उद्योग स्थापना सुरु गरिनेछ । उद्योग सञ्चालनमा आएपछि १० हजारभन्दा बढीले रोजगारी पाउने लिमिटेडको अनुमान छ । औद्योगिक क्षेत्रभित्र पर्ने १० बिघा वन क्षेत्रलाई ग्रिन पार्कका रूपमा विकास गरिने बताइएको छ ।

२०१६ मा बालाजु, २०१९ मा पाटन र २०३६ मा भक्तपुर औद्योगिक क्षेत्र स्थापना गरिएको लिमिटेडका अध्यक्ष बस्नेतले जानकारी दिए । ५० बिघा क्षेत्रफल रहेको बालाजुमा १ सय ३७, २२ बिघा क्षेत्रफल रहेको पाटनमा १ सय १५ र ५ बिघा रहेको भक्तपुरमा ३६ वटा उद्योग छन् । ‘यी तीन वटै औद्योगिक क्षेत्रको जग्गा अभावसँगै क्षेत्रफलअनुसार उद्योग स्थापना भइसकेका छन्, त्यसकारण काठमाडौं उपत्यकाभित्र नयाँ खोल्न चाहनेका लागि जग्गा उपलब्ध गराउन नसकिने भएको हो,’ बस्नेतले भने ।

प्रकाशित : फाल्गुन १४, २०७७ २१:३४
प्रतिक्रिया
पठाउनुहोस्

पत्रकार महासंघलाई राजनीतिक चलखेलबाट परै राख्‍न प्रत्यक्ष चुनाव : आचार्य

कान्तिपुर संवाददाता

पोखरा — नेपाल पत्रकार महासंघका अध्यक्ष गोविन्द आचार्यले पत्रकार महासंघलाई राजनीतिक चलखेलबाट परै राख्न प्रत्यक्ष चुनाव गर्न लागिएको बताएका छन् ।

पोखरामा शुक्रबार गण्डकी प्रदेश समितिको नवनिर्मित कार्यालय भवन उद्घाटन गर्दै उनले प्रत्यक्ष प्रणालीले चुनावमा हुने राजनीतिक दौडधूपको अन्त्य हुने बताए । ‘पहिला केन्द्रमा चुनाव लड्नेहरु जिल्ला–जिल्ला पुग्दा धेरै राजनीति भयो,’ उनले भने, ‘अब देशभरिकै साधारण सदस्यले भोट हाल्न पाउने भएपछि त्यस्तो अवस्था आउँदैन ।’ उनले महासंघमा रहुञ्जेल राजनीतिक आस्थालाई परै राखेर पत्रकारको हकहितमा काम गनुपर्ने उल्लेख गरे । भने, ‘जुनसुकै पार्टी निकटको संगठनबाट टिकट लिए पनि निर्वाचित भइसकेपछि त्यो पार्टी र संगठन बिर्सेर सबैको साझा भएर काम गर्नुपर्छ ।’

उनले विगतमा जिल्लादेखि केन्द्रसम्मको अधिवेशनमा नीतिगत छलफल भन्दा पनि राजनीति भएकाले यसपटक साधारणसभा र निर्वाचन छुट्टाछुट्टै गर्न लागिएको बताए । उनका अनुसार चैत १६ मा पत्रकार महासंघको स्थापना दिवसमा नवनिर्वाचित समितिलाई पदभार ग्रहण गराउने गरी त्यसअगावै चुनाव हुनेछ । यसपल्ट जिल्ला–जिल्लाबाटै साधारण सदस्यले जिल्ला, प्रदेश र केन्द्रीय समितिका उम्मेदवारलाई भोट हाल्ने छन् ।

पत्रकार महासंघको गण्डकी प्रदेश समितिको ३५ लाख रुपैयाँको लागतमा भवन निर्माण सम्पन्न गरिएको छ । भवन निर्माणमा गण्डकी प्रदेश सरकारको आन्तरिक मामिला तथा कानुन मन्त्रालयले १४ लाख रुपैयाँ प्रदान गरेको छ । कास्की क्षेत्र नम्बर २ बाट निर्वाचित प्रतिनिधिसभा सदस्य विद्या भट्टराई अधिकारीले पूर्वाधार क्षेत्र विकास कार्यक्रमअन्तर्गत १० लाख रुपैयाँ छुटयाएकी थिइन् । पोखरा महानगरपालिको ४ लाख रुपैयाँ प्रदान गरेको छ । त्यसबाहेक प्रदेशको कार्यसमितिले व्यक्तिगत १ लाख ५० हजार रुपैयाँ संकलन गरेको थियो ।

प्रकाशित : फाल्गुन १४, २०७७ २०:४७
पूरा पढ्नुहोस्
प्रतिक्रिया
पठाउनुहोस्
×