हिउँ खेल्न रारा- अर्थ / वाणिज्य - कान्तिपुर समाचार

हिउँ खेल्न रारा

काठमाडौं, बुटवल, विराटनगर, भक्तपुर, पोखरा, भैरहवालगायत सहरबाट समूह बनाएर युवायुवती आइरहेका छन्
राजबहादुर शाही

मुगु — भारी हिमपात भएपछि हिउँ खेल्न विभिन्न ठाउँका पर्यटक रारामा आउन थालेका छन् । काठमाडौं, बुटवल, विराटनगर, भक्तपुर, पोखरा भैरहवालगायत सहरबाट हिउँ खेल्न रारा आउने पर्यटक बढेका हुन् ।

एक साताअघि रारामा भारी हिमपात भएको थियो । हिमपातका कारण रारा क्षेत्रमा झन्डै एक फिट हिउँ जमेको छ । रारा आएर पहिलोपल्ट हिउँमा रमाएको काठमाडौंकी गिता बोगटीले बताइन् । ‘हिउँकै कारण राराताल मनमोहक बनेको छ,’ उनले भनिन्, ‘सेता हिमाल र नीलो ताल हेर्दा दिन बितेको पत्तै हुँदैन ।’ बुटवलका युवराज पाण्डे पनि रारामा हिउँ खेलेर फर्किएका छन् ।

सहरी क्षेत्रबाट ८ देखि १२ जनाको समूह बनाएर युवायुवती रारामा हिउँ खेल्न आइरहेका छन् । हिउँ परेपछि पर्यटकीय चलहपहल फेरि बढ्न थालेको हुटुस्थित डाँफे गेस्ट हाउसका प्रबन्धक बलीराज शाहीको भनाइ छ । ‘आगन्तुक चरा, जताततै हिउँ र स्वच्छ नीलो तालका कारण रारा क्षेत्र सुन्दर र मनमोहक बनेको छ,’ उनले भने, ‘हिउँ बाक्लो परेकाले अझै कम्तीमा एक महिनासम्म पर्यटक हिउँ खेलेर रमाउन सक्छन् ।’

घुम्न आएका पर्यटकलाई चिसो हुन नदिन साँझको समयमा ‘क्याम्प फायर’ को व्यवस्था गरिएको उनले बताए । रारामा अहिले दैनिक ५० देखि १ सय जनासम्म पर्यटक आइरहेका छन् । अहिले सडकमार्गबाट भन्दा हवाई मार्गबाट पर्यटक बढी भित्रिरहेको शाहीले जानकारी दिए । ‘हिमपातका कारण सडकमा जोखिम बढेपछि पर्यटकले हवाइमार्ग रोजेका छन्,’ उनले भने, ‘हिउँ खेल्न आएका पर्यटक तीन दिनसम्म बसेर फर्किने गरेका छन् ।’

विभिन्न कम्पनीले प्याकेज कार्यक्रम ल्याएपछि आन्तरिक पर्यटक बढेको पर्यटन व्यवसायी देवीकृष्ण रोकायाले बताए । उनका अनुसार रारा आउन नेपालगन्ज विमानस्थलबाट ५ हजार ५ सय र काठमाडौंबाट १२ हजार रुपैयाँ हवाई भाडा तोकिएको छ ।

भरिए चरा

चिसो छल्न युरोप, चीन, साइबेरिया, भारतलगायत देशबाट आएका चराले अहिले रारा क्षेत्र भरिएको छ । चराहरू वर्षेनि चिसो छल्न रारा आउने गरेका हुन् । कमकुट, बाटरफल्व, लिटिलक्रिट, टपटेक, ग्रिट, म्यासेन्जर, खोया हाँस, कर्‍याङकुरुङलगायत २० प्रजातिका चरा यो वर्ष रारा भित्रिएको रारा राष्ट्रिय निकुञ्जका रेन्जर सरोज खड्काले जानकारी दिए । उनका अनुसार रारा तालको पानी हिमपातका बेला पनि तातो हुने भएकाले वर्षेनि आगन्तुक चरा यहाँ आउने गरेका हुन् । ‘विदेशी र रैथाने चराले गर्दा रारा चरामय बनेको छ,’ उनले भने, ‘तालदेखि वनजंगल र आसपासका गाउँहरू चराले भरिएका छन् ।’

उनका अनुसार मिलिचौर, ठाकुरज्युला मन्दिर, ओखरबोट, निजारलगायत क्षेत्रसम्म रारा आएका चराहरू जाने गरेका छन् । रारामा अन्य फिरन्ते चराहरूभन्दा खोया हाँस बढी देखिएको उनले जानकारी दिए । रारामा चिसो छल्न हिमाली भेगका वन्यजन्तु पनि आउने गरेका छन् । ऋणीमोक्ष, छायानाथ, रोवा, सोभालगायत लेकबाट घोरल, मृग, कस्तुरीलगायत वन्यजन्तु रारा आसपासको वनमा आएको निकुञ्जले जनाएको छ ।

प्रकाशित : माघ २, २०७७ ०७:२०
प्रतिक्रिया
पठाउनुहोस्

चिसाले चौरमा पढाइ

राजबहादुर शाही

मुगु — हिमपातका कारण धेरै चिसो बढेपछि मुगुका सामुदायिक विद्यालयहरूले चौरमा पढाउन थालेका छन् । कक्षाकोठामा बस्दा चिसाले विद्यार्थीका हातखुट्टा कठ्याङ्ग्रिन थालेपछि घाम लागेका ठाउँमा कक्षा सञ्चालन हुने गरेको हो ।

धेरै विद्यार्थी भएका विद्यालयमा भने सानो चौरमा राखेर विद्यार्थी पढाउन समस्या भएको छ । ‘विद्यार्थीहरू कक्षाकोठामा बस्नै मान्दैनन्,’ खत्याड गाउँपालिकास्थित सर्वोदय माध्यमिक विद्यालयका प्रधानाध्यापक लोकेन्द्र कार्कीले भने, ‘शिक्षकलाई पनि पढाउन मुस्किल हुने भएपछि चौरमा पढाउन थालेका छौं ।’

घाम नलागेका दिन भने कक्षाभित्रै आगो बालेर पढाइने गरिएको शिक्षकको भनाइ छ । हिमपात भएपछि छायानाथरारा नगरपालिकाको बाम, शोभा, कोल्ली, टोप्ला, ताल्चा, मुर्मालगायत गाउँमा अत्यधिक चिसो बढेको छ । घाम नलागेका दिन आगो बालेर कक्षा सञ्चालन गर्नुको विकल्प नभएको छायानाथरारा नगरपालिका–९, मुर्मास्थित नेपाल राष्ट्रिय माध्यमिक विद्यालयका शिक्षक नन्दसिंह रोकायाले बताए । ‘घाम नलागेका दिन विद्यार्थी नै आउँदैनन्,’ उनले भने, ‘त्यसैले घाम लागेका दिन मात्र पठनपाठन हुने गरेको छ ।’

मुगुमकार्मारोङ गाउँपालिकाका १७ सामुदायिक विद्यालयमा भने कक्षाभित्रै आगो बालेर पढाइ भइरहेको छ । बर्सेनि हिउँदका २ महिना बन्द हुने विद्यालय कोरोना महामारीका कारण अहिले पनि सञ्चालनमा छन् । ‘कोर्स नसकिने भएपछि यो वर्ष जाडो बिदा भएन,’ बुद्ध माध्यमिक विद्यालयका प्रधानाध्यापक टीकाप्रसाद उपाध्यायले भने, ‘वार्षिक परीक्षालाई लक्ष्य गरी कक्षाकोठामै आगो बालेर पढाइरहेका हौं ।’

प्रकाशित : पुस २६, २०७७ १९:३५
पूरा पढ्नुहोस्
प्रतिक्रिया
पठाउनुहोस्
×