हिल्सा नाका खोल्न माग- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

हिल्सा नाका खोल्न माग

छपाल लामा

हुम्ला — जिल्लाका पर्यटन तथा होटल व्यवसायीले हिल्सा नाका सञ्चालनमा ल्याउन सरकारसँग माग गरेका छन् । मानसरोवर–कैलाश दर्शन गर्ने सिजन नजिकिएसँगै व्यवसायीले छिट्टै नाका खुला गर्न माग गरेका हुन् ।

हुम्लामा हरेक वर्ष वैशाखदेखि मानसरोवर जाने भारतीय तीर्थयात्रीको घुइँचो लाग्छ । गत वर्ष कोरोना महामारीका कारण बन्द भएको नाका माघयता हिमपातका कारण अवरुद्ध छ । नाका खुले भारतीय तीर्थयात्रीलाई हुम्लाको बाटो हुँदै मानसरोवर पठाउन सकिने होटेल व्यवसायी संघका अध्यक्ष मिम लामाले बताए । उनका अनुसार नाका नखुल्दा नाम्खा र सिमकोटका बासिन्दालाई चिनियाँ सहर ताक्लाकोटमा गएर व्यापार र मजदुरी गर्न समस्या भएको छ । ‘हुम्लाका अधिकांश बासिन्दा ताक्लाकोटको व्यापार र रोजगारीमा निर्भर छन्,’ उनले भने, ‘नाका नखुल्दा स्थानीयको जीविकोपार्जनमा समस्या भएको छ ।’ उनका अनुसार हिल्सा भारतीय तीर्थयात्रीलाई लक्षित गरी झण्डै ९० वटा होटल खुलेका छन् ।

नाका बन्द हुँदा स्थानीयको जीविकोपार्जनसँगै रोजगारी र व्यापार व्यवसायमा समस्या भएको उद्योग वाणिज्य संघका अध्यक्ष नाम्ग्याल तामाङले बताए । ‘नाका बन्द हुँदा अधिकांश व्यवसाय ठप्प छन्,’ उनले भने, ‘गर्मी मौसम सुरु भएसँगै हिउँ पनि बिलाउन थालेको छ, सरकारले अविलम्ब नाका खुला गर्नुपर्छ ।’ उनका अनुसार नाका बन्द हुँदा पर्यटकीय सुविधा भएका सिमकोटका २६ होटल बन्द छन् । उनले भारतीय तीर्थयात्री मानसरोवर–कैलाशको दर्शनका लागि आउन आतुर भएको उनको भनाइ छ ।

नाका बन्द भएकै कारण हुम्लाबाट ताक्लाकोटतर्फ निकासी हुने जडीबुटी बीचमै रोकिएको नाम्खा–६ का वडाध्यक्ष पाल्जोर तामाङले बताए । ‘सदरमुकाम टाढा हुँदा वडाबासी चिनियाँ खाद्यान्नमा निर्भर छन्,’ उनले भने, ‘नाका बन्द भएपछि दैनिक उपभोग्य सामान ढुवानीमा समस्या भएको छ ।’

प्रकाशित : फाल्गुन ९, २०७७ १७:५०
प्रतिक्रिया
पठाउनुहोस्

कोरोना अपडेट : २४ घण्टामा ८० संक्रमित, १२१ संक्रमणमुक्त

कान्तिपुर संवाददाता

काठमाडौँ — पछिल्लो २४ घण्टामा नेपालमा ८० जनामा कोरोना भाइरस संक्रमण देखिएको छ । स्वास्थ्य मन्त्रालयका अनुसार आइतबार मुलुकका विभिन्न प्रयोगशालामा गरिएको परीक्षणमा ८० जनामा संक्रमण पुष्टि भएको हो । योसँगै नेपालमा कोरोना भाइरसबाट संक्रमित हुनेको संख्या २ लाख ७३ हजार ४३१ पुगेको छ । नेपालमा १ हजार ४९४ सक्रिय संक्रमित रहेका छन् ।

पछिल्लो २४ घण्टामा थप १ सय २१ जना संक्रमणमुक्त भएका छन् । हालसम्म निको हुनेको संख्या २ लाख ६९ हजार ८ सय ७६ रहेको छ ।

हालसम्म नेपालमा कोरोनाबाट मृत्यु हुनेको संख्या २ हजार ६१ रहेको छ ।

अहिलेसम्म देशभर २१ लाख ३९ हजार ६३४ नमुनाको पीसीआर परीक्षण भएको छ । क्वारेन्टाइनमा ६८ जना रहेका छन् ।

प्रकाशित : फाल्गुन ९, २०७७ १७:२९
पूरा पढ्नुहोस्
प्रतिक्रिया
पठाउनुहोस्
×