मुहान संरक्षण गर्न 'रिचार्ज पोखरी' - अर्थ / वाणिज्य - कान्तिपुर समाचार

मुहान संरक्षण गर्न 'रिचार्ज पोखरी' 

विप्लव महर्जन

सल्यान — खानेपानीका मुहान सुक्न थालेपछि बाग्चौर नगरपालिका–३ का विभिन्न ठाउँमा 'रिचार्ज पोखरी' निर्माण गरिएको छ । वडा कार्यालय र उपभोक्ताको सक्रियतामा विभिन्न २० वटा मुहान संरक्षणका लागि रिचार्ज पोखरी निर्माण गरिएको हो ।

पानीका मुहान सुक्न नदिन निर्माण भएका रिचार्ज पोखरी प्रभावकारी भएको वडाध्यक्ष टीकाराम केसीले बताए । उनका अनुसार गत वर्ष पनि १ लाख ५० हजार रुपैयाँमा २० वटा रिचार्ज पोखरी निर्माण गरिएको थियो । यो वर्ष प्रधानमन्त्री रोजगार कार्यक्रमअन्तर्गत थप २० वटा रिचार्ज पोखरी बनाइन लागिएको उनले बताए । ‘अव्यवस्थित सडक निर्माण र खडेरीले बर्सेनि पानीका मुहान सुकिरहेका छन्,’ उनले भने, ‘रिचार्ज पोखरी निर्माण गरेपछि मुहानमा पानीको सतह घटेको छैन ।’ वर्षाको समयमा आकाशे पानी संकलन गर्न पनि रिचार्ज पोखरी प्रभावकारी भएको उनले बताए ।

रिचार्ज पोखरीका कारण गर्मीयाममा पनि मुहान आसपासको क्षेत्रमा चिस्यान कायम हुँदा पानीको सतह नघट्ने स्थानीय चन्द्रप्रकाश शर्माले बताए । ‘गर्मीको मौसम सुरु हुनेबित्तिकै पानी भर्न एक घण्टा तलको खोलामा झर्नुपर्थ्यो,’ उनले भने, ‘रिचार्ज पोखरीले पानीको दु:ख घटाएको छ ।’

सामुदायिक वन क्षेत्रमा रिचार्ज पोखरी निर्माण उपयुक्त भएको खानेपानी तथा सिँचाइ डिभिजन कार्यालयका प्रमुख पदमराज देवकोटाले बताए । ‘कम लगानीमा पानीको संरक्षण गर्ने यो महत्वपूर्ण विधि हो,’ उनले भने, ‘आकाशे पानी संकलन र खडेरीको समयमा मुहानको पानी सुक्न नदिन पोखरीले सहयोग गर्ने गरेको छ ।’ जलवायु परिवर्तन र अव्यवस्थित सडकका कारण ३ वर्षको अवधिमा जिल्लाका झण्डै एक सय मुहान सुकेको उनको भनाइ छ । मुहान सुक्दा करिब ७ हजार परिवार खानेपानी समस्याबाट प्रभावित भएको उनले बताए ।


प्रकाशित : फाल्गुन ११, २०७७ १६:५८
प्रतिक्रिया
पठाउनुहोस्

कोरोना अपडेट : २४ घण्टामा ११० संक्रमित, ४ को मृत्यु

कान्तिपुर संवाददाता

काठमाडौँ — पछिल्लो २४ घण्टामा नेपालमा ११० जनामा कोरोना भाइरस संक्रमण देखिएको छ । स्वास्थ्य मन्त्रालयका अनुसार मंगलबार मुलुकका विभिन्न प्रयोगशालामा गरिएको परीक्षणमा ११० जनामा संक्रमण पुष्टि भएको हो । योसँगै नेपालमा कोरोना भाइरसबाट संक्रमित हुनेको संख्या २ लाख ७३ हजार ६६६ पुगेको छ । नेपालमा १ हजार ५३३ सक्रिय संक्रमित रहेका छन् ।

पछिल्लो २४ घण्टामा थप १०२ जना संक्रमणमुक्त भएका छन् । हालसम्म निको हुनेको संख्या २ लाख ७० हजार ६८ रहेको छ ।

यसैगरी पछिल्लो २४ घण्टामा ४ जनाको कोरोना संक्रमणबाट मृत्यु भएको छ । योसँगै नेपालमा कोरोनाबाट मृत्यु हुनेको संख्या २ हजार ६५ रहेको छ ।

हालसम्म देशभर २१ लाख ४६ हजार ५३३ नमुनाको पीसीआर परीक्षण भएको छ । क्वारेन्टाइनमा ६५ जना रहेका छन् ।

प्रकाशित : फाल्गुन ११, २०७७ १६:३१
पूरा पढ्नुहोस्
प्रतिक्रिया
पठाउनुहोस्
×