पुनर्कर्जाका लागि फेरि आवेदन आह्वान

यसअनुसार बैंक तथा वित्तीय संस्थाले आउँदो माघ १६ भित्र आवेदन संकलन गरी राष्ट्र बैंकमा बुझाउनुपर्नेछ । दोस्रो चरणमा थप ९८ अर्ब ५० करोड रुपैयाँका लागि आवेदन मागिएको राष्ट्र बैंक नियमन विभाग प्रमुख देवकुमार ढकालले जानकारी दिए । ‘लघुवित्त वित्तीय संस्थालाई एकमुस्ट रूपमा दिने भनिएको १० प्रतिशत रकमका लागि पनि आवेदन आह्वान भएको छ,’ उनले भने, ‘लघुवित्तलाई करिब २१ अर्ब २५ करोड रुपैयाँ प्रदान गरिनेछ ।’

हालसम्म ४० हजार ९ सय ८३ जना ऋणीलाई ५० अर्ब ७ करोड रुपैयाँ पुनर्कर्जा प्रवाह गर्ने बैंक तथा वित्तीय संस्थालाई एकमुस्ट रूपमा रकम दिइसकेको छ । यस्तै राष्ट्र बैंकले सिधै प्रवाह गर्ने २० प्रतिशत पुनर्कर्जामध्ये हालसम्म २ सय २१ ऋणीलाई ३२ अर्ब ६४ करोड २० करोड रुपैयाँ प्रदान गरिएको छ ।

दोस्रो चरणमा बैंक तथा वित्तीय संस्था र लघुवित्त वित्तीय संस्थालाई पुनर्कर्जा प्रवाह गरेपछि यो वर्षको सीमा पूरा हुने ढकालले बताए । हाल पुनर्कर्जा कोषमा रहेको रकमको ५ गुणासम्म पुनर्कर्जा प्रवाह गर्न पाउने व्यवस्था कार्यविधिमा छ । सो व्यवस्थाअनुसार राष्ट्र बैंकले २ खर्ब ११ अर्ब ५० करोड रुपैयाँ बराबरको पुनर्कर्जा प्रवाह गर्न पाउँछ । हाल कोषमा करिब ४२ अर्ब रुपैयाँ छ ।